Янгиликлар

Birlesken Milletler Shólkeminiń «Korrupciyaǵa qarsı gúresiw haqqında»ǵı Konvenciyası haqqında nelerdi bilemiz?

«Korrupciya» lawazımlı shaxslar tárepinen olarǵa berilgen lawazım wákillikleri hám huqıqlarınan ózleriniń jeke máplerin gózlep nızamshılıq hám ádep-ikramlıq qaǵıydalarına qarsı túrde paydalanıwdı bildiredi.
Korrupciyanıń aldın alıw hám oǵan qarsı gúresiw maqsetinde Birlesken Milletler Shólkemi tárepinen 2003-jıl 31-oktyabr kúni «Korrupciyaǵa qarsı gúresiw haqqında»ǵı Konvenciya qabıl etildi.
Oǵan bola hár bir qatnasıwshı mámleket, óz huqıqıy sistemasınıń tiykarǵı principlerine muwapıq korrupciyaǵa qarsı háreket etiw boyınsha huqıqıy siyasatın islep shıǵadı hám ámelge asıradı yáki alıp baradı.
Bunnan tısqarı hár bir qatnasıwshı mámleket usı Konvenciya qaǵıydalarına muwapıq jınayıy huqıqıy máseleler yaǵnıy korrupciya haqqındaǵı maǵlıwmat toplaw, analiz etiw hám maǵlıwmat almasıw, uslap beriw, tergew isleri, jınayat qıdırıw hám sud islerinde óz ara huqıqıy járdem kórsetiw, jınayıy jol menen tabılǵan mal-múlklerdi qaytarıw boyınsha birge islesiwdi alıp baradı.
Ózbekstan Respublikasınıń 2008-jıl 07-iyul kúngi «Birlesken Milletler Shólkemi-niń «Korrupciyaǵa qarsı gúresiw haqqında»ǵı Konvenciyasına (Nyu-York, 2003-jıl
31-oktyabr) qosılıwı haqqında»ǵı ÓRN-158-sanlı nızamı qabıl etildi.
Nızamǵa bola Ózbekstan Respublikası Korrupciyaǵa qarsı gúresiw agentligi, Bas prokuratura, Ishki isler ministrligi, Mámleketlik qáwipsizlik xızmeti hám Ádillik ministrligi korrupciyanıń aldın alıw boyınsha anıq is-ilajler islep shıǵıw hám olardı ámelge asırıwda basqa qatnasıwshı mámleketlerge járdem kórsetiwi múmkin bolǵan uyımlar sıpatında belgilengen.
Ózbekstan Respublikası Bas prokuraturası óz-ara huqıqıy járdem kórsetiw haqqındaǵı iltimaslardı alıw hám atqarıw yaki bunday iltimaslardı orınlaw ushın Ózbekstan Respublikasınıń basqa wákillikli uyımlarına jiberiwge juwapker bolǵan oraylıq uyım etip belgilengen.


Kegeyli rayonı ádillik bólimi
Yuridikalıq xızmet kórsetiw orayı
bas yuriskonsultı      S.Bazarbaev