Янгиликлар
22
Miynet nızamshılıǵında hayal-qızlarǵa berilgen jeńillikler
Miynet nızamshılıǵında hayal-qızlarǵa berilgen jeńillikler
Ózbekstan Respublikasınıń miynet nızamshılıǵında hayal-qızlar ushın bir qatar jeńillikler hám kepillikler belgilengen.
- Hámiledar yamasa balası bar bolǵanı menen baylanıslı sebeplerge kóre hayallardı jumısqa qabıllawdan bas tartıwǵa hám olardıń is haqısın kemeytige jol qoyılmaydı.
- Hámiledar hayallardı hám on tórt jasqa tolmaǵan balası (on altı jasqa tolmaǵan mayıp balası) bar hayallardı olardıń razılıǵısız túngi jumıslarǵa, jumıs waqtınan tısqarı jumıslarǵa, demalıs kúnlerindegi jumıslarǵa tartıwǵa hám xızmet saparına jiberiwge jol qoyılmaydı. Usınıń menen birge, hámiledar hayallardı hám úsh jasqa tolmaǵan balası bar hayallardı túngi jumıslarǵa tartıwǵa bunday jumıs ana hám balanıń den sawlıǵı ushın qáwip tuwdırmawın tastıyıqlawshı medicinalıq juwmaq bolǵan jaǵdayda jol qoyıladı.
- Úsh jasqa tolmaǵan balaları bar, byudjet shólkemlerinde islep atırǵan hayallar ushın háptesine 35 saattan aspaǵan qısqartılǵan jumıs waqtı belgilenedi.
- Hámiledar hayaldıń, on tórt jasqa tolmaǵan balası (on altı jasqa tolmaǵan mayıp balası) bar hayaldıń, sonday-aq qáwenderliginde sonday balası bar hayaldıń sorawı menen jumıs beriwshi medicinalıq juwmaqqa tiykar olarǵa tolıqsız jumıs kúnin yamasa tolıqsız jumıs háptesin belgilewi tiyis.
- Múddetli áskeriy xızmetti ótep atırǵan áskeriy xızmetkerlerdiń hayallarına jıllıq miynet demalısı, olardıń qálewine kóre jaz waqtında yamasa olar ushın qolay bolǵan basqa waqıtta beriledi.
- On eki jasqa tolmaǵan eki hám odan artıq balası yamasa on altı jasqa tolmaǵan mayıp balası bar hayallarǵa hár jılı tórt kalendar kúninen kem bolmaǵan múddet penen is haqı saqlanǵan halda qosımsha demalıs alıwǵa haqlı.
- Eki jasqa tolmaǵan balası bar hayallarǵa, demalıw hám awqatlanıw ushın beriletuǵın tánepisten tısqarı, balanı awqatlandırıw ushın qosımsha tánepisler de beriledi. Bul tánepisler keminde hár úsh saatta bir ret hár biri otız minuttan kem bolmaǵan múddet penen beriledi. Eki jasqa tolmaǵan eki hám odan artıq balası bolǵan jaǵdayda keminde bir saat tánepis beriledi. Balanı awqatlandırıw ushın beriletuǵın tánepisler jumıs waqtına kirgiziledi hám ortasha aylıq is haqı esaplanadı. Balanı awqatlandırıw ushın beriletuǵın tánepisler xızmetkerdiń demalıwı hám awqatlanıwı ushın belgilengen tánepiske qosıp beriliwi yamasa ulıwmalastırılıp jumıs kúniniń (smenasınıń) basına yamasa aqırına kóshirilip, jumıs kúni (smenası) soǵan muwapıq qısqartılıwı múmkin.
- Hámledar hayallar hám úsh jasqa tolmaǵan balası bar hayallar menen dúzilgen miynet shártnamasın jumıs beriwshiniń baslaması menen biykarlawǵa jol qoyılmaydı, kárxananıń pútkilley saplastırılıwı bunnan tısqarı, bunday jaǵdaylarda miynet shártnaması olardı álbette jumısqa jaylastırıw shárti menen biykar etiledi. Usı hayallardı jumısqa jaylastırıwdı jergilikli miynet organı olardı jumısqa jaylastırıw dáwirinde nızam hújjetlerinde belgilengen tiyisli sociallıq tólemler menen támiyinlegen halda ámelge asıradı.
Nókis qalası Yuridikalıq xızmet kórsetiw orayı
bas yuriskonsultı G.Dauletova