Янгиликлар
20
Bir múrájat izinen
Bir múrájat izinen
Ózbekstan Respublikası Prezidentiniń 2024-jıl 24-may kúngi “Hákimshilik reformalar sheńberinde ádillik uyımları hám mákemeleriniń juwapkershiligin jáne de asırıw hám de ıqsham basqarıw sistemasın qáliplestiriw haqqında”ǵı PP-80 sanlı Pármanına tiykar, Shomanay rayonı ádillik bólimi Mámleketlik xızmetler orayı xızmetkerleri Diyxanabad awıl puqaralar jıyını aymaǵında úyme-úy júrip anıqlanǵan mashqalalar qatarında puqara B.B pensiya muǵdarın esaplawda tiyisli miynet stajları esapqa alınbaǵanlıǵınan narazılıǵın bildirip, miynet stajların qayta esaplawda ámeliy járdem sorap múrájat etti.
Bul múrájat sol jerdiń ózinde dizimge alınıp, ádillik bólimi tárepinen qadaǵalawǵa alındı.
Úyreniw dawamında toplanǵan hújjetlerden puqara B.B 01.12.1980-jıldan 31.12.2015-jıllarda miynet iskerligin alıp barǵanlıǵı haqqındaǵı maǵlıwmatlar puqaranıń miynet dáptershesinde kórsetilgenligi, biraq Byudjetten tısqarı pensiya qorı (keyingi orınlarda BTPQ - dep júritiledi) tárepinen jasqa baylanıslı pensiya tayınlaw ushın jumıs stajın esaplawda miynet stajları tolıq esapqa alınbaǵanlıǵı anıqlandı.
Sonıń menen birge, BTPQ Shomanay rayonı bóliminiń 2024-jıl 30-avgusttaǵı 40-sanlı qararına muwapıq, puqaraǵa tiyisli pensiya isine tiykar 12 jıl 9 ay ulıwma stajları múrájat iyesine is haqı jazılmaǵanlıǵı sebepli esapqa alıwdan bas tartılǵanlıǵı málim boldı.
Ózbekstan Respublikası Konstituciyasınıń 20-statyasında insan menen mámleketlik uyımlarınıń óz-ara múnásibetlerinde júzege keletuǵın nızamshılıqtaǵı bárshe qararma-qarsılıqlar hám boslıqlar insan paydasına sheshiledi dep kórsetilgen.
Ózbekstan Respublikası Miynet Kodeksiniń 125-statyasına muwapıq, lazım dárejede tastıyıqlanǵan qaǵaz yaki elektron formadaǵı miynet dáptershesi xızmetkerdiń miynet stajın tastıyıqlawshı hám fizikalıq shaxstıń miynet iskerligi haqqındaǵı verifikaciya qılınǵan maǵlıwmatlardı óz ishine alǵan tiykarǵı hújjet esaplanadı.
Bunnan tısqarı, ámeldegi Ózbekstan Respublikası “Puqaralardıń mámleketlik pensiya támiynatı haqqında”ǵı Nızamınıń 42-statyasında miynet dáptershesi (elektron miynet dáptershesi) jumıs stajın tastıyıqlawshı tiykarǵı hújjet bolıp tabıladı dep belgilengen.
2005-jıl 1-yanvardan aldınǵı dáwirler ushın jumıs stajı shaxstıń miynet dáptershesinde (elektron miynet dáptershesinde) bar bolǵan jazıwlar tiykarında, tastıyıqlawshı hújjet talap etilmesten belgilenedi dep kórsetilgen.
Joqarıdaǵılardan kelip shıǵıp Shomanay rayonı ádillik bólimi tárepinen Nókis rayonlararalıq hákimshilik sudına BTPQ Shomanay rayonı bóliminiń 2024-jıl 30-avgusttaǵı 40-sanlı qararın haqıyqıy emes dep tabıw hám puqara B.B nıń 12 jıl 9 ay jumıs stajların qosıp, pensiyanı qayta esaplaw minnetlemesin júklew boyınsha shaǵım kirgizildi.
Nókis rayonlararalıq hákimshilik sudınıń sheshiwshi qararına tiykar Shomanay rayonı ádillik bóliminiń puqara B.B nıń mápin gózlep berilgen arzası qanaatlandırılıp, BTPJ Shomanay rayonlıq bóliminiń 40-sanlı qararı haqıyqıy emes dep tabılıp, BTPJ Shomanay rayonlıq bólimine puqara B.B nıń 01.12.1980-jıldan 31.12.2015-jılǵa shekemgi 12 jıl 9 ay islegen dáwirleri jumıs stajına qosıp esaplaw minnetlemesi júkletildi.
Shomanay rayonı
ádillik bólimi MXO bólim baslıǵı Akbar Orazbaev