Янгиликлар
14
Prezident pármanı joybarı keń jámiyetshiliktiń dodalawına qoyıldı
"Ózbekstan - 2030" strategiyasın "Qorshaǵan ortalıqtı qorǵaw hám "jasıl ekonomika" jılında ámelge asırıw boyınsha mámleketlik baǵdarlama hám onı tastıyıqlaw haqqındaǵı Ózbekstan Respublikası Prezidentiniń Pármanı joybarları islep shıǵılıp, keń jámiyetshiliktiń dodalawı ushın www.uzbekistan2030.uz hám regulation.gov.uz veb-saytlarına jaylastırıldı.
Mámleketlik baǵdarlama joybarı xalıqtıń tanısıwı ushın qolaylı hám ıqsham túrde tayarlanǵan bolıp, "Ózbekstan - 2030" strategiyasınıń tiykarǵı baǵdarları kesiminde 2025-jıl ushın ámeliy ilajlar, normativ-huqıqıy hújjetler dizimi hám maqsetli kórsetkishler názerde tutılmaqta.
Bunda, joybarda qorshaǵan ortalıqtı saqlaw hám "jasıl ekonomika" máselelerine tiykarǵı itibar qaratılıwı menen bir qatarda, sociallıq-ekonomikalıq, mámleketlik basqarıw, sud-huqıq, qáwipsizlik hám sırtqı siyasat baǵdarlarında 2025-jılǵa mólsherlengen keń kólemli reformalar da názerde tutılǵan.
Joybar 2025-jıl 22-yanvarǵa shekem keń jámiyetshilik hám ekspertlik dodalawlardan ótkeriledi.
️"Qorshaǵan ortalıqtı qorǵaw hám "jasıl" ekonomika jılı"na mólsherlengen Mámleketlik baǵdarlamanıń tiykarǵı jańalıqları:
Joybar Jáhán bankınıń ulıwma tán alınǵan tómendegi usınısları tiykarında sistemalastırıldı:
máhállelerdiń ekologiyalıq kelbetin jaqsılaw;
xalıqtıń salamatlıǵın jaqsılaw, ekologiyalıq turmıs tárizin qáliplestiriw;
resurslardı únemlew hám ekologiyalıq turaqlılıqtı támiyinlew;
ósimlik hám haywanat dúnyasın saqlaw;
"jasıl ekonomika" principlerin engiziw, ekonomikanı dekarbonizaciyalaw.
Tómendegiler:
joybarda sáwlelengen tiykarǵı wazıypa hám ilajlarda jıl atınan kelip shıǵıp qorshaǵan ortalıqtı saqlaw hám "jasıl ekonomika" máselelerine tiykarǵı itibar qaratılmaqta;
ministrlikler hám uyımlardıń ekologiya tarawındaǵı birinshi gezektegi wazıypaları óz aldına qosımshada belgilenbekte (joybardıń 16-qosımshası);
ekologiya boyınsha xalıqaralıq shártnama hám shólkemler kesiminde ilajlar ayrıqsha qosımshada názerde tutılmaqta (joybardıń 17-qosımshası);
"Jasıl turizm" baǵdarlaması tastıyıqlanbaqta (joybardıń 18-qosımshası);
Baǵdarlamanıń orınlanıwın sapalı hám óz waqtında shólkemlestiriw maqsetinde hár bir bánti boyınsha sherekler kesimindegi maqsetli kórsetkishler hám olarǵa juwapker orınlawshılar belgilenbekte (ámelde jıl juwmaǵı boyınsha);
reformalardıń nátiyjeliligin bahalawdıń pútkilley jańa tártibi kirgizilip, elektron portal arqalı hár bir reformanıń xalıqtıń turmısında sezilgeni boyınsha múnásibet bildiriw imkaniyatı jaratılmaqta (jasıl (joqarı), sarı (qanaatlandırarlı) hám qızıl (qanaatlandırarsız) (bul máseleler Húkimet májilislerinde turaqlı dodalanıp barıladı).
joybar siltemesi:
https://www.uzbekistan2030.uz/uzc/muhokama
https://regulation.adliya.uz/project/4427/7289?contentLang=oz
Párman joybarınıń Qorshaǵan ortalıqtı qorǵaw baǵdarında:
32 qalada xalıq punktlerinde piyada hám velosipedte seyil etetuǵın "Sayalı seyil kósheleri" tarmaǵı jaratıladı (100 milliard swm);
64 máhállede tájiriybe tárizinde jawın hám aqaba suwlardan nátiyjeli paydalanıw, máhállelerdegi tereklerdi zamanagóy suwdı únemleytuǵın texnologiyalar arqalı suwǵarıw sisteması engiziledi (130 milliard swm);
xalıqtıń piyada júriwi hám dem alıwı ushın jaǵa boylarında zárúr infrastrukturanı jaratıwǵa qaratılǵan 80 joybar ámelge asırıladı;
"Bir million jasıl shańaraq" háreketi jolǵa qoyılıp, júriw hám juwırıw, "jasıl" transportta háreketleniw, azıq-awqat ısırapgershiliginiń aldın alıw, energiya resurslarınan aqılǵa say paydalanıw úgit-násiyatlanadı;
"Jasıl isbilermen" platforması iske túsiriledi hám bul isbilermenlerge "Ashıq-aydın qurılıs" sistemasında ústinlik beriw, xalıqaralıq bazarǵa shıǵıwı ushın qollap-quwatlaw sıyaqlı ilajlar kóriledi;
2025-jıldan baslap hár eki jılda bir márte "Oraylıq Aziya Eko Ekspo" xalıqaralıq kórgizbesi shólkemlestiriledi;
2025-jıl 1-sentyabrden baslap jabayı halda ósetuǵın ósimliklerdi jıynaw hám tayarlaw ushın tastıyıqlanǵan kvotalar hám ruxsatnamalar elektron aukcion arqalı beriledi;
"Evro-4" standartınan tómen bolǵan motor janılǵısın satıw sheklenedi hám ıssılıq hám elektr energiyasın islep shıǵarıw kárxanalarında mazuttan paydalanıw sheklenedi.
Párman joybarınıń "Jasıl" ekonomika baǵdarında:
ulıwma quwatlılıǵı 3,5 GVt bolǵan qayta tikleniwshi energiya dáreklerin paydalanıwǵa tapsırıw arqalı olardıń jámi elektr energiyası tutınıwındaǵı úlesi 26 payızǵa jetkeriledi;
shıǵındılardı utilizaciyalaw, samal hám quyash dáreklerinen islep shıǵarılǵan elektr energiyası ushın "jasıl tarifler" engiziledi;
iri kárxanalarda ekologiyalıq, sociallıq hám korporativ basqarıw principleri tiykarında korporativ baǵdarlamalar islep shıǵılıp, altawında ESG esabatı jolǵa qoyıladı ("Nawayıuran," "Ózbekneftgaz," "Nawayı kán-metallurgiya kombinatı," "Almalıq kán-metallurgiya kombinatı,"“Uzairports”, “Uzairways”);
Evropa Awqamınıń qatnasıwında Buxara, Namangan, Nókis, Úrgensh hám Ǵuzarda az uglerodlı rawajlanıw rejeleri islep shıǵılıp, 10 sociallıq obyektlerdiń energiya nátiyjeliligi arttırıladı;
irrigaciya hám melioraciya sistemaları obektlerin qurıw hám rekonstrukciyalaw arqalı 390 mıń gektar awıl xojalıǵı jer maydanlarınıń suw támiyinatı jaqsılanadı;
1,8 mıń km ishimlik hám aqaba suw tarmaqları, 77 ishimlik hám aqaba suw obyektlerin qurıw hám ońlaw támiyinlenedi;
paxta hám ǵálle maydanların qısqartıwdan bosatılǵan keminde 100 mıń gektar jer maydanları diyqan xojalıqların shólkemlestiriw ushın 200 mıń xalıqqa ijaraǵa beriledi;
Usı silteme arqalı joybar dodalawında belsene qatnasıwıńızdı sorap qalamız.
https://www.uzbekistan2030.uz/uzc/muhokama
https://regulation.adliya.uz/project/4427/7289?contentLang=oz
Ministrliktin yuridikalıq xızmetlerdi
muwapıqlastırıw boyınsha
bas másláhátshisi A.Gulimbetov