Янгиликлар
27
Konstituciyada siyasiy huqıqlar
Konstituciyada siyasiy huqıqlar
Mámleketimizde ámelge asırılıp atırǵan reformalardıń tiykarında insan huqıqı hám erkinliklerin, máplerin qorǵaw, olardıń huqıqıy sana-sezimin hám huqıqıy mádeniyatın asırıw eń áhmiyetlisi bolıp esaplanadı. Sebebi, puqaralardıń óz huqıq hám nızamlı máplerin biliwi hám onı turmısta qollayalıwı hám nızamlarǵa ámel etiwi mámlekettiń rawajlanıwı ushın imkániyat jaratadı.
Ózbekstan Respublikası Konstituciyasınıń segizinshi babı siyasiy huqıqlarǵa arnalǵan bolıp, bul huqıqlardı kepilleydi. Bul huqıqlar tómendegilerden ibarat: Ózbekstan Respublikasının puqaraları jámiyet hám mámleket islerin basqarıwda tikkeley hám óz wákilleri arqalı qatnasıw huqıqına iye. Bunday qatnasıw ózin-ózi basqarıw, referendumlar ótkeriw hám mámleketlik uyımlardı demokratiyalıq túrde shólkemlestiriw, sonday-aq, mámleketlik uyımlardıń jumısı ústinen jámiyetlik qadaǵalaw járdeminde ámelge asırıladı. Mámleketlik uyımlardıń jumısı ústinen jámiyetlik qadaǵalawdı ámelge asırıw tártibi nızam menen belgilenedi. (36-statya)
Ózbekstan Respublikasınıń puqaraları mámleketlik xızmetke kiriwde teń huqıqqa iye. Mámleketlik xizmetin ótew menen baylanıslı sheklewler nızam menenbelgilenedi. (37-statya)
Puqaralar ózleriniń jámiyetlik belsendiligin Ózbekstan Respublikası nızamlarına muwapıq mitingler, jıynalıslar hám demonstraciyalar túrinde ámelge asırıw huqıqına iye. Hakimiyat uyımları tek qáwipsizlikti názerde tutqan halda bunday ilajlardıń ótkeriliwin toqtatıw yamasa qadaǵan etiw huqıqına iye. (38-statya)
Ózbekstan Respublikası puqaraları kásiplik awqamlarǵa, siyasiy partiyalarǵa hám basqada jámiyetlik birlespelerge birlesiw, ǵalabalıq háreketlerde qatnasıw huqıqına iye. Siyasiy partiyalarda, jámiyetlik birlespelerde, ǵalabalıq háreketlerde, sonday-aq, mámleketlik hákimiyattıń wákillikli uyımlarında azshılıqtı quraytuǵın oppoziciyalıq shaxslardıń huqıqları, erkinlikleri hám qádirin hesh kim kemsitiwi múmkin emes. (39-statya)
Hár kim tikkeley ózi hám basqalar menen birgelikte mámleketlik uyımlarǵa hám de shólkemlerge, puqaralardıń ózin-ózi basqarıw uyımlarına, lawazımlı shaxslarǵa yamasa xalıq wákillerine arzalar, usınıslar hám shaǵımlar menen múrájat etiw huqıqın aiye. Arzalar, usınıslar hám shaǵımlar nızamda belgilengen tártipte hám múddetlerde kórip shıǵılıwı shartlgi belgilep qoyılǵan.
Taxtakópir rayonı yuridikalıq xızmet
kórsetiw orayı baslıǵı A.Allaniyzov