Янгиликлар
02
Qaraqalpaqstan Respublikasın sociallıq-ekonomikalıq rawajlandırıw hám de isbilermenlikti qollap-quwatlawda keń múmkinshilikler jaratılmaqta
Qaraqalpaqstan Respublikasın sociallıq-ekonomikalıq rawajlandırıw hám de isbilermenlikti qollap-quwatlawda keń múmkinshilikler jaratılmaqta
Húrmetli Prezidentimiz tárepinen Qaraqalpaq xalqı ushın áhmiyetli bolǵan Qaraqalpaqstan Respublikasın kompleks rawajlandırıw, isbilermenlikti qollapquwatlaw hám xalıqtıń abadan turmısın támiyinlew baǵdarındaǵı Pármanı qabıl etildi. Pármanǵa muwapıq Qaraqalpaqstan Respublikası Ministrler Keńesi janında Isbilermenlikke kómeklesiw direkciyasi jańadan shólkemlestirilmekte.
Bul direkciya Nókis qalası hám rayonlarda sanaat obyektleri ushın imarat qurıw, olardı ijaraǵa beriw, satıw hám basqada áhmiyetli wazıypalardı ámelge asıradı. Bunnan tısqarı, usı párman menen bir qatar jeńillikler berildi. Atap aytqanda, Ministrler Keńesiniń qararı tiykarında 2025-2027-jıllarda Nókis qalasında keminde 500 mıń AQSh dolları, Ámiwdárya, Xojeli, Qońırat hám Nókis rayonları ushın 300 mıń AQSh dolları, sonday-aq qalǵan Ellikqala, Beruniy, Tórtkúl, Taqıyatas, Kegeyli, Bozataw, Shımbay, Qaraózek, Taxtakópir, Shomanay, Qanlıkól, Moynaq rayonları ushın 100 mıń AQSh dolları ekvivalentinde bolǵan iri investiciyalıq joybarlar ushın (sonıń ishinde, sırt el investiciyaları qatnasındaǵı kárxanalarǵa, erkin ekonomikalıq zonalar, kishi sanaat zonaları, jaslar sanaat hám isbilermenlik zonaları aymaqlarında) jer uchastkaların uzaq múddetli ijara huquqı menen beriw tártibi engiziledi.
Sonday-aq, 2025-2026-jıllarda Qaraqalpaqstan Respublikasında sanaattı rawajlandırıw ushın tarmaqlarǵa ajıratılǵan qarjılar esabınan 100 mln AQSh dollar ajıratılıwı belgilengen. Bunda: - Nókis qalası, Ámiwdárya, Qanlıkól, Nókis, Qońırat hám Shımbay rayonlarında kishi sanaat zonaları shólkemlestirilip, barlıq qolaylıqlar hám infrastrukturaǵa iye bolǵan imaratlar qurıladı hám investorlarǵa usınıladı;
Kishi hám orta biznes joybarların qarjılandırıw ushın isbilermenlerge 10 milliard sumǵa shekem jeńilletilgen kredit beriledi, yaǵnıy, kreditler jıllıq 14 procent stavkada, 7 jılǵa shekemgi múddetke, sonıń ishinde, 2 jıllıq jeńilletilgen dáwir menen ajıratıladı.
Bunnan tısqarı, Pármanǵa muwapıq 2025-2026-jıllar dawamında awıl xojalıǵına arnalǵan jerlerdi ijaraǵa beriw tártibi jeńilletiledi, yaǵnıy: Múddetin keyin ala sozıw imkaniyatı menen ijara múddeti 30 jıldan 49 jılǵa uzaytıldı. Sonday-aq, 35 mıń gektar bos turǵan awıl xojalıǵına mólsherlengen jer uchastkaları elektron onlayn aukcion sawdalarına shıǵarıladı.
- elektron onlayn aukcion sawdalarında jer uchastkasınıń baslanǵısh bahası jer uchastkasınıń normativlik bahasınıń 20 procenti muǵdarında, qayta paydalanıwǵa kirgiziletuǵın jer uchastkalarınıń baslanǵısh bahası normativlik bahasınıń 10 procenti muǵdarında belgilenedi;
- jer uchastkasınıń bahasın 10 jıl dawamında bólip tólewge ruxsat beriledi. 2025-jıldıń aqırına shekem aymaqta qosımsha gósh hám sút ónimlerin islep shıǵarıwdı rawajlandırıw maqsetinde iri qaramal, qoy hám eshkilerdi kóbeytiw ushın embrionlardı kóshirip ótkeriw texnologiyaları menen támiyinlengen 4 biotexnologiyalıq oray shólkemlestiriliwi belgilenbekte.
Prezidentimizdiń bul Pármanı jámiyettiń barlıq qatlamları ushın zárúrli áhmiyetke iye bolıp, Qaraqalpaqstan Respublikasınıń sociallıq-ekonomikalıq tárepten rawajlanıwına hám xalıqtıń jetkilikli turmıs keshiriwine úlken úles qosadı.
Qaraqalpaqstan Respublikasi Ádillik ministrliginiń
Huqıqtı qollaw ámeliyatın úyreniw hám metodikalıq
támiyinlew sektorı baslıǵı Ayasanem Abdikadirova