Янгиликлар

Ózbekstan Respublikası Ministrler Kabinetiniń “Janılǵı-energetika tarawında bazar mexanizmlerin engiziwdiń qosımsha ilajları haqqında”ǵı 204-sanlı Qararınıń mazmun mánisi

---

Elimizde energiya dereklerinen aqılǵa say paydalanıwdı támiyinlew maqsetinde usı jıldıń 16-aprelinde “Janılǵı-energetika tarawında bazar mexanizmlerin engiziwdiń qosımsha ilajları haqqında”ǵı 204-sanlı Ózbekstan Respublikası Ministrler Kabinetiniń Qararı qabıl etildi. Usı Qarar menen energiya derekleri menen baylanıslı bir qatar jańalıqlar eńgizildi.
1. Xojalıq tutınıwshılar ushın sociallıq normalar belgilendi.
Qarar menen, 2024-jıl 1-maydan baslap xojalıq tutınıwshıları ushın tómendegi sociallıq (bazalıq) normalar kirgiziledi:
elektr energiyası – ayına 200 kVtqa shekem;
tábiyǵıy gaz (mart–oktyabr aylarında) – ayına 100 kubometrge shekem;
tábiyǵıy gaz (noyabr –fevral aylarında) – ayına 500 kubometrge shekem.
Geografiyalıq hám klimat shárayatların esapqa alǵan halda, Qaraqalpaqstan Respublikası hám Xorezm wálayatında ısıtıw máwsimi respublikanıń basqa aymaqlarınan parqlı ráwishte oktyabr-fevral ayları dep belgilendi.
2. 2024-jıl 1-maydan jańa tarifler kúshke kiredi
Elektr energiyası ushın
Xojalıq tutınıwshılar ushın tarifler (1 kVt ushın):
— 200 kVtqa shekem – 450 swm (házir 295 swm);
— 201 kVttan 1000 kVtqa shekem – 900 swm;
— 1001 kVttan 5000 kVtqa shekem – 1350 swm;
— 5001 kVttan 10 000 kVtqa shekem – 1575 swm;
— 10 001 kkVttan keyin – 1800 swm.
Awqat tayarlaw ushın oraylasqan halda elektr plitaları menen úskenelengen kóp qabatlı úy-jaylar hám jataqxanalarda jasawshı xojalıq tutınıwshıları belgilengen tariflerdiń 50% muǵdarında tólewde dawam etedi.
Esap-kitaplarǵa kóre bir úyde 11 túrdegi elektr úskeneleri isletilgeninde bir ayda ortasha 180 kVt energiya sarıplanadı.
Tábiyǵıy  gaz ushın:
Isıtıw máwsiminde – noyabr –fevral aylarında xalıq turaq jayları ushın tábiyǵıy gaz tarifleri (1 kubometr ushın, ayına):
— 500 kubometrge shekem – 650 swm (házir 380 swm);
— 501 kubometrden 2500 kubometrge shekem – 1500 swm;
— 2501 kubometrden 5000 kubometrge shekem – 1950 swm;
— 5001 kubometrden 10 000 kubometrge shekem – 2275 swm;
— 10 001 kubometrden keyin – 2600 swm.
Esap-kitaplarǵa kóre bir turaq jayda bir ayda ortasha 500 kub/metr tábiyǵıy gaz isletiledi.
Mart–oktyabr aylarında:
— 100 kubometrge shekem – 650 swm;
— 101 kubometrden 2500 kubometrge shekem– 1500 swm;
— 2501 kubometrden 5000 kubometrge shekem – 1950 swm;
— 5001 kubometrden 10 000 kubometrge shekem – 2275 swm;
— 10 001 kubometrden keyin – 2600 swm.
3. Xalıqqa paydalanılǵan gaz hám elektr haqqındaǵı maǵlıwmatlar hár ayda jiberiledi
2024-jıl 1-iyunnan paydalanılǵan elektr energiyası hám tábiyǵıy gaz boyınsha aylıq maǵlıwmat “bazalıq norma” hám onnan artıq kólemler kesiminde tutınıwshılarǵa jiberiledi.
4. Mútáj shańaraqlarǵa normadan artıq isletilgen elektr hám gaz ushın pul beriledi
Isıtıw máwsiminde (noyabr – fevral aylarında) mútáj shańaraqlarǵa tómendegi kompensaciyalar beriledi:
– noyabrde 270 mıń swm muǵdarında bir mártelik materiallıq járdem;
– elektr hám gaz boyınsha bazalıq normadan asqan bahalar ortasındaǵı parıq kompensaciya etip beriledi:
gaz ushın – ayına bazalıq normadan artıq paydalanılǵan 250 kub metrge shekem;
elektr ushın – ayına bazalıq normadan artıq paydalanılǵan 150 kVt saatqa shekem.
Qaraqalpaqstan Respublikası hám Xorezm wálayatlarındaǵı mútáj shańaraqlar ushın tólemler oktyabr ayınan baslap tólenedi.
Mútáj shańaraqlar sıpatında “Sociallıq qorǵaw birden-bir reestri”sistemasına kirgizilgen shańaraqlar túsiniledi. “Máhálle jetiligi” tárepinen Birden-bir reestrge kirmegen mútáj shańaraqlardıń qosımsha dizimi qáliplestiriledi.
Rayon (qala) hákimlikleri hám máhálleler kesimindegi mútáj shańaraqlardıń qosımsha dizimine ózgeris kirgiziwi múmkin.
5. Mútáj shańaraqlar kompensaciya alıw ushın “Insan” sociallıq xızmetler orayına múrájat etiwi kerek.
Kompensaciya alıwshı mútáj shańaraqlar noyabr – mart aylarında (hár aydıń 15-sánesine shekem) “Insan” sociallıq xızmetler orayları yamasa máhállelerde iskerlik júrgiziwshi sociallıq xızmetkerlerge múrájat etedi.
Bunda, arzada pasport maǵlıwmatları, abonent sanı, hám telefon nomeri kórsetiledi. Arza berilgen aydıń 27-sánesine shekem “Aymaqlıq elektr tarmaqları” AJ, “Hududgazta'minot” AJ menen birgelikte úyreniledi.
Úyreniw nátiyjesi tiykarında kompensaciya pulları arza berilgen aydan keyingi aydıń 27-sánesine shekem mútáj shańaraqlardıń plastik kartasına ótkerip beriledi.
6. Plastik kartası bolmaǵan mútáj shańaraqlarǵa karta biypul ashıp beriledi
Hákimlikler Xalıq bankı menen birgelikte Sociallıq qorǵaw milliy agentligi tárepinen usınılǵan dizimge muwapıq 2024-jıl 1-noyabrge shekem bank plastik kartası bolmaǵan mútáj shańaraqlar wákiline biypul tiykarda plastik kartalar ashıp beriliwin támiyinleydi.

Moynaq rayonı ádillik bólimi
Yuridikalıq xızmet kórsetiw orayı
bas yuriskonsultı        A. Vasyakin.

---