Янгиликлар
30
Soraw: Referendum ótkeriw tártibi qanday?
Soraw: Referendum ótkeriw tártibi qanday?
Juwap: Ózbekstan Respublikası Konstituciyasınıń 9-statyasında Referendum sóziniń mánisi belgilengen bolıp, oǵan kóre jámiyet hám mámleket ómiriniń eń áxmiyetli máseleleri xalıqtıń dawısına usınılıwı, ulıwmaxalıq dawısına – referendumǵa qoyılıwı kórsetilgen.
Referendum ótkeriw tártibi Ózbekstan Respublikasınıń 2001-jıl 30-avgust kúngi «Ózbekstan Respublikasınıń referendumı haqqında»ǵı 265-II-sanlı nızamı menen tártipke salınǵan.
Konstituciya, nızamlar qabıl etiw, olarǵa ózgeris hám qosımshalar kiritiw mámleket xákimiyatı iskerligin referendum arqalı jedellestiriw múmkin.
Referendum ótkeriw saylaw ótkeriwge uqsas bolǵanı menen, referendumda saylawdaǵıday talabanlar bolmaydı, yaǵnıy belgili bir máseleni qollap-quwatlaw yaki bas tartıw boyınsha dawıs beriledi.
Referendum Ózbekstan Respublikasınıń pútkil aymaǵında puqaralardıń óz qálewi menen ıqtıyarıy hám erkin túrde ulıwma, teń hám tuwrıdan-tuwrı jasırın dawıs beriw jolı menen ótkeriledi hám qabıl etilgen qararlar joqarı yuridik kúshke iye boladı.
Puqaralardıń óz qálewin bildiriwdi qadaǵalawǵa jol qoyılmaydı.
Referendum ótkeriletuǵın kúnge shekem yaki referendum ótkeriletuǵın kúni 18 jasqa tolǵan hár bir puqara referendumda teń tiykarlarda qatnasadı hám hár bir puqara bir dawısqa iye boladı.
Referendumda qabıl etilgen qarar Ózbekstannıń barlıq aymaǵında májbúriy kúshke iye boladı.
Kegeyli rayonı Ádillik bólimi
Yuridikalıq xızmet kórsetiw orayı
bas yuriskonsultı S.BAZARBAEV,