Янгиликлар
Qaraqalpaqstan Respublikası Konstituсiyası tariyxı hám rawajlanıw basqıshları.
Qaraqalpaqstan Respublikası Konstituсiyası tariyxı hám rawajlanıw basqıshları.
Konstituсiya hár bir mámlekettiń eń joqarı yuridik kúshke iye bolǵan nızamı bolıp esaplanadı. Konstituсiya tiykarında mámlekettiń basqa nızamshılıq hújjetleri qabıl etiledi.
Qaraqalpaqstan Respublikası Konstituсiyası joybarı Qaraqalpaqstan Respublikası Joqarı Soveti tárepinen dúzilgen Konstituсiyalıq komissiya tárepinen islep shıǵılǵan hám 1993-jıl 9-aprel kúni XII shaqırıq XII sessiyasında “Qaraqalpaqstan Respublikası Konstituciyasın qabıl etiw haqqında”ǵı Nızam qabıllandı.
Konstituciyanıń qabıl etiliwi nızam ústemligin támiyinlew, huqıqıy demokratiyalıq mámleket, puqaralıq jámiyet qurıw jolındaǵı áhmiyetli qádem boldı.
Qaraqalpaqstan Respublikası Konstituciyası alǵı sóz, altı bólim, jigirma altı bap, 121-statyadan ibarat. Onıń barlıq statyalarında xalıq aralıq ulıwmalıq atap ótilgen principler, xalıq aralıq huqıq normaları hám ulıwma insanıylıq principler sáwlelengen. Konstituciyanıń alǵı sózinde Qaraqalpaqstan Respublikası Konstituciyasınıń qabıl etiliwiniń maqseti, birinshi bóliminde tiykarǵı principler, ekinshi bóliminde insan hám puqaralardıń tiykarǵı huqıqları, erkinlikleri hám minnetlemeleri, úshinshi bóliminde jámiyet hám shaxs, tórtinshi bólim hákimshilik aymaqlıq dúzilis, besinshi bóliminde mámleketlik hákimiyattı shólkemlestiriliwi, altınshı bóliminde Konstituciyaǵa órgeris kiritiw tártibi belgilengen.
Konstituciyada belgilengen princip hám normalar bazar ekonomikasına tiykarlanǵan huqıqıy demokratik mámleket hám puqaralıq jámiyetin qurıwda hám puqaralardıń huqıq ham erkinliklerin támiyinlewde bekkem tiykar bolıp xızmet etedi.
Keyingi jıllarda mámleketimizde mámleket hám jámiyet rawajlanıwı, sud huqıq tarawında keń kólemli reformalar ámelge asırılmaqta, áne usınday reformalar nátiyjesinde Konstituciyamızǵa 1994, 1995, 1997, 2003, 2014, 2019 (29-iyun hám 16-dekabrde) hám 2021-jıl 12-fevral kúni ózgeris hám qosımshalar kirgizilgen.
Nızam ústemligi, nızamshılıq hújjetlerinde kórsetilgen normalardıń sózsiz orınlanıwın támiyinlew hár birimizdiń tiykarǵı wazıypamız bolıwı lazım.
Shomanay rayonı ádillik bólimi
Insan huqıqların qorǵaw hám huqıqtı qollaw
ámeliyatın úyreniw bólimshesi bas másláhátshisi