Янгиликлар
26
Tema: Ólimdi dizimge alıw haqqında
Tema: Ólimdi dizimge alıw haqqında
Sońǵı jıllarda respublikamızda norma dóretiwshiligi iskerligi sapasın jaqsılaw, ámelge asırılıp atırǵan reformalardıń institutsional-huqıqıy bazasın jańalaw, gónergen hám óz áhmiyetin joǵaltqan normalardı biykarlaw boyınsha keń kólemli jumıslar ámelge asırılmaqta.
Usınıń menen birge, nızamshılıqtaǵı sistemalı ózgerisler menen baylanıslı jedel rawajlanıw tártipke salıw jugin kemeytiw, tarqaq halda tártipke salınıp atırǵan social qatnaslardı sistemalastırıw boyınsha anıq ilajlar islep shıǵıwdı talap etpekte.
Milliy nızamshılıq bazasın artıqsha normativlik-huqıqıy hújjetlerden erkin etiw, onıń sistemalılıǵın támiyinlew, huqıqtı qóllaw ámeliyatında yuridikalıq tásir kúshine iye bolmaǵan hújjetlerdi bıykarlaw, sonıń menen birge, Ózbekstan Respublikası Prezidentiniń «Milliy nızamshılıq bazasın kompleks sistemalastırıw ilajları haqqında»ǵı 2021-jıl 30-apreldegi PP-6218-sanlı Pármanı orınlanıwın támiyinlew maqsetinde, Ózbekstan Respublikası Ministrler Kabinetiniń 2023-jıl 20-oktyabr kúngi “Neke, shańaraq hám puqaralıq jaǵdayı aktlerin dizimge alıw salasındaǵı normativlik-huqıqıy hújjetlerdi sistemalastırıw haqqında”ǵı 550-sanlı qarar qabıl etildi.
Qarardıń 3-qosımshası 7-bapta Ólimdi dizimge alıw dep belgilengen bolıp bunda:
Ólimdi dizimge alıw, qaytıs bolǵan adamnıń turaqlı (waqtınsha ) dizimnen ótken jayınnan qaramastan, PHAJ organı tárepinen ámelge asırıladı.
Ólimdi dizimge alıw haqqındaǵı arza ólim haqqındaǵı medicinalıq maǵlıwmat berilgennen keyin 3 kúnnen keshiktirmiy beriliwi.
Ólimdi dizimge alıw haqqında qaytıs bolǵan adamnıń tuwısqanları hám jaqın insanları, sonıń menen birge medicinalıq shólkem administraciyası múrájáát etiwleri múmkin, olar ólim haqqında medicinalıq maǵlıwmat usınıs etedi.
Eger jas óspirim qaytıs bolǵan shaxsqa qarata PHAJ organında tuwılǵanlıq haqqındaǵı akt jazıwı jazılmaǵan bolsa, qaytıs bolǵan shaxsqa tuwılǵanlıq haqqında akt jazılıp, bul haqqında arza bergen shaxsqa maǵlıwmatnama beriledi, sonnan keyin qaytıs bolǵan shaxsqa qarata belgilengen tártipte ólim haqqındaǵı akt jazıwı jazıladı.
Ólimdi dizimge alıwda usınıs etilgen medicinalıq maǵlıwmat yamasa suddıń puqaranı qaytıs bolǵan dep járiyalaw haqqındaǵı sheshiwshi qararı akt jazıwına qıstırıp qóyıladı.
Shetellik puqaralar hám puqaralıǵı bolmaǵan shaxslardıń ólimin dizimge alıw ulıwma tiykarlarda ámelge asıriladı.
Shetelde qaytıs bolǵan Ózbekstan Respublikası puqarasınıń ólimin dizimge alıw marhum jasap turǵan yamasa ólim júz bergen orındaǵı Ózbekstan Respublikasınıń konsullik shólkemi tárepinen ámelge asıriladı.
Eger ólimdi dizimge alıw qaytıs bolǵan adamnıń jasaw ornınan basqa okrugda ámelge asırılsa, bul jaǵdayda ólimdi belgilegen konsullik shólkemi marhum esapta turǵan konsullik shólkemine onıń famılıyası, atı, ákesiniń atı, ólgen sánesi, sonıń menen birge ólim haqqındaǵı akt jazıwınıń nomeri hám ólim belgilengen orın hám sáne kórsetilgen xabarnama jiberedi.
Eger ólimdi dizimge alıwda qaytıs bolǵan adamnıń qáwendersiz qalǵan jas óspirim balaları bar ekenligi málim bolsa, ol halda konsul sol kúnniń ózinde bul haqqında Ózbekstan Respublikası Sırtqı isler ministrligine xabar beredi.
Jazanı orınlaw mákemelerinde qaytıs bolǵan adamlardıń ólimin dizimge alıw usı shólkem administraciyasınıń xabarına tiykar PHAJ organı tárepinen ámelge asırıladı.
Suddıń puqaranı qaytıs bolǵan dep járiyalaw haqqındaǵı sheshiwshi qararı tiykarında hám ólimi nızamshılıqta belgilengen múddetlerde dizimge alınbaǵan shaxslardıń ólimin dizimge alıw PHAJ organı tárepinen ulıwmalıq tiykarlarda ámelge asırıladı.
Ólimdi dizimge alıwda 16 jasqa shekem qaytıs bolǵanlardıń tuwılǵanlıq haqqındaǵı gúwalıǵı usınıs etiledi. Bunda PHAJ organı xızmetkeri (konsul) gúwalıqǵa ólim haqqındaǵı akt jazıwınıń nomeri hám sánesin jazadı.
Qaytıs bolǵanlardıń tuwılganlıq haqqındaǵı gúwalıqları hár sherekte bir ret, akt tiykarında joq etiledi.
Ólim haqqındaǵı akt jazıwı jazılǵannan soń arza beriwshige ólim haqqında gerbli gúwalıq hám qábiristanǵa usınıw ushın tiyisli úlgindegi málimleme beriledi.
Ózbekstan Respublikası Prezidenti janındaǵı Social qorǵaw milliy agentliginiń (keyingi orınlarda - Social qorǵaw milliy agentligi) «Birden-bir milliy social qorǵaw» informaciya sisteması tárepinen arza beriwshige belgilengen tártipte tiyisli pensiya tayınlanıwı ushın «PHAJdıń birden-bir elektron arxivi» informaciya sisteması arqalı xabarnama jiberiledi.
Eger «PHAJdıń birden-bir elektron arxivi» informaciya sistemasında qaytıs bolǵan shaxstıń tuwılǵanlıq haqqındaǵı akt jazıwı boyınsha maǵlıwmat bar bolsa, onıń qaytıs bolǵanlıǵı haqqındaǵı maǵlıwmat «Belgiler ushın» ústinine kiritiledi.
Ólim haqqındaǵı akt jazıwların qayta tiklew rayon hám qala sudınıń qararına kóre ámelge asırıladı. Eger sud qararında qaytıs bolǵan adamnıń ólgen sánesi kórsetilmegen bolsa, bul jaǵdayda sud qararı kúshke kirgen sáne qaytıs bolǵan adamnıń ólgen kúni esaplanadı.
Shaxsı anıqlanbaǵanlardıń ólimin dizimge alıw den sawlıqtı saqlaw sisteması medicinalıq shólkeminiń ólim haqqındaǵı medicinalıq málimlemesine tiykarlanıp sol shólkem jaylasqan aymaqtaǵı PHAJ organı tárepinen ámelge asırıladı.
Bunday jaǵdaylarda ólim haqqındaǵı akt jazıwındaǵı barlıq maǵlıwmatlar ólim haqqındaǵı medicinalıq málimleme tiykarında kórsetiledi hám tek qábiristanǵa usınıw ushın málimleme beriledi.
Ólim haqqındaǵı gerbli gúwalıq tek akt jazıwındaǵı jetispiy atırǵan maǵlıwmatlar toltırılǵannan keyin ǵana beriledi.
PHAJ organı qosımsha medicinalıq málimleme yamasa ólini tanıp alǵanlıǵı haqqındaǵı prokuraturanıń xabarnamasın alǵannan keyin, akt jazıwına jetispey atırǵan maǵlıwmatlardı kiritedi hám akt jazıwınıń ekinshi nusqasına zárúr ózgerisler kirgiziw ushın aymaqlıq ádillik organınıń PHAJ arxivine xabarnama jiberedi, akt jazıwı bir nusqada belgilengen jaǵdaylar bunnan tısqarı.
Taxtakópir rayonı Yuridikalıq xızmet kórsetiw orayı bas yuristkonsultı J.S.Pirnazarov