Янгиликлар
16
Jer qatnasıqların tártipke salıwshı nızamshılıqtaǵı jańalıqlar
Jer qatnasıqların tártipke salıwshı nızamshılıqtaǵı jańalıqlar
Sońǵı jıllarda jer menen baylanıslı múnásibetlerdi nátiyjeli tártipke salıw, jerlerdi qorǵawdı jetilistiriw, jerge baylanıslı dawlardıń aldın alıw, bul boyınsha puqara hám yuridikalıq shaxslardıń huqıqları hám nızamlı máplerin qorǵawdı jánede jetilistiriw, sonday-aq jer tarawındaǵı huqıqbuzarlıqlar ushın juwapkershilikti kúsheyttiriwge baylanıslı áhmiyetli nızamshılıq hújjetleri qabıl qılındı.
Buǵan mısal retinde Ózbekstan Respublikası Prezidentiniń 2021-jıl 8-iyun kúngi «Jer múnásibetlerinde teńlik hám ashıqlıqtı támiynlew, jerge bolǵan huqıqlardı isenimli qorǵaw hám olardı bazar aktivine aylandırıw is-ilájları haqqında»ǵı PP-6243-sanlı Pármanın keltiriw múmkin.
Sebebi, usı Párman menen jer uchastkaların ajıratıwdıń hámme ushın teń, ashıq hám bazar prinsiplerine tiykarlanǵan tártibin engiziw, jerge baylanıslı múlkiy hám huqıqıy múnásibetlerde turaqlılıqtı támiynlew , jerlerdi qorǵaw hám jer iyeleriniń múlkiy huqıqların kepillewdiń jańa huqıqıy tiykarı jaratıldı.
Oǵan kóre, awıl xojalıǵına mólsherlenbegen jerler múlk huqıqı hám ijara huqıqı tiykarında elektron onlayn-aukcion arqalı realizaciya qılınıwı belgilendi, sonday-aq, 2021 jıldıń 1 avgust kúninen baslap jergilikli mámleketlik hákimiyatı uyımlarınıń jer múnásibetlerine baylanıslı sheshim, biylik yamasa basqa túrdegi hújjet qabıl qılıw huqıqı biykar qılındı.
Ózbekstan Respublikasınıń 2021-jıl 16-avgust kúngi “Jer uсhastkaların ajıratıw hám olardan paydalanıw, sonday-aq jerlerdi esapqa alıw hám mámleketlik jer kadastrın júritiw sistemasın jetilistiriliwi múnásibeti menen Ózbekstan Respublikasınıń ayrım nızam hújjetlerine ózgeris hám qosımshalar kiritiw haqqında”ǵı 708-sanlı nızamına muwapıq, Ózbekstan Respublikasınıń Jer kodeksinede bir qatar ózgeris hám qosımshalar kiritildi.
Atap aytqanada, usı kodekstiń 23-statyası jańa redakсiyada qabıl qılınıp, usı statyanıń ekinshi bólimi 1-bántinde jer uсhastkaların beriw (realizaciya qılıw) yaǵnıy, múlk qılıp beriw — awıl xojalıǵına mólsherlenbegen jer uсhastkaların menshiklestiriw haqqındaǵı nızamshılıqqa muwapıq, sonday-aq jeke tártipte úy-jay qurıw hámde úy-jaydı abadanlastırıw, isbilermenlik hám qala qurılısı iskerligin ámelge asırıw ushın elektron onlayn-aukcion arqalı ámelge asırıw belgilendi.
Joqarıdaǵı nızam menen Ózbekstan Respublikasınıń Jer kodeksiniń 27-statyası da jańa redakсiyada qabıl qılındı. Oǵan kóre, Ózbeksatan Respublikası puqaralarına jeke tártipte úy-jay qurıw hám úy-jaydı abadanlastırıw ushın 0,04 gektarǵa shekem jer uсhastkaları elektron onlayn-aukcion arqalı múlk huqıqı tiykarında realizaciya qılınadı.
Kirgizilgen usı ózgeriske muwapıq, Jer kodeksi 27-statyasınıń aldınǵı redakсiyada belgilengen, yaǵnıy Ózbekstan Respublikası puqaralarına jeke tártipte úy-jay qurıw hám úy-jaydı abadanlastırıw ushın miyras qılıp qaldırılatuǵın ómirlikke iyelik qılıwǵa hár bir shańaraqqa 0,06 gektarǵa shekem jer uсhastkaları beriw tártibi biykar qılındı.
Bunnan tısqarı, Jer kodeksiniń 6-statyasında názerde tutılǵan rayon (qala) hákimleriniń jet múnásibetlerine baylanıslı ayırım wákillikleri, atap aytqanda puqaralarǵa, yuridikalıq shaxslarǵa iyelik qılıwǵa, paydalanıwǵa hám ijáraǵa jer beriw, sonday-aq jerlerdi alıp qoyıwǵa baylanıslı wákillikleri biykar qılındı.
Sonday-aq, 2021-jıl 15-noyabr kúni Ózbekstan Respublikasınıń “Awıl-xojalıǵına mólsherlenbegen jer uchastkaların menshiklestiriw haqqında”ǵı Nızamı qabıl qılındı. Usı nızamnıń 3-babında turaqlı paydalanıw (iyelik qılıw), ijára yamasa miyras qılıp qaldırılatuǵın ómirlikke iyelik qılıw huqıqları tiykarında tiyisli bolǵan jer uchastkaların menshiklestiriw tártibi belgilengen. Oǵan kóre, Ózbekstan Respublikasınıń puqarası tárepinen — jeke tártipte úy-jay qurıw hám úy-jaydı abadanlastırıw, sonday-aq isbilermenlik hámde qala qurılısı iskerligin ámelge asırıw ushın ózine berilgen hám miyras qılıp qaldırılatuǵın ómirlikke iyelik qılıw, turaqlı paydalanıw hám ijára huqıqı tiykarında ózine tiyisli bolǵan jer uchastkaları boyınsha menshiklestiriw haqqında arza beriledi. Jer ushastkasına bolǵan turaqlı paydalanıw (iyelik qılıw), miyras qılıp qaldırılatuǵın ómirlikke iyelik qılıw yamasa ijára huqıqı tiyisli ráwishte Ózbekstan Respublikasınıń yuridikalıq hám fizikalıq shaxslarına ótkende olarǵa usı jer uchastkasın menshiklestiriwge bolǵan huqıq ta birge ótedi. Arza mámleketlik xızmetleri orayları yamasa Ózbekstan Respublikası Jalǵız (Yagona) interaktiv mámleketlik xızmetleri portalı arqalı beriledi. Arzaǵa qosımsha qılınatuǵın hújjetler dizimi Ózbekstan Respublikası Ministrler Kabineti tárepinen belgilenedi. Arza jer ushastkasın menshiklestiriw haqqındaǵı máseleni kórip shıǵıw ushın tiykar boladı. Arzanı kórip shıǵıw jer uchastkaların menshiklestiriw boyınsha mámleketlik xızmetler kórsetiwge baylanıslı hákimshilik reglamentke muwapıq avtomatlastırılǵan xabar sistemasınan paydalanǵan halda ámelge asırıladı.
Shımbay rayonı ádillik bólimi
yuridikalıq xızmet kórsetiw
orayı bas yuriskonsultı D.T.Yerjanov