Янгиликлар
18
Awıl xojalıǵın rawajlandırıwǵa jańa qádem
2025-jıl 3-fevralda Ózbekstan Respublikası Prezidenti tárepinen awıl xojalıǵı salasın modernizaciyalaw hám investiciyalardı tartıwdı jedellestiriwge qaratılǵan PF-18-san Pármanı qabıllandı. Bul Pármannıń tiykarǵı maqseti awıl xojalıǵı egin maydanlarınıń ónimdarlıǵın asırıw hám tarmaqqa investiciyalardı tartıw ushın qolay shárt-shárayatlardı jaratıw bolıp tabıladı.
Párman sheńberinde, áwele, awıl xojalıǵı ónimleriniń islep shıǵarıw natiyjeliligin asırıwǵa bólek itibar qaratılıp atır. Egin maydanlarınıń ónimliligin asırıw ushın zamanagóy texnologiyalardı engiziw, suwǵarıw sistemaların jaqsılaw hám egin túrlerin diversifikaciya qılıw ilajları kóriledi. Sonıń menen birge, egin maydanlarınan nátiyjeli paydalanıw, olardı turaqlı túrde rawajlandırıw boyınsha ózgerisler ámelge asırıladı.
Párman investiciya ortalıǵı jaqsılanıwına da úlken itibar qaratadı. Awıl xojalıǵı tarmaqlarına shet el hám jergilikli investorlardı tartıw ushın qolay huqıqıy hám finanslıq sharayatlar jaratıw, salıqqa tartıw sisteması hám kredit ajıratıw mexanizmlerin jetilistiriw názerde tutılǵan. Investorlar ushın arnawlı jeńillikler hám subsidiya dásturleri engiziledi, bul bolsa tarmaqqa jańa texnologiyalar hám investiciyalardıń kiriwine járdem beredi.
Usınıń menen birge, awıl xojalıǵı óndirisiniń diversifikatsiyasin támiyinlew hám ónimler eksportın asırıwǵa qaratılǵan ilájlar belgilengen. Bular arqalı, Ózbekstannıń awıl xojalıǵı tarmaqlarınıń turaqlı rawajlanıwı hám global bazarlarda básekige shıdamlılıǵın támiyinlew maqset etilgen.
Jańa Párman, sonıń menen birge, awıl xojalıǵın ilimiy tiykarda rawajlandırıw hám eginler jetistiriw processinde jańa ilim hám innovaciyalardı engiziwge baǵdarlanǵan. Bul bolsa, óz gezeginde, tarawdıń básekige shıdamlılıǵın asıradı hám mámlekettiń ekonomikalıq turaqlılıǵın támiyinlewge xızmet etedi.
Ulıwma alǵanda, PF-18-sanlı Prezident Pármanı Ózbekstan awıl xojalıǵı salasında zárúrli ózgerisler kirgiziwge hám investiciyalardı tartıwǵa xızmet etetuǵın, perspektivalı hám kompleks jantasıwdı ózinde sáwlelendiredi.
Kegeyli rayonı ádillik bólimi,
Mámleketli xızmetler orayı direktorı A.Dauekeev