Янгиликлар
08
Korrupciyaǵa qarsı gúresiw dáwir talabı
Korrupciyaǵa qarsı gúresiw dáwir talabı
Házirgi kúnde jer júzilik kólemde sheshiliwi lazım bolǵan eń birinshi gezektegi máselelerdiń biri bul – korrupciya mashqalası bolıp esaplanadı.
Korrupciya – bul jámiyetimizge hám kúndelikli turmısımızǵa túrli júrli jollar menen qáwip tuwdırıwshı illet bolıp, ol demokratiya hám nızam ústemligine zıyan jetkeredi, insan huqıqları buzılıwına, nızamshılıqtıń izden shıǵıwına alıp keliwi menen birge, bazar ekonomikasınıń rawajlanıwına kesent etip, hár qanday mámlekettiń óziniń aldına qoyǵan belgilengen maqsetlerine erisiwine, insanlardıń ómir sıpatınıń jamanlasıwına hámde qáwipsizligine qáwip tuwdıratuǵın unamsız halatlardıń payda bolıwına sebepshi boladı.
Bul bolsa óz gezeginde, hár-qanday insanda, ol ápiwayı puqara yamasa lawazımlı shaxs bolsın, olarda mámleketke hámde nızam ústemligine bolǵan isenimniń joǵalıwına alıp keledi. Nátiyjede lawazımlı shaxslardıń para alıwı, tanıs-bilisshilik, urıw-aymaqshılıq hám lawazım wákilliklerinen qasttan paydalanıwı ápiwayı halat sıpatında qabıl etiliwine, ápiwayı puqaralarda bolsa «para bermey turıp hesh bir máseleni sheshiw múmkin emes», degen psixologiyanıń qáliplesiwine alıp keledi.
Mámleketimizde usınday unamsız illettiń aldın alıw maqsetinde korrupciyaǵa qarsı gúresiwdiń huqıqıy mexanizmin belgilewshi Ózbekstan Respublikasınıń «Korupciyaǵa qarsı gúresiw haqqında»ǵı Nızamı qabıl etilgen bolıp, bul nızamnıń tiykarǵı maqseti korrupciyaǵa qarsı gúresiw tarawındaǵı múnásibetlerdi tártipke salıwdan ibarat.
Bul Nızamda shaxstıń óz lawazım yaki xızmet dárejesinen jeke máplerin yamasa ózge shaxslardıń máplerin gózlep materiallıq yaki materiallıq emes payda kóriw maqsetinde nızamǵa qılap ráwishte paydalanıwı, sonday-aq bunday mápti nızamǵa qılap ráwishte usınıwına- korrupciya dep táriyp berilgen.
Nızamda korrupciyaǵa baylanıslı huqıqbuzarlıq degende — korrupciyalıq belgilerge iye bolǵan, islengenligi ushın nızamshılıqta juwapkerlik názerde tutılǵan qılmıs korrupciyaǵa baylanıslı huqıqbuzarlıq ekenligi kórsetip ótilgen.
Korrupciyaǵa qarsı gúresiw tarawındaǵı mámleketlik siyasattıń tiykarǵı jónelisleri bolıp, xalıqtıń huqıqıy sana-sezimi hám huqıqıy mádeniyatın asırıw, jámiyette korrupsiyaǵa qarsı ayawsız múnásibetti qáliplestiriw, mámleket hám jámiyet ómiriniń barlıq tarawlarında korrupciyanıń aldın alıwǵa baylanıslı
is-ilájlardı ámelge asırıw, korrupciyaǵa baylanıslı huqıqbuzarlıqlardı óz waqtında anıqlaw, olarǵa shek qoyıw,olardıń aqıbetlerin, oǵan imkan beriwshi sebepler hám shárt-sharayatlardı saplastırıw, korrupciyaǵa baylanıslı huqıqbuzarlıqlardı islegenlik ushın juwapkershiliktiń támiynleniw principin támiynlew esaplanadı.
Korrupciyaǵa qarsı gúresiw boyınsha iskerlikti tikkeley ámelge asırıwshı mámleketlik organlar tómendegilerden ibarat:
Ózbekstan Respublikası Korrupciyaǵa qarsı gúresiw agentligi;
Ózbekstan Respublikası Bas prokuraturası;
Ózbekstan Respublikası Mámleketlik qáwipsizlik xızmeti;
Ózbekstan Respublikası Ishki isler ministrligi;
Ózbekstan Respublikası Ádillik ministrligi;
Ózbekstan Respublikası Bas prokuraturası janındaǵı Ekonomikalıq jınayatlarǵa qarsı gúresiw departamenti.
Korrupciyaǵa qarsı gúresiw boyınsha iskerlikti nızamshılıqqa muwapıq basqa mámleketlik organlarda ámelge asıradı.
Korrupciyaǵa qarsı gúresiw mámleketlik hám mámleketlik emes shólkemler, olardıń lawazımlı shaxsları hám hár bir puqaranıń minneti bolıp esaplanadı.
Mámleketimizde korrupciyaǵa qarsı gúresiw boyınsha hareketlerdiń tolıq ámelge asıwı ushın hár bir puqara, hár bir shaxs ózinde juwapkershilikti tolıq seziniwi, mámleketlik organlar, huqıqtı qorǵaw uyımları,puqaralardıń ózin-ózi basqarıw organları hám puqaralar óz-ara jámlesip is alıp barıwları, korrupciyalıq illetti túp-tamırınan joq etiw hámde mámleketimizdiń rawajlanıwı hám keleshegi ushın óz úleslerin qosıwı lazım.
Shımbay rayonı ádillik bólimi
Yuridikalıq xızmet kórsetiw
orayı bas yuriskonsultı A.Nurabullayev