Янгиликлар
28
Nızamshılıqta oqıtıwshılarǵa qanday jeńillikler bar?
Nızamshılıqta oqıtıwshılarǵa qanday jeńillikler bar?
Hár bir mámlekettiń rawajlanıwında bilimlendiriw sistemasınıń tutqan ornı ayrıqsha bolıp, hár qanday tarawdı rawajlandırıw, xalqımızdıń ruwxıy aǵartıwshılıq jaǵdayın jaqsılaw hám bekkemlew, hár qanday jat ideyalarǵa qarsı turıw, xalıq aralıq reytinglerde aldıńǵı orınlardı iyelew ushın bilimlendiriw birlemshi element bolıp esaplanadı.
Mámleketimizde oqıtıwshılardıń miyneti jámiyet hám mámleketti rawajlandırıw, salamat, nawqıran áwladtı qáliplestiriw hám tárbiyalaw, xalqımızdıń ruwxıy hám mádeniy sana-sezimin ѳsiriw hámde bayıtıwdıń tiykarı sıpatında ayrıqsha bahalanadı.
Búgingi kúnde barlıq tarawlarda bolǵanı sıyaqlı bilimlendiriw tarawında da basqıshpa-basqısh reformalar ámelge asırılmaqta. Mámleketimizde oqıtıwshı hám ustazlarǵa húrmet kѳrsetiw, abıroyın asırıw hám qádir-qımbatın qorǵaw, olardıń sociallıq hám materiallıq jaqtan támiynleniwi, maman qánige bolıp jetilisiwi ushın sociallıq jeńillikler beriw boyınshada bir qansha unamlı jumıslar ámelge asırılmaqta.
Atap aytqanda:
Mámleketimizde 1996-jıl 27-dekabr kúni «Oqıtıwshı hám ustazlar kúnin belgilew haqqında»ǵı nızam qabıl etildi. Usı nızam menen 1-oktyabr rásmiy túrde bayram kúni dep járiyalandı.
Bilimlendiriw mákemelerinde oqıtıwshı bolıp islep atırǵan ataqlı xalıq aralıq olimpiadalar jeńimpazlarınıń aylıq (lawazım) is haqılarına hár ay 150 payız, tiykarǵı olimpiadalardıń respublika basqıshı jeńimpazlarınıń lawazım is haqılarına hár ay 100 payız muǵdarında ústeme haqı tѳlenedi.
Xalıq aralıq olimpiadalar jeńimpazları hám olardıń oqıtıwshıları bazalıq esaplaw muǵdarınıń tѳmendegi muǵdarlarında bir mártelik pul sıylıqları menen sıylıqlanadı:
1-orın (altın medal) ushın — 500, oqıtıwshısına — 450 esesi;
2-orın (gúmis medal) ushın — 300, oqıtıwshısına — 250 esesi;
3-orın (bronza medal) ushın — 200, oqıtıwshısına — 150 esesi;
Tiykarǵı olimpiadalardıń respublika basqıshı jeńimpazlarınıń oqıtıwshıları bazalıq esaplaw muǵdarınıń tѳmendegi muǵdarlarında bir mártelik pul sıylıqları menen sıylıqlanadı.
1-orın ushın — 50 esesi;
2-orın ushın — 35 esesi;
3-orın ushın — 30 esei;
Xalıq aralıq olimpiadalardıń jeńimpazların tayarlaǵan oqıtıwshılar hám bilimlendiriw mákemeleri direktorlarına náwbettegi oqıw jılı ushın direktor qorınan altın,gúmis hám bronza medalları boyınsha tiyislisinshe qosımsha 200,175 hám 150 payızlıq ústeme tѳlenedi.
Oqıtıwshılar medicinalıq kѳrikten ѳtiw ushın pul tѳlemeydi.
Pensiya jasındaǵı pedagoglar náwbettegi attestaciyaǵa qamtılmaydı.
Inklyuziv bilim beriw klaslarınıń oqıtıwshılarına miynettiń ayrıqsha sharayatları ushın hár ayda tѳlenetuǵın ústeme haqı klastaǵı ayrıqsha bilim alıw zárúrligi bolǵan bir bala ushın lawazım is haqısınıń 10 payızı, eki bala ushın lawazım is haqısınıń 20 payızı, úsh bala ushın lawazım is haqısınıń 30 payızı muǵdarında, eki yamasa onnan artıq inklyuziv bilim beriw klaslarında tѳrt hám onnan artıq bala ushın tálim-tárbiya jumısların alıp barǵan oqıtıwshılar hám arnawlı pedagoglarǵa lawazım is haqısınıń 40 payızı muǵdarında belgilenedi.
Baslanǵısh tayanısh korrekciyalıq klaslar oqıtıwshıları hám arnawlı pedagoglarǵa miynettiń ayrıqsha sharayatları ushın hár ayda tѳlenetuǵın ústeme haqı lawazım is haqısınıń 50 payızı muǵdarında tѳlenedi.
Inklyuziv bilim beriw klasları klass basshılıǵı ushın tolıq kѳlemde qosımsha qarjı ajıratıladı hám ol direktor qorınan tѳlenedi.
Awıllardaǵı mekteplerde dene tárbiya oqıtıwshısı bolıp islep atırǵan hayal-qızlardıń tarif stavkalarına hár ayda 15 payız muǵdarında ústeme haqı tѳlenedi.
Mámleketimizde oqıtıwshı hám ustazlarǵa bunnan basqada bir qansha jeńillikler berilgen bolıp, bulardıń barlıǵı mámleketimizde bilimlendiriw sistemasınıń pútkilley jańalanıwına, pedagoglar iskerligin tálim-tárbiya menen tıǵız baylanısqan halda shѳlkemlestiriw, olardıń miynetiniń qádirleniwi hám nızam menen qorǵalıwına sharayat jaratadı.
Shımbay rayonı Yuridikalıq xızmet
kórsetiw orayı bas yuriskonsulti B.Bekimbetov