Янгиликлар
27
Jumıssızlıq napaqası kimlerge beriledi?
Ózbekstan Respublikasınıń 2020-jıl 20-oktyabr kúngi «Xalıqtıń bántligi haqqında»ǵı ÓRN-642 sanlı Nızamına kóre belgilengen tártipte jumıssız dep tabılǵan shaxslar jumıssızlıq napaqasın alıw huqıqına iye.
On altı jastan pensiya támiynatı huqıqın alıw jasına shekem bolǵan, haq tólenetuǵın jumısqa yáki is haqı (miynet dárámatı) keltiretuǵın jumısqa iye bolmaǵan, jumıs izlep atırǵan hám jumıs usınılsa, oǵan kiriwge tayın bolǵan yamasa kásipke tayarlawdan, qayta tayarlawdan ótiwge yaki kásip mamanlıǵın asırıwǵa tayın bolǵan, jumısqa ornalasıwda kómek alıw ushın jergilikli miynet uyımlarına múrájat etken hám usı uyımlar tárepinen jumıs izlep atırǵan shaxslar sıpatında dizimge alınǵan miynetke jaramlı shaxslar (buǵan bilimlendiriw orınlarında bilim alıp atırǵanlar kirmeydi) jumıssız shaxslar dep tán alınadı.
Eger jumıs izlep atırǵan shaxsqa ol dizimge alınǵan kúnnen baslap dáslepki on kún ishinde maqul keletuǵın jumıs usınılmaǵan bolsa yáki jergilikli miynet uyımı usı shaxstı jumısqa ornalastırıw ushın jiberilgen shólkemlerden bas tartıw juwabın alǵan bolsa, shaxstı jumıssız dep tán alıw haqqında qarar ol jumıs izlep atırǵan shaxs sıpatında dizimge alınǵan kúnnen baslap on birinshi kúnnen keshiktirmey jergilikli miynet uyımı tárepinen qabıl etiledi.
Shaxstı jumıssız dep tán alıw haqqındaǵı qarar jergilikli miynet uyımınıń buyrıǵı menen rásmiylestiriledi, usı buyrıq bir waqıttıń ózinde jumıssızlıq napaqasın tayınlaw haqqındaǵı buyrıq esaplanadı. Buyrıqta jumıssızlıq napaqasınıń muǵdarı hám onı esaplaw sánesi kórsetiledi.
Jumıssızlıq napaqası jumıssız dep tán alınǵan shaxsqa ol jergilikli miynet uyımında jumıs izlep atırǵan shaxs sıpatında dizimge alınǵan birinshi kúnnen baslap esaplanadı hám tólep beriledi.
Jumıssızlıq napaqası on eki aylıq dáwir ishinde kóbi menen jigirma altı kalendar hápte dawamında tólep beriledi.
Usı ayda jumıssızlıq napaqasın tólew ótken ay ushın ámelge asırıladı.
Tómendegiler jumıssız dep tán alınbaydı:
- usınılǵan maqul keletuǵın jumıstı jumıs izlep atırǵan shaxs sıpatında dizimge alınǵan kúnnen baslap on kún ishinde keshirimli sebepsiz eki márte bas tartqan shaxslar;
- jergilikli miynet uyımına yaki sociallıq-ekonomikalıq tárepten kompleks rawajlandırıw boyınsha sektorına, puqaralardıń ózin-ózi basqarıw uyımına biriktirilgen jergilikli miynet uyımı xızmetkeri aldına maqul keletuǵın jumıs júzesinen usınıs alıw ushın jumıs izlep atırǵan shaxs sıpatında dizimge alınǵan kúnnen on kún ishinde keshirimli sebepsiz kelmegen shaxslar;
- bilimlendiriw mákemeleri hám shólkemlerinde islep shıǵarıwdan ajıralǵan halda bilim alıp atırǵan shaxslar, buǵan bilimniń sırtqı formasında bilim alıp atırǵanlar kirmeydi;
- nızamshılıqqa muwapıq pensiya támiynatı huqıqına iye bolǵan shaxslar (pensiyanıń hár qanday túrinen pensiya alıwshılar)
- bala eki jasqa tolǵanǵa shekem onıń tárbiyası menen shuǵıllanıp atırǵan, islemey atırǵan hayallar;
- jumısın ózgertpekshi bolǵan, biraq jergilikli miynet uyımlarında dizimnen ótiw waqtında, shólkemlestiriw-huqıqıy formasına qaramastan, shólkemlerde islewshi yáki olardıń shtatında esapta turıwshı shaxslar;
- sudtıń húkimi menen azatlıqtan ayırıw jazasına húkim etilgenler;
- fermer xojalıqlarınıń baslıqları hám xızmetkerleri, shańaraqlıq kárxanalardıń qatnasıwshıları diyxan xojalıqlarınıń baslıqları hám aǵzaları, sonday-aq jeke tártiptegi isbilermenler;
- ózin-ózi bánt etken shaxslar.
Jumıssız dep tán alıwdan bas tartılǵan shaxs usınılǵan jumıstan bas tartqan waqıttan yáki maqul keletuǵın jumıs boyınsha jollama alıw ushın jergilikli miynet uyımına keshirimli sebeplersiz kelmegen waqıttan baslap otız kalendar kún ótkennen keyin ǵana jumıs izlep atırǵan shaxs sıpatında tákraran dizimnen ótiw huqıqına iye.
Kegeyli rayonı ádillik bólimi
Yuridikalıq xızmet kórsetiw orayı
bas yuriskonsultı S.Bazarbaev