Янгиликлар
28
Kegeyli rayonı ádillik bólimi Mámleketlik xızmetler orayı tárepinen 2024-jıl dawamında islegen jumısları boyınsha esabat
Mámleketlik xızmetlerin kórsetiw tarawında olardıń sapası, tezligi, qolaylıǵı hám paydalanıw imkániyatın túpten asırıw arqalı «Xalıq mámleketlik uyımlarına emes, mámleketlik uyımlar xalqımızǵa xızmet etiwi kerek» degen ideyanı ámelge asırıw hám mámleketlik xızmetleriniń hár bir túri boyınsha «Puqaralar emes, hújjetler háreketlenedi» principine muwapıq mámleketlik xızmetlerin kórsetiw mexanizimin, eń aldı menen, artıqsha tártip-qaǵıydalardı saplastırıw, respublikamızda mámleketlik xızmetlerin kórsetiw sistemasın izbe-izlik penen modernizaciya qılınıp atırǵanlıǵınan derek beredi.
Atap aytqanda Kegeyli rayonı ádillik bólimi Mámleketlik xızmetler orayı tárepinen fizikalıq hám yuridikalıq shaxslarǵa 2024-jıl dawamında jámi 43 087 mámleketlik xızmetler kórsetilip, sonnan 7 019 xızmetlerdi puqaralar, orayǵa múrájat etpesten onlayn tárizde yaǵnıy, Birden-bir interaktiv mámleketlik xızmetler portalı (my.gov.uz hámde new.birdarcha.uz) sistemaları arqalı ámelge asırılǵan.
Sonıń menen birge 1 285 isbilermenlik subyekti sıpatında mámleketlik dizimge alınıp, sonnan 97 yuridikalıq shaxs bolǵan isbilermenlik subyektleri bolsa, 1 188 jeke tártiptegi isbilermenler sıpatında mámleketlik dizimge alındı.
Bul kórsetkishtiń bárshesi oray imáratınıń ózinde ǵana emes, oray xızmetkerleri alıs hám shetki aymaqlarǵa shıqqan halda, ótken jıl dáwirinde 3 010 (sonnan 250 ge jaqın mayıplıǵı bolǵan, nawqaslıǵı sebepli orayǵa keliw imkaniyatı bolmaǵan) puqaralarǵa kóshpeli tártipte mámleketlik xızmetler kórsetildi.
Búgingi kúnde Mámleketlik xızmetler orayları tárepinen kórsetiletuǵın mámleketlik xızmetlerdiń sanı 300 den aslam bolıp, bul mámleketlik xızmetlerdiń bárshesinen orayǵa kelmesten, aralıqtan turıp internet tarmaǵı arqalı onlayn tárizde yaǵnıy, Birden-bir interaktiv mámleketlik xızmetler portalı yaǵnıy (my.gov.uz hámde new.birdarcha.uz) sistemaları arqalı paydalanıwıńız múmkin. Bunda artıqsha áweregershiliklerdiń aldı alınadı, sonday-aq, mámleketlik xızmetten paydalanıwıńız ushın tólemińiz 10 payızǵa shegirme beriledi.
Bunıń ushın eń aldi menen mámleketlik xızmetlerinen paydalanıw ushın shaxstı identifikaciyalawdıń ámeldegi sistema hám qurallarına qosımsha túrde fizikalıq shaxstı identifikaciyalawdıń Mobil-ID sistemasınan dizimnen ótiwleri tiyis.
Xalqımız ushın jáne bir úlken jańalıq, puqaralardıń huqıq hám erkinliklerine sózsiz ámel etiliwin támiyinlew, olarǵa kórsetilip atırǵan mámleketlik hám huqıqıy xızmetler kólemin keńeytiwde ádillik uyımları hám mákemeleriniń juwapkerligin jáne de asırıw maqsetinde Ózbekstan Respublikası Prezidentiniń 2024-jıl 24-maydaǵı "Hákimshilik reformalar sheńberinde ádillik uyımları hám mákemeleriniń juwapkershiligin jáne de asırıw hám de ıqsham basqarıw sistemasın qáliplestiriw haqqında"ǵı PP-80-sanlı Pármanı qabıl qılındı.
Pármanǵa tiykar, puqaralar hám isbilermenlik subyektlerine mámleketlik xızmetlerin kórsetiw tarawında qosımsha qolaylıqlar jaratıldı:
•jańadan 13 túrli mámleketlik xızmetleri MXO hám Birden-bir interaktiv mámleketlik xızmetler portalı arqalı kórsetiledi, mámleketlik xızmetleriniń 11 proaktiv,
7 kompozit formaǵa ótkerildi;
•sektor wákillerine 15 túrdegi mámleket xızmetlerin kórsetiw huqıqı beriledi;
•jıl juwmaǵına shekem mámleketlik xızmetlerin kórsetiwde shaxstı identifikaciyalawdıń Face-ID usılı qollanılıp, pasport yamasa shaxstı tastıyıqlawshı basqa hújjetlerdi usınıw talabı biykar etiledi;
Kegeyli rayonı ádillik bólimi
Mámleketlik xızmetler orayı
direktorı A.Dauekeev