Янгиликлар
20
Korrupciya- eń awır hám aqıbeti ayanıshlı illet.
Korrupciya- eń awır hám aqıbeti ayanıshlı illet.
Korrupciya-shaxstıń óz lawazım yaki xızmet dárejesinen paydalanıp jeke máplerdi yamasa ózge shaxslardıń máplerin kózlep materiallıq yaki materiallıq emes payda alıw maqsetinde nızamǵa qarsı ráwishte paydalanıwı, sonday-aq, bunday paydanı nızamǵa qarsı ráwishte beriw. Korrupciya-bul pútkil jer júzinde eń awır hám aqıbeti ayanıshlı illet. Sebebi korrupciya hár qanday mámlekettiń rawajlanıwına tosqınlıq etip, onıń dúnya jámiyetshiligindegi abıroyına keri tásirin tiygizedi. Eń ashınarlısı korrupciya sebepli puqaralardıń mámleketlik basqarıw uyımlarına bolǵan isenimi sónedi. Búgingi kúnge shekem korrupciyaǵa qarsı gúresiw dúnya mámleketlerinde global máselelerden biri bolıp kelgen.
Sebebi social-ekonomikalıq tarawdıń jetilisip barıwı hám ekonomikanıń rawajlanıwına qaramay, házirgi waqıtta paraxorlıq, dámegóylik illetine dúnyadaǵı hesh bir mámlekette pútkil shek qoyılǵan emes.
Hár bir mámlekettiń nızamshılıǵında paraxorlıq sociallıq qáwipli illet sıpatında qaralanadı hám bunıń ushın jınayıy juwapkershilik belgilengen. Korrupciyanıń jámiyet hám mámleket ushın jetkeretuǵın zıyanı bárshemizge málim. Sonıń menen birge, korrupciya-tek ǵana belgili bir materiallıq zatlardı yaki múlkiy huqıqlardı alıw túsinilmesten, materiallıq zatlardı yaki múlkiy huqıqlardı beriw yaki xızmetkerdi materiallıq zatlar yaki múlkiy huqıqlar esesine óz mápleri ushın awdırıp alıw da juwapkershilikke alıp keliwi múmkin.
Xalqımızdıń huquqıy sanası hám mádeniyatın asırıw, jámiyette korrupciyaǵa qarsı múnásibetti qáliplestiriw, korrupciya, oǵan imkan beretuǵın dereklerdi anıqlaw hám oǵan óz waqtında shek qoyıw mámleket, jámiyet turmısınıń barlıq tarawlarındaǵı eń baslı wazıypa bolıp tabıladı. Búgingi kúnde mámleketimizde huqıqıy demokratiyalıq mámleket qurıw jolında korrupciya sıyaqlı zıyanlı illetlerge qarsı gúresiw áhmiyetli wazıypalardan biri sanaladı.
Bul illetke shek qoyıw hám qarsı gúresiw jámiyetimizde jasap atırǵan hár bir shaxstıń mashqalası esaplanadı. Bunıń ushın jámiyetimizdegi hár bir shaxstıń huqıqıy sanası hám bilimi, mádeniyatı joqarı bolıwı talap etiledi.
Qaraózek rayonı Ádillik bólimi
Mámleketlik xızmetler orayı bólim baslıǵı: A.Dosımbetov