Янгиликлар
20
Qayta gúwalıq (málimleme) beriw
Ózbekstan Respublikası Ministrler Kabinetiniń 2023-jıl 20-oktyabrdegi 550-sanlı “Neke, shańaraq hám puqaralıq halatı aktlerin dizimge alıw tarawındaǵı normativ-huqıqıy hújjetlerdi sistemalastırıw haqqında”ǵı Qararǵa tiykar, tákirar gúwalıq alıw ushın múrájat etken puqaralarǵa akt jazıwınıń birinshi nusqası saqlanıp atırǵan PHAJ organı máptar shaxslardıń arzalarına boyınsha hám tiyisli akt jazıwları tiykarında tákirar gúwalıq beriledi.
Ayrıqsha jaǵdaylarda (akt jazıwınıń birinshi nusqası joytılǵanda, ekinshi nusqa boyınsha gúwalıq alıw qolay bolǵanda) aymaqlıq ádillik organlarınıń PHAJ arxivleri akt jazıwınıń birinshi hám ekinshi nusqalarınıń ayırmashılıǵı joq ekenligi tekserilgennen keyin tuwılǵanlıq, neke dúzilgenligi, ólim hám nekeden ajırasqanlıq haqqında tákirar guwalıq beriledi.
Tuwılǵanlıq haqqında tákirar gúwalıqlar puqaralıq halatı akt jazıwı dizimge alınǵan tiyisli shaxstıń ózine, onıń ata-analarına yáki nızamshılıqta belgilengen tártipte tastıyıqlanǵan isenim xat tiykarında basqa shaxslarǵa beriledi. Qaytıs bolǵan shaxsqa tuwılǵanlıq haqqında gúwalıq berilmeydi. Zárúr jaǵdaylarda, qaytıs bolǵan shaxsqa tuwılǵanlıq haqqında maǵlıwmatnama beriliwi múmkin.
Ólim haqqında tákirar gúwalıqlar marhumnıń jaqın tuwısqanlarına hám miyrasxorlarına yamasa nizamshılıqta belgilengen tártipte tastıyıqlanǵan isenim xatqa iye bolǵan shaxslarǵa beriledi.
Neke dúzilgenligi hám nekeden ajırasqanlıq haqqındaǵı tákirar gúwalıqlar akt jazıwı dizimge alınǵan tiyisli shaxslardıń ózlerine yamasa nızamshılıqta belgilengen tártipte tastıyıqlanǵan isenim xatqa iye bolǵan shaxslarǵa beriledi.
Nekeden ajırasqanda neke dúzilgenligi haqqındaǵı tákirar gúwalıq berilmeydi. Zárúr jaǵdaylarda neke dúzilgenligi haqqında maǵlıwmatnama beriliwi múmkin.
Balalarǵa hám miynetke jaramsız shaxslarǵa tákirar gúwalıqlar olardıń ata-anaları (perzentlikke alǵanlar), ámengeri, qáwenderi, balalardı sociallıq qorǵaw shólkemleri arzaları boyınsha beriledi.
Ata-anası bolmaǵan jaǵdayda, er jetpegen shaxslarǵa yáki puqaralıq pasport (identifikatsiyalawshı ID-kartası) almaǵan shaxslarǵa tuwılǵanlıq haqqında tákirar gúwalıqlar usı shaxstıń fotosúwreti japıstırılǵan, shaxs bilim alıp atırǵan bilimlendiriw shólkemi yamasa jasaw jerindegi máhalle puqaralar jıyını tárepinen berilgen akt tiykarında beriledi.
Tákirar gúwalıq alıw haqqındaǵı arzada arza beriwshinıń familiyası, atı, ákesiniń atı, mánzili, shaxsın tastıyıqlawshı hújjettiń seriyası, nomeri, guwalıq sorap atırǵan shaxstıń familiyası, atı, ákesiniń atı, neke dúzilgenligi haqqında gúwalıq soralǵanda erli-zayıplınıń familiyaları, atları hám ákesiniń atları, akt jazıwı qashan hám qaysı PHAJ organı tárepinen dizimge alınǵanlıǵı hám tákirar gúwalıq qanday sebepke kóre talap etilip atırǵanlıǵı kórsetiliwi kerek.
Tákirar gúwalıq alıwdı qálewshi shaxs, turaqlı (waqtınsha) dizimnen ótken jerine qaramastan, PHAJ organı arqalı múrájat etiwi múmkin.
Akt jazıwı basqa PHAJ organında dizimge alınǵan bolsa, arzanı qabıl etken PHAJ organı onı akt jazıwın dizimge alǵan PHAJ organına, “PHAJdıń birden-bir elektron arxivi” málimleme sisteması arqalı orınlaw ushın jiberedi.
Arza beriwshi akt jazıwı dizimge alınǵan PHAJ organına múráját etkende tákirar gúwalıq sol kúnniń ózinde beriledi.
Arzada dizimge alınǵan akt jazıwı haqqında tolıq maǵlıwmatlar bolmaǵanda PHAJ organı arzanı bes kúnnen artıq bolmaǵan múddette kórip shıǵadı.
Áskeriy xızmetti ótep atırǵan shaxslardıń tákirar gúwalıqları áskeriy bólimlerge jiberiledi.
Eger tákirar gúwalıq sorap múrájat etilgen PHAJ organında tiyisli akt jazıwı joq bolsa, PHAJ organı arzanı hám akt jazıwı joqlıǵı haqqındaǵı maǵlıwmatnamanı aymaqlıq ádillik organınıń PHAJ arxivine tiyisli tekseriw ótkeriw hám tákirar gúwalıq beriw ushın jiberedi.
Aymaqlıq ádillik organınıń PHAJ arxivi arzanı alıw menen dáslepki hám tiklengen akt jazıwların tekseredi hám tákirar gúwalıq jiberedi.
Akt jazıwı joq bolsa arza beriwshige tiyisli maǵlıwmatnama jiberiledi.
Tákirar gúwalıq beriw haqqında arza túskende tekseriw arzada kórsetilgen jıl boyınsha, eger sol jılda bolmasa arza ótken hám keyingi 3 jıllar boyınsha tekseriledi.
Tákirar gúwalıq alıwda arza beriwshiniń shaxsın tastıyıqlawshı hújjeti kórsetiliwi kerek.
Eger akt jazıwınıń bazı bir ústinleri toltırılmaǵan bolsa, onday jaǵdayda sızıqlar qoyıladı.
Beriletuǵın gúwalıqlardıń joqarı tárepine “Tákirar” degen belgi qoyıladı.
Tákirar gúwalıqlar berilgenligi ushın mámleketlik bajı hám (ólim haqqındaǵı gúwalıqlardan basqa) gerb jıyımı óndiriledi.
Akt jazıwlarınan nusqalar Ózbekstan Respublikası Ádillik Ministrligi, sud, huqıqtı qorǵaw uyımları, is júritiwde bolǵan múnásibeti menen notariusler, sonday-aq PHAJ organları, ámengerlik hám qáwenderlik uyımları hám Ózbekstan Respublikası konsullıq shólkemleriniń sorawına kóre beriledi (jiberiledi).
Puqaralarǵa akt jazıwlarınan nusqalar beriliwine jol qoyılmaydı.
Zárúr jaǵdaylarda hákimlik, qorǵanıw isleri bólimi, den sawlıqtı saqlaw bólimi, bántlikke kómeklesiw orayı, Ózbekstan Respublikası Prezidenti janındaǵı sociallıq qorǵaw milliy agentliginiń “Insan” sociallıq xızmetler orayınıń wákilleri maǵlıwmatların toplaw, ulıwmalastırıw yáki salıstırıw maqsetinde aymaqlıq ádillik uyımlarınıń ruxsatı menen akt jazıwlarınan ayırım maǵlıwmatlardı kóshirip alıwı múmkin.
Shomanay rayonı ádillik bólimi
PHAJ bólimi 1-dárejeli inspektorı: P.Ibraimova