Янгиликлар
24
Jol háreketi qaǵıydalarına ámel eteyik
Jol háreketi qaǵıydalarına ámel eteyik
Elimizde avtotransport quralları sanınıń kún sayın artıp barıwı hár bir avtotransport quralı basqarıwshılarınan jollarda júrgende belgilengen orınlarda tezlikti sheklengen normadan asırmaw, sergeklik penen basqarıw, jol háreketi qaǵıydalarına tolıq ámel etiwi hám boysınıwı talap etiledi. Eger avtotransport quralı basqarıwshıları belgilengen tártip hám normalarǵa boysınbasa olarǵa tiyisli tártipte taraw qánigeleri tárepinen járiyma salıwǵa sebeb bolatuǵınlıǵı, búgingi kúnde bárshemizge málim. Al, eger avtomobil jollarınan piyadalar hám velosiped basqarıwshıları háreketlengende hám joldıń belgilenbegen orınlarınan kesip ótkende, yamasa háreketlenip kiyatırǵan avtomobildiń háreketleniwine kesent etip, avtotransport qurallarınıń avariyalıq jaǵdaylarınıń kelip shıǵıwına sebepshi bolǵanda olarǵa qanday sharalar kóriletuǵınlıǵı haqqında búgingi kúnde kópshilik tolıq maǵlıwmatqa iye bolmasa kerek.
Bárinen burın sergek bolıw lazım. Sebebi, kóshege shıqqan hár bir piyada tikkeley jol háreketi qatnasıwshısına aylanadı. Sol sebepli átirapdaǵı waqıyalarǵa itibarlı bolıw talap etiledi. Joldı kesip otip atırǵanda yamasa onıń qatnaw bóleginde háreketlenip atırģanda qulaqshın taģıp muzıka tıńlaw, video tamasha qılıw, kitap oqıw qadaǵan etiledi. Svetofordıń qızıl shıraģın kórgen aydawshı óz-ózinen toqtaydi, deytuģınlarda joq emes. Biraq bunday pikirlewshiler sonı unutmaw kerek, kóshe mudamı kútilmegen jaǵdaylarǵa tola boladı. Bunnan tısqarı, qaǵıydalarǵa ámel etpeytuǵın aydawshılar, kóshe kesispesilerden tosqınlıqsız ótiw huqıqına iye bolǵan transport quralları da bar. Usınıń sebepinen sergeklik hár eki tárepten bolsa, maqsetke muwapıq boladı.
Sonday-aq Ózbekstan Respublikası Ministrler Kábinetiniń 2018 jıl 19 maydaǵı «Ózbekstan Respublikası jol qawipsizligin támiyinlew sistemasın jáne de jetilistiriw ilajları tuwrısında»ģı 377-sanlı Qararı menen tastıyıqlanǵan konsepsiya hám bul konsepsiyanı ámelge asırıw boyınsha jol kartasın orınlanıwın támiyinlew maqsetinde, ótken dáwir dawamında 3 nızam joybarı islep shıǵılıp, búl nızam 2018 jıl 23 oktyabrde kúshke kirdi. Ol jaǵdayda ayırım qopal qaǵıydabuzarlıqlar ushın járiymalar muǵdarı asırıldı, jaza túrleri kúsheytildi. Mısalı, aldınǵı nızamshılıqqa kóre, spirtli ishimlik iship avtomobildi basqargan puqara sud uyımları tárepinen bir jıl altı aydan úsh jılǵa shekem aydawshılıq huqıqınan ayırılatúģın bolsa, endi oǵan qosımsha túrde jańa kiritilgen ózgertiwge kóre EKIHning 25 esesi muǵdarında járiyma da óndirilesi.
Juwmaq etip aytqanda, jol-transport hádiysesi júz beriwine kishi qáte de úlken shıǵınlardı keltirip shıǵarıwı múmkin. Eń, áwele, hár birewimiz sanalı túrde jol háreketi qaǵıydalarına ámel etken halda háreketleniwimiz, qaǵıydabuzarlıqlardıń hár qanday kórinisine qarsı gúresiwimiz, óz puqaralıq pozitsiyamızdı kórsetpegimiz zárúr. Reformanı ózimizden baslawımız kerek.
Xojeli rayonı ádillik bólimi bas másláhatshısı
Otepov Bayrambay Kenjebayevich