Янгиликлар
18
Qaraqalpaqstan Respublikası Ádillik ministrligi tárepinen puqara D.tıń is haqı pulları tólenbey atırǵanlıǵı hám ózine qarata intizamiy jaza sharası nızam talaplarına qayshı qollanılǵanlıǵınan narazı bolıp jollaǵan múrájatı qanaatlandırıldı.
Qaraqalpaqstan Respublikası Ádillik ministrligi tárepinen puqara D.tıń is haqı pulları tólenbey atırǵanlıǵı hám ózine qarata intizamiy jaza sharası nızam talaplarına qayshı qollanılǵanlıǵınan narazı bolıp jollaǵan múrájatı qanaatlandırıldı.
Qaraqalpaqstan Respublikası Ádillik ministrligine puqara D.Sh múrájat jollap, óz múrájatında “Toza hudud” Mámleketlik unitar kárxanası Beruniy rayonı filialında jumıs isleytuǵınlıǵın, 2024-jıl 15-yanvardan 10-fevralǵa shekem joqarı oqıw ornında sırtqı bilimlendiriw túrinde oqıǵanlıǵı hám sol dáwir ushın is haqı tólenbegenliginen, sonday-aq 2024-jıl 8-febral kúni ózine qarata “sógis” intizamiy jaza sharası nızam talaplarına qayshı qollanılǵanlıǵınan narazılıǵın bildirgen.
Úyreniw dawamında, puqara D.Sh 2024-jılı 15-yanvar kúninen Qaraqalpaqstan Respublikası Awıl xojalıǵı hám agrotexnologiyalar institutınıń sırtqı bilimlendiriw túrine 1-kursqa qabıllanǵanlıǵı múnásibeti menen 2024-jılı 8-yanvardaǵı 25/386-105-sanlı shaqırıw xatı menen oqıwǵa shaqırılǵanlıǵı málim boldı.
Sonıń menen birge, usı shaqırıw xatına tiykar, “Toza hudud” MUK tárepinen puqara D.Shtı oqıwǵa jiberiw haqqında buyrıq shıǵarılmaǵanlıǵı hám ortasha aylıq is haqı tólenbegenligi málim boldı.
Ózbekstan Respublikası Miynet kodeksiniń 383-statyasına muwapıq, jumıs beriwshi miynet shártnaması boyınsha jumıstan ajıralmaǵan halda oqıw orınlarında oqıtılıp atırǵan, qayta tayarlawdan yáki qániygeligin asırıwdan ótip atırǵan,
sonday-aq islep shıǵarıw bilimin ótip atırǵan xızmetkerlerge is haqı hám oqıwdı birge alıp barıw ushın zárúr shárt-shárayatların jaratıwı shárt dep belgilengen.
Joqarıdaǵı kodekstiń 386-statyasına kóre, jumıstı oqıw menen birge alıp barıp atırǵan xızmetkerlerge ústeme hám kompensaciyalar birinshi márte tiyisli dárejedegi bilim alıp atırǵanda beriledi. Usı ústeme hám kompensaciyalar, sonday-aq tiyisli dárejede bilim alǵan hám de jumıs beriwshi tárepinen ishki hújjetler, miynet shártnaması yáki jumıs beriwshi hám xızmetker ortasında dúzilgen ayrıqsha kelisimge muwapıq bilim alıwǵa jiberilgen xızmetkerlerge de beriliwi múmkin.
Sonday-aq, múrájatta puqara D.Shqa qarata “sógis” intizamiy jaza sharası nızam talaplarına qayshı ráwishte qollanılǵanlıǵı jaǵdayı boyınsha, Qaraqalpaqstan Respublikası “Toza hudud” MUKnıń 2024-jıl 6-fevraldaǵı jıynalıs bayanlamasına tiykar, kárxana direktorınıń 2024-jıl 8-fevraldaǵı ISH-2-sanlı buyrıǵı menen puqara D.Shqa “sógis” intizamiy jaza sharası qollanılǵanlıǵı, biraq puqara bul buyrıq penen 2024-jıl 12-fevral kúni aradan 4 jumıs kúni ótkennen soń tanıstırılǵanlıǵı málim boldı.
Ózbekstan Respublikası Miynet kodeksiniń 313-statyasına muwapıq, xızmetkerge intizamiy jaza sharasın qollaw jumıs beriwshiniń buyrıǵı menen rásmiylestiriledi.
Jumıs beriwshiniń xızmetkerge qarata intizamiy jaza sharasın qollaw haqqındaǵı buyrıǵı qabıl etilgen kúnnen baslap úsh jumıs kúni ishinde, xızmetker jumısta bolmaǵan waqıt esapqa alınbastan, oǵan jazanıń sebepleri kórsetilgen halda qol tańba qoydırıp tanıstırıladı.
Ózine qarata intizamiy jaza sharasın qollaw haqqındaǵı buyrıq penen tanıstırılmaǵan xızmetker intizamiy jazası bolmaǵan dep esaplanadı.
Xızmetkerdiń ózine qarata intizamiy jaza sharasın qollaw haqqındaǵı buyrıq penen tanısıwdan bas tartıwı bar bolǵan gúwálar kórsetilgen halda dálalatnama menen rásmiylestiriledi. Bunday jaǵdayda xızmetker buyrıq penen tanıstırılǵan dep esaplanadı.
Joqarıdaǵılarǵa kóre, puqara D.Shqa qarata qollanılǵan intizamiy jaza sharasın biykarlaw hám de oqıwda bolǵan dáwiri ushın is haqı pulların tólep beriw boyınsha Qaraqalpaqstan Respublikası “Toza hudud” mámleketlik unitar kárxanasına orınlanıwı májbúriy bolǵan usınıs kiritildi.
Qaraqalpaqstan Respublikası Ádillik ministrligi
Insan huqıqların qorǵaw sektorı bas másláhátshisi
J. Bekimbetov