Янгиликлар

Korrupciyaǵa tiyisli huqıqbuzarlıqlar

Korrupciya – bul mámleketlik wazıypanı orınlawshı lawazımlı shaxstıń yáki juwapker lawazımlı shaxstıń óz iyelep turǵan lawazımı hám lawazımı menen baylanıslı abıroyınan, múmkinshiliginen jeke baylıq arttırıw maqsetinde, dámegóylik niyetinde bir shaxstıń yaki bir topar shaxslardıń mápin gózlep hákimiyatqa zıyan keltiriwi menen baylanıslı jámiyetke qáwipli qılmıs bolıp esaplanadı.
Ózbekstan Respublikası Jınayat huqıqında korrupciya degende shólkemlesken jınayatshılıq, para alıw, para beriw hám para alıw beriwde dáldalshılıq etiw, sonday-aq, xızmetkerdi para berip ózine qaratıp alıw túrindegi jınayatlar kórsetilgen.
Bulardıń ishinde eń kóp ámeliyatta ushırasatuǵını paraxorlıq jınayatları yaǵnıy, Jınayat kodeksinde 210-statya para alıw, 211- statya para beriw, 212-statya para alıw-beriwde dáldalshılıq qılıw, 213-statya xızmetshini para esesine awdırıw jınayatları esaplanadı.
Bulardan basqa jáne lawazımlı shaxslardıń jınayatı menen baylanıslı bir neshe statyalarda juwapkershilik kórsetilgen. Bular Jınayat kodeksi 205-statya Hákimiyat yáki lawazım wákilliginen paydalanıw, 206-statya hákimiyat yáki lawazım wákilligi shegarasınan shetke shıǵıw, 207-statya lawazımına biyparwalıq penen qaraw, 208 - statya hákimiyat háreketsizligi hám 209-statya lawazım jalǵanlıǵı(soxtakorligi) bolıp esaplanadı.
Paraxorlıq jınayatlarınıń sankciyasında Jınayat kodeksi 210 - statya 1-bólimi boyınsha bazalıq esaplaw muǵdarınıń 50 esesinen 100 esesine shekem muǵdarda járiyma, belgili huqıqtan ayırǵan halda eki jıldan bes jılǵa shekem erkin sheklew yamasa 5 jılǵa shekem erkinen ayırıw jazası, 2-bóliminde bes jıldan on jılǵa deyin, 3-bóliminde on jıldan on bes jılǵa deyin erkinen ayırıw jazası názerde tutılǵan.
Sonday eken joqarıda atap ótilgen jaman illetlerge jol bermey mámleketimizdiń rawajlanıwına úlesimizdi qosıw hár birimizdiń wazıypamız ekenin ańlawımız tiyis.

Qońırat rayonı ádillik bólimi
Yuridikalıq xızmet kórsetiw
orayı bas yuriskonsultı M.Seytbayeva