Янгиликлар
17
PHAJ bólimlerinde tákirar gúwalıqlar beriw tártibi
Kúndelikli turmısımızda sál ǵana nemquraylıǵımız sebepli anaw yamasa mınaw hújjetti joytıp alıwımız múmkin. Yamasa ayırım baxıtsız hádiyseler sebepli olarǵa zıyan jetkeriwi ву múmkin.
Álbette, joytılǵan hújjet joytılǵansha, zıyanlanǵanı paydalanıwǵa jaramsız bolıp qala bermeydi. Bunday mashqalanı sheshiw ushın tiyisli rayonlıq, qalalıq PHAJ bólimlerine múrájat etiw zárúr.
Akt jazıwınıń birinshi nusqası saqlanıp atırǵan PHAJ bólimi mápdar shaxslardıń arzalarına bola hám tiyisli akt jazıwları tiykarında tákirarıy gúwalıqlar beredi.
Tuwılǵanlıq haqqındaǵı tákirarıy gúwalıqlar puqaralıq halatı aktiniń jazıwı jazılǵan tiyisli shaxstıń ózine, onıń ata-anasına yamasa nızamlı isenim xatları tiykarında basqa shaxslarǵa, ólim haqqındaǵı tákirarıy gúwalıqlar bolsa marhumnıń jaqın tuwısqanlarına hám miyrasxorlarına beriledi.
Neke dúzilgenligi haqqındaǵı tákirarıy gúwalıqtı neke dúzilgen shaxslardıń ózleri alıwǵa haqılı.
Nekeden ajıratılǵanda neke dizimge alınǵanlıǵı haqqında tákirarıy gúwalıq berilmeydi. Balalar hám ámeliyatqa jaramsız shaxslarǵa bunday gúwalıqlar olardıń ata-anaları (perzentlikke alıwshılar), qayırqomları, qáwenderleri, balalardı sociallıq qorǵaw mákemesi administraciyasınıń arzaları boyınsha beriledi.
Tákirarıy gúwalıq alıw haqqındaǵı arzada gúwalıq ne sebepten talap etilip atırǵanlıǵı kórsetiliwi kerek. Tákirarıy gúwalıq alıwdı qálewshi shaxs akt jazıwların jazılǵan PHAJ bólimine tikkeley yamasa ózi jasap turǵan jerdegi PHAJ bólimi arqalı múrájat etiwi múmkin.
Tákirarıy gúwalıq múrájat etilgen sol kúni beriledi. Áskeriy xizmetti ótep atırgan shaxslardıń tákirar gúwalıqları áskeriy bólimge jiberiledi.
Eger tákirarıy gúwalıq sorap múrájat etilgen PHAJ bóliminde tiyisli akt jazıwı bolmasa, PHAJ bólimi arzanı hám akt jazıwı joq ekenligi haqqındaǵı maǵlıwmattı qalalıq, wálayatlıq PHAJ arxivine tiyisli tekseriw ótkeriw hám tákirarıy gúwalıq beriw ushın jiberedi. Eger arxivte de akt jazıwı bolmasa, arza beriwshige tiyisli maǵlıwmatnama jiberiledi.
Tákirarıy gúwalıq alıwda arza beriwshiniń shaxsın tastıyıqlawshı hújjet kórsetiliwi kerek. Ayrıqsha jaǵdaylarda (hújjet jazıwınıń birinshi nusqası joytılǵanda, ekinshi nusqası boyınsha gúwalıq alıw qolaylı bolǵanda) Qaraqalpaqstan Respublikası, wálayatlar hám Tashkent qalası PHAJ arxivleri hújjet jazıwınıń birinshi hám ekinshi nusqalarınıń birdeyligin teksergennen soń tuwılǵanlıq, neke, ólim hám nekeden ajırasqanlıq haqqında tákirarıy gúwalıqlar beredi. Bunday gúwalıqlardıń joqarı bólimine "Tákirarıy" degen belgi qoyıladı.
Shımbay rayonı ádillik bólimi
PHAJ bólimi 1-dárejeli inspektorı P.Kulımbetov