Янгиликлар
28
ÁMENGERLIKKE HÁM QÁWENDERLIKKE ALÍW TÁRTIBI
ÁMENGERLIKKE HÁM QÁWENDERLIKKE ALÍW TÁRTIBI
Perzentler ata-anasınıń qaramaǵında bolıp er jetiwine ne jetsin. Biraq ómirde hámme nárse bolıwı múmkin. Qandayda bir sebep penen balasın waqtınsha qaldırıp, uzaqqa ketken ata-analardıń perzenti yaki ata-ana qaramaǵınan ayrılǵan balalar ushın qáwenderlik hám ámeńgerlik ámeliyatı qollanıladı.
Ámengerlik -14 jasqa tolmaǵan jetim balalardı hám ata-anasınıń qaramaǵınan ayrılǵan balalardı, olardı támiyinlew, tárbiya hám bilim beriw, múlkiy hám jeke múlkiy emes huqıqları hám nızamlı máplerin qorǵaw maqsetinde tayınlanıwdıń huqıqıy túri.
Qáwenderlik -14 jastan 18 jasqa shekem bolǵan jetim balalardı hám ata-anasınıń qaramaǵınan ayrılǵan balalardı, olardı támiyinlew, tárbiya hám bilim beriw, múlkiy hám jeke múlkiy emes huqıqları hám nızamlı máplerin qorǵaw maqsetinde tayınlanıwdıń huqıqıy túri. Qáwenderlik salamatlıǵı sebepli, erkin ráwishte óz huqıqların ámelge asıra almaytuǵın hám óz májbúriyatların orınlay almaytuǵın er jetken puqaralarǵada belgileniwi múmkin.
Eger ata-ana jasaw jayında waqtınsha bolmasa, bala olar tárepinen altı aydan artıq múddetke, aǵayinleriniń yamasa basqa jaqınlarınıń qáwenderliginde yaki ámeńgerliginde hám baqlawında qaldırılıwı múmkin.
Ata-ana jasaw jayında altı aydan kem múddette waqtınsha bolmaǵanda, qáwenderlik hám ámengerlik eger bul balanıń mápleri ushın zárúr bolsa, belgilenedi.
Ámengerlik hám qáwenderlik rayon, qala hákiminiń qararı menen belgilenedi.
Bunıń ushın rayon (qala) hákimligine tómendegi hújjetlerdi usınıw kerek:
1. Balanıń familiyası, atı, ákesiniń atı, jasaw jayı, balanı ámengerlikke hám qáwenderlikke qaldırıw múddetleri hám tiykarları kórsetilgen ata-ananıń arzası;
2. Ámenger hám qáwender bolıwdı qálewshı shaxslardıń familiyası, atı, ákesiniń atı, jasaw jayı, nekede turǵanlıǵı, erli-zayıplınıń birge yamasa olardıń bólek jasawı, shańaraqta perzentler bolsa-olardıń sanı hám jası, ámengerlik hám qáwenderlikke alınıwshınıń familiyası, atı, ákesiniń atı, jası, ámengerlik hám qáwenderlikke alıw tiykarları kórsetilgen arzası;
3. Shaxsın tastıyıqlawshı hújjeti,
4. Nekede turǵan shaxslar tárepinen ámengerlik hám qáwenderlikke alınǵanda ámenger hám qáwender bolıwdı qálewin bildirgen shaxstıń neke dúzilgenligi haqqında gúwalıq nusqası;
5. Jumıs ornınan alınǵan usınısnama;
6. Ámenger hám qáwender bolıwdı qálewin bildirgen shaxslardıń salamatlıǵı haqqındaǵı medicinalıq mekemesiniń juwmaǵı.
Kegeyli rayonı ádillik bólimi
PHAJ bólimi baslıǵı I.Erjanova