Янгиликлар
26
Jańa konstituciya-jańa imkaniyatlar
Jańa konstituciya-jańa imkaniyatlar
2023-jıl 30-aprelde qabıl etilgen jańa redakciyadagi Konstituciya insánlardıń qaysı máplerin qorǵay aladı hám qanday payda bere aladı? Bul soraw xalqımızdı qızıqtırıwı tabiyǵıy. Derlik 60% statyalarǵa ózgeris kiritilip, kóplep normalar qosılǵan jańa Konstituciyada mámleket basqarıwı, sud sisteması, puqaralıq jámiyet institutlarınan tısqarı fizikalıq shaxslarǵa hám olardı qıynap kiyatırǵan mashqalalarǵa da toqtap ótilgen.
Atap aytqanda, Konstituciyanıń 52-statyasında oqıtıwshılar haqqında aytıp ótilgen. Bul waqıya úlken áhmiyetke iye, sebebi bunnan aldın Konstituciyada tek huqıq tarawı wákilleri ǵana tilge alınǵan bolsa (sudya,prokuror,advokat), jańa redakciyada ustazlardıń tilge alınıwı olarǵa bolǵan itibar Konstituciya dárejesinde ulıǵlanǵanın kóriwimizge boladı.
Bunnan tısqarı kóplep jıllardan beri xalqımızdi náriyza qılıp kiyatırǵan jaǵdaylardan biri "snos" esaplanadı. Jaqın kúnlerge shekem snosqa túsken úyler esh qanday razı-rızalıqsız buzılǵan. Durıs, kompensaciya tólemleri berilgen, bıraqta bul buzılǵan úydin summasınıń haqıyqıy bahasınan tómen bolıw kóplep ushırasqan. Al jańa Konstituciya qabıl etilgeninen soń bul mashqalaǵa tereńirek itibar berilip, endi úy iyesiniń ruqsatısız turaq-jay binalarinin buzılıwı qadaǵalawga alındı.
Prezidentimiz 2022-jıl 20-iyundaǵi Konstituciyalıq komissiya aǵzaları menen ushırasıwındaǵı sózinde Konstitutciyamızda puqaralarımızdıń úy-jayǵa bolǵan huqıqların qorǵaw onıń qol qatılmaslıǵın kepillew xalıqtıń bárshe qatlamları, ásirese mútaj taypalardı úy-jay menen támiynlew boyınsha mámlekettiń majbúriyatların bekkemlew zarúrligine óz aldina itibar qaratqan edi.
Sonıń menen birgelikte jer nızamda názerde tutılǵan tárizde onnan tuwrı paydalanıwdı hám onı ulıwma milliy baylıq sıpatında qorǵawdı támiynlewshi shártler tiykarında hám tártibinde jeke múlik bolıwı múmkinlıgı belgilendi.
Aldın puqaralarǵa tiyisli úy-jaylar jaylasqan jer uchastkaları yaki miyras qılıp qaldırılǵan ómirlike iyelik qılıw huqıqındaǵi jerlerge turaqlı paydalanıw huqıqı beriletuǵın bolǵan. Yaǵnıy obiekt sizge tiyisli bolsa da onıń jeri sizge tiyisli emes edi. Usı jer uchastkaların menshiklestiriw ushın endi fizikaliq hám hátteki yuridik shaxslar da Mamleketlik xizmetler orayı yáki Yagona davlat interaktiv portalı (my.gov.uz) ga múrájat etiwi mumkin.
Kórip turǵanıńızday jańa redakciyadaǵı Konstituciyamızda xalıqımızdıń mashqalaların sheshiw hám olardıń mápin gózlew ushın dıqqatqa ılayıq jańalıqlar islep shıǵılǵan hám ámelde olardıń gúwası bolmaqtamız.
Nókis rayonı ádillik bólimi
Yuridikalıq xizmet kórsetiw orayı
bas Yuristkonsultı A.Dauletbaeva