Янгиликлар
24
Nekeden ótiwden aldın medicinalıq kóriktiń áhmiyeti haqqında
Salamat shańaraqtı qáliplestiriw, salamat shańaraqtan salamat áwladtıń tuwılıwı, násilge baylanıslı bolǵan hám tuwma keselliklerge shalınǵan balalardıń tuwılıwınıń aldın alıw ushın shárayatlar jaratıw, sanday-aq kesellikke shalınǵan yamasa mayıp balalardıń tuwılıwınıń aldın alıw nekeleniwshi shaxslardı medicinalıq kórikten ótkeriwdin tiykarǵı maqseti bolıp esaplanadi. Ózbekstan Respublikası Shańaraq kodeksiniń 17-statyası «Nekeleniwshi shaxslardı medicinalıq kórikten ótkeriw» dep ataladı. Bul statyanıń mazmunına kóre nekeleniwshi shaxslardı medicinalıq korikten ótkeriw, shańaraqtı rejelestiriw máseleleri boyınsha másláhátlar beriw, nekeleniwshi shaxslardıń razılıǵı menen medicinalıq birlespeler tárepinen ámelge asırılıwı, nekeleniwshi shaxstı medicinalıq kórikten ótkeriw nátiyjesi shıpaker sırı bolıp, kórikten ótken shaxstıń razılıǵı menen bildiriliwi belgilengen.
Ózbekstan Respublikası Shańaraq kodeksiniń 17-statyasınıń orınlanıwın támiyinlew maqsetinde Ministrler Kabinetiniń 2003 jil 25 avgusttagı №365-sanlı Qararı menen “Nekeleniwshi shaxslardı medicinalıq kórikten өtkeriw haqqında”ǵı Rejeni tastıyıqladı. Bul Rejeniń ámel etiwi nekeleniwshi shaxslardıń puqaralıǵınıń qanday bolıwına qaramastan, Ózbekstan Respublikasında PHAJ bólimleri tárepinen dizimnen ótkeriletuǵın barlıq nekeleniwshi shaxslarǵa tiyisli.
Nızamǵa tiykar nekeleniwshi shaxslar 5 tárepleme;
Ruwxıy kesellikler,
Narkologiyalıq kesellikler,
Teri kesellikler,
Tuberkulez keselligi.
AIJS/AIV (SPID) keselligi tarepinen medicinalıq kórikten ótkeriledi.
Nekeleniwshi shaxslar PHAJ bólimleri tárepinen medicinalıq kórikten ótiw ushın jergilikli yamasa waqtınsha jasaw ornındaǵı medicinalıq birlespelerden kórikten ótiw ushın jollama beriledi.
Medicinalıq kórikten ótiw ushın berilgen jollamalar PHAJ bólimlerinde neke duziw haqqındaǵı arzalardı kiriske alıw kitabında dizimge alınadı.
Nekeleniwshi shaxslardıń medicinalıq kórigi olardıń jasaytuǵın jerindegi psixiatr shıpakerler, narkologlar, tuberkulez keselligi shıpakerleri, teri keselligi shıpakerleri tárepinen PHAJ bólimleri tárepinen berilgen jollama boyınsha biypul ótkeriledi.
Medicinalıq kórikten ótiw muddeti nekeleniwshi shaxslar medicinalıq birlespege muráját etken kúnnen baslap eki hápteden aspawı kerek. Nekeleniwshi shaxslarǵa medicinalıq kóriktiń natiyjesi haqqında maǵlıwmat beriledi. Maǵlıwmat medicina birlespesiniń móri hám baslıǵınıń qolı menen tastıyıqlanadı.
Nekeni dizimge alıwda PHAJ bólimleri nekeleniwshi shaxslardıń medicinalıq kórikten ótkenligine hám olardıń usı tekseriw natiyjelerinen xabardarlıǵına isenim payda etiw kerek.
Nekeleniwshi shaxslar neke dizimge alınǵanǵa shekem ekinshi tárep medicinalıq kóriktiń natiyjelerinen xabardar etiliwi shárt.
Medicinalıq kórikten ótkennen keyin Ózbekstan Respublikası Shańaraq kodeksiniń 16 statyasında kórsetilgen neke duziwge jol qoyıwǵa bolmaytuǵın jaǵdaylar bolmasa (nekeleniwshi shaxslardıń birewi basqa shaxs penen nızamlı nekede tursa;
násil shejiresi boyınsha tuwrı tutasqan tuwısqanlar ortasında,
tuwısqan hám ógey aǵa-iniler, apa-sińliler ortasında, sonday-aq
perzentlikke alıwshılar menen perzentlikke alınǵanlar ortasında;
basqa birewi ruwxıy keselligi yamasa aqılı zayıplıǵı sebepli
sud tárepinen huqıq uqıplılıǵına iye emes dep tabılǵan shaxslar
ortasında neke dúziwge jol qoyılmaydı) PHAJ bólimleri tárepinen
nekeni dizimge alıw belgilengen tártipte ámelge asırıladı.
Nekeleniwshi shaxslarda tekseriw nátiyjesinde emleniwdi talap etiwshi kesellikler anıqlanǵan jaǵdayda, olar belgilengen tártipte tiyisli emlew birlespelerine jiberiledi.
Eger nekeleniwshi shaxslarda medicinalıq kórikten ótkeriw nátiyjesinde olardıń birewinde yamasa ekewindede Rejede kórsetilgen
kesellik anıqlanǵan jagdayda, nekeni dizimge alıw táreplerdiń usı tekseriw nátiyjelerinen xabardarlıǵı tastıyıqlanǵannan keyin ámelge asırıladı.
PHAJ bólimleri tárepinen Ózbekstan Respublikası Shańaraq kodeksiniń 17-statyası boyınsha yaǵnıy neke duziw ushın muráját etken hár bir puqaraǵa nekeden aldın medicinalıq kóriktiń ótiwdiń mazmunı hám keleshekte onıń áhmiyeti haqqında huqıqıy túsindiriw jumısların alıp barıw jolǵa qoyılǵan.
Medicinalıq kórikten ótkiziwdi jánede tártipke salıw maqsetinde Ministrler Kabineti tárepinen 2007 jıldıń 17 aprelinde qabıl etilgen “Nekeleniwshi shaxslardı medicinalıq kórikten ótkeriw haqqındaǵı Rejege ózgeris hám qosımshalar kiritiw haqqında”ǵı 78-sanlı qararına tiykar, PHAJ bólimleri tárepinen medicinalıq kórikten ótiw ushın jollamalar 50 jastan joqarı shaxslarǵa olardıń razılıǵı menen beriliwi jolǵa qoyıldı.
Nókis rayonı ádillik bólimi
PHAJ bólimi inspektorı G.Otepova