Янгиликлар
14
Kommunal tarawdaǵı nızamshılıq hújjetleriniń mazmun-mánisi.
Ózbekstan Respublikası Prezidentiniń 2024-jıl 24-maydaǵı PP-80-sanlı Pármanına muwapıq, xalıqtıń kúndelikli turmısında ushraytuǵın huqıqıy mashqalalardı anıqlaw hám olardı saplastırıw boyınsha ámeliy is-ilajlardı ámelge asırıp barıw ádillik uyımlarınıń tiykarǵı wazıypalarınan biri etip belgilengen.
Joqarıdaǵı Pármanǵa muwapıq qabıl etilgen Ózbekstan Respublikası Ádillik ministriniń 2024-jıl 12-noyabrdegi “Ádillik organları tárepinen xalıqtıń huqıqıy mashqalaların sheshiw sistemasın shólkemlestiriw hám de puqaralardıń nızamda bekkemlenip qoyılǵan huqıq hám nızamlı mápleriniń támiyinleniw jaǵdayın monitoring qılıw ilajları haqqında”ǵı 384-um-sanlı buyrıǵı menen rayon (qala) ádillik bólimleri tárepinen reje-grafik tiykarında máhállelerge shıqqan halda nızamlarda puqaralardıń huqıq hám máplerin támiyinlewge qaratılǵan normalar hám standartlardıń islewin monitoring qılıw hám de xalıqtıń huqıqıy mashqalaların anıqlaw hám saplastırıw belgilengen.
Belgilengen reje-grafikke kóre 2025-jıl fevral ayında rayonda jaylasqan “Mamıy” awıl puqaralar jıyını aymaǵında “Huqıqıy máhalle” joybarın sheńberinde Shomanay rayonı ádillik bólimi xızmetkerleri tárepinen úyme-úy júriw arqalı puqaralardıń kommunal xızmetler kórsetiw máselesinde mashqalaları bar ekenligi anıqlandı.
Monitoring dawamında, úyme-úy júriw dawamında kóplegen puqaralardıń kommunal xızmetler kórsetiwde shártnamaǵa muwapıq huqıq hám májbúriyatlarınan xabarı joq ekenligin bildirgen.
Ózbekstan Respublikası Puqaralıq kodeksiniń 8-statyası birinshi bólimine muwapıq puqaralıq huqıq hám minnetleri nızamshılıqta názerde tutılǵan tiykarlardan, sonıń menen birge puqaralar hám de yuridikalıq shaxslardıń, eger nızamshılıqta názerde tutılǵan bolmasa-da, biraq puqaralıq nızamshılıǵınıń ulıwma negizleri hám mazmunına tiykar puqaralıq huqıq hámde minnetlerdi keltirip shıǵaratuǵın háreketlerinen payda boladı dep kórsetilgen.
Usı kodekstiń 353-statyası birinshi bóliminde eki yamasa bir neshe shaxstıń puqaralıq huqıqları hám minnetlerin payda etiw, ózgertiw yamasa biykarlaw haqqındagı shártlesiwi shártnama dep atalıwı belgilengen.
Ózbekstan Respublikası Ministrler Kabinetiniń 31.05.2024-jıldaǵı 319-sanlı qararı menen tastıyıqlanǵan “Tábiyiy gazden paydalanıw qaǵıydaları”nıń 1-bántinde usı Qaǵıydalar tábiyiy gazdi jetkerip beriw hám tutınıw tarawındaǵı talaplardı belgileydi dep kórsetilgen.
Usı Qaǵıydanıń 59-bántinde xojalıq tutınıwshıları menen tábiyiy gazdi jetkerip beriw shártnaması dúzilmegen jagdayda, shártnama tutınıwshı gaz tarmaǵına belgilengen tártipte ámelde jalǵanǵan waqıttan baslap dúzilgen esaplanadı. Bunda gaz támiyinatı shólkemi usı tutınıwshı menen tábiyiy gazdı jetkerip beriw shártnamasın dúziwi hám de usı Qagıydalardaǵı talaplar támiyinleniwi júzesinen zárúr ilajlardı kóriwi shárt dep belgilengen.
Sonday-aq, usı Qaǵıydanıń 63-bántinde tábiyiy gazdı jetkerip beriw shártnaması elektron formada dúziledi hám onı gaz támiyinatı shólkeminiń sanlastırılǵan dástúrlik támiyinatı yáki nızamshılıq hújjetlerinde belgilengen tártipke tiykar shólkemlestirilgen arnawlı málimleme sistemalarınan tutınıwshı yáki qadaǵalawshı organlardıń sorawlarına tiykar alıw imkaniyatı jaratıladı dep kórsetilgen.
Ózbekstan Respublikası Ministrler Kabinetiniń 15.07.2014-jıldaǵı 194-sanlı qararı menen tastıyıqlanǵan “Tutınıwshılarǵa suw támiynatı hám aqaba suwdı shıǵarıw xızmetlerin kórsetiw qaǵıydaları”nıń 1-bántinde usı Qaǵıydalar ishimlik suw támiynatı hám aqaba suwdı shıǵarıw oraylastırılǵan sistemalarınan paydalanıw tarawında suw qubırları-kanalizaciya xojalıǵı shólkemleri menen tutınıwshılar ortasındaǵı óz-ara múnásebetlerdi belgileydi dep kórsetilgen.
Usı Qaǵıydanıń 15-bántinde tutınıwshılarǵa suw beriw hám olardan aqaba suwlardı qabıl qılıw tek ǵana ISKX shólkemi menen tutınıwshı ortasında dúzilgen shártnama bar bolǵanda ǵana ámelge asırıladı.
ISKX shólkemi menen tutınıwshı ortasında dúzilgen shártnama usı Qaǵıydalarǵa muwapıq dúzilgen bolıwı, táreplerdiń barlıq huqıq, wazıypa hám májbúriyatların sáwlelendiriwi kerek dep belgilengen.
Sonday-aq, usı Qaǵıydanıń 22-bántinde shártnamada onıń predmeti, yaǵnıy ishimlik suwı menen támiyinlew hám (yáki) aqaba suwların shıǵarıw (aǵızıw) kórsetilip, tómendegi ayrıqsha shárayatlarda názerde tutıladı: ishimlik suwın alıw tártibi, sol qatarı órt óshiriw hám aqaba suwlardı shıǵarıw jaǵdaylarında;
ishimlik suwı sıpatına talaplar;
tutınıwshı ishimlik suwı menen támiyinlenbegen yáki tolıq támiyinlenbegen jaǵdaylarda qayta esap-kitap qılıw;
ishimlik suwı támiyinatı hám aqaba suwların shıǵarıwdı toqtatıw yáki sheklew shártleri;
alınǵan ishimlik suwı hám shıǵarılǵan aqaba suwları esabı;
tólew tártibi, múddetleri, tarifları hám shártleri;
táreplerdiń suw támiynatı hám kanalizaciya tarmaǵınan paydalanıw boyınsha juwapkerlik shegaraları;
táreplerdiń huqıq hám májbúriyatları;
qarızdarlıq kelip shıqqan jaǵdayda I topar tutınıwshılarına tiyisli bolǵan turaq jayda turaqlı jasaw ornı boyınsha dizimge alınǵan er jetken fizikalıq shaxslardıń suw támiyinatı hám aqaba suwdı shıǵarıw xızmetleri ushın tólemler boyınsha solidar juwapkerligi;
táreplerdiń biriniń arzasına kóre kelisimge tiykar bolıwı múmkin bolǵan basqa shártler;
shártnamanı biykarlaw tártibi dep belgilengen.
Ózbekstan Respublikası Ministrler Kabinetiniń 31.05.2024-jıldaǵı 319-sanlı qararı menen tastıyıqlanǵan “Elektr energiyasınan paydalanıw qaǵıydaları”nıń 40-bántinde elektr energiyası bir waqıttıń ózinde islep shıǵarılıwı hám tutınılıwı menen xarakterlenetuǵın ayrıqsha tovar túri sıpatında, AETK hám energiya qurılmaları usı shólkem tarmaǵına tikkeley jalǵanǵan tutınıwshı ortasında dúzilgen elektr támiynatı shártnaması tiykarında usı Qaǵıydalarǵa muwapıq jetkerilip beriledi.
Sonday-aq, usı Qaǵıydanıń 41-bántinde AETK hám tutınıwshı ortasındaǵı elektr támiyinatı shártnaması elektr támiynatınıń úlgidegi shártnamasına muwapıq tayarlangan formada dúziledi.
Qaǵıydanıń 42-bántinde bolsa elektr shártnaması 2 nusqada dúziledi. Bir nusqası tutınıwshıga usınıladı, ekinshisi AETKda qaladı. Shártnama rásmiylestiriw hám tutınıwshıga usınıw elektr energiyasın jetkerip beriwshi moynında boladı dep belgilengen.
Ózbekstan Respublikası Ministrler Kabinetiniń 06.02.2019-jıldaǵı 95-sanlı qararı menen tastıyıqlanǵan “Qattı hám suyıq xojalıq shıǵındıların toplaw hám alıp ketiw boyınsha xızmetler kórsetiw qaǵıydaları”nıń 1-bántinde usı qaǵıydalar shıǵındılar menen baylanıslı jumıslardı ámelge asırıw tarawında xızmet kórsetiwge qánigelesken shólkemler tárepinen qattı hám suyıq xojalıq shıǵındıların toplaw hám alıp shıǵıp ketiw boyınsha xızmetler kórsetiw tártibin belgileydi dep kórsetilgen.
Usı Qaǵıydanıń 6-bántinde xojalıq shıǵındıların toplaw hám alıp shıǵıp ketiw boyınsha xızmetler kórsetiw usı Qaǵıydalar hám shártnama (pitim)larǵa muwapıq ámelge asırıladı. Bunda, xalıqqa xojalıq shıǵındıların toplaw hám alıp shıǵıp ketiw boyınsha xızmetler Qaraqalpaqstan Respublikasi Ministrler Keńesi, wálayatlar hám Tashkent qalası hakimlikleri hám de xızmet kórsetiwshi shólkemler ortasında dúziletuǵın shártnama (pitim), sonday-aq, fizikalıq shaxslarǵa xojalıq shıǵındıların toplaw hám alıp shıǵıp ketiw ushın xızmetler kórsetiw boyınsha ǵalabalıq shártnama tiykarında ámelge asırıladı dep belgilengen.
Sonday-aq, joqarıdaǵı Qaǵıydanıń 44-bántinde xızmet kórsetiwshi shólkem tómendigilerge májbúr: nızam hújjetleri hám usı Qaǵıydalarda belgilengen tártipte oǵan rayon (qala) aymaqları biriktirilgennen keyin, bes jumıs kúni dawamında xojalıq shıǵındıların toplaw hám alıp shıǵıp ketiw boyınsha fizikalıq shaxslarǵa xızmetler kórsetiw ushın ǵalabalıq shártnamanı ǵalaba xabar quralları arqalı járiyalaw;
ǵalabalıq shártnama nusqasın xızmet kórsetiletuǵın aymaqtaǵı puqaralardıń ózin-ózi basqarıw organları hám jeke úy-jay múlkdarları shirketlerine jiberiw (jeke qol tańba qoydırılǵan halda yáki usınılǵanlıǵı haqqındaǵı bildiriw xatı menen pochta arqalı);
xojalıq shıǵındıların toplaw hám alıp shıǵıp ketiw boyınsha xızmetler kórsetiw ushın yuridik shaxslar hám jeke tártiptegi isbilermenler menen shártnamalar dúziw;
tutınıwshılarǵa xojalıq shıǵındıların alıp shıǵıp ketiw boyınsha nızam hújjetleri, usı Qaǵıydalar hám shártnama talaplarına muwapıq zárúr sapadaǵı xızmetler kórsetiw;
xızmet kórsetiwshi shólkemniń stendında, dagazalar taxtasında kórsetilip atırgan xızmetler, olardıń ámeldegi tarifler, tólem shártleri haqqındaǵı maglıwmatlardı, sonday-aq, qattı xojalıq shıgındıların alıp shıǵıp ketiw kestesi, xojalıq shıǵındıların toplaw hám alıp shıǵıp ketiw boyınsha fizikalıq shaxslarǵa xızmetler kórsetiw ushın galabalıq shártnamanı jaylastırıw dep kórsetilgen
Shomanay rayonı ádillik bólimi
Mámleketlik xızmetler orayı
bas qánigesi T.Dawletmuratov