Янгиликлар

Turaq jay satıp alıw yamasa turaq jay qurıw hám rekonstrukciya ushın puqaralarǵa subsidiya beriw tártibi

---

Turaq jay satıp alıw yamasa turaq jay qurıw hám rekonstrukciya ushın
puqaralarǵa subsidiya beriw tártibi

Ipoteka kreditine Mámleketlik subsidiya alıwǵa arza beriw mámlekelik xızmeti Ózbekstan Respublikası Ministrler Kabinetiniń 25.03.2020-jıldaǵı 182-sanlı qararı menen «Turaq jay satıp alıw yamasa jeke tártiptegi turaq jaydı qurıw jáne rekonstrukciya qılıw ushın puqaralarǵa subsidiya tólew tártibi haqqında»ǵı qararı menen tártipke salınǵan bolıp, subsidiya alıw ushın 18 jastan 60 jasqa shekemgi Ózbekstan Respublikası puqaraları (Eger puqara miynet migrantı bolıp sırt elde jumıs islep atırǵan bolsa, onıń ornına shańaraq aǵzaları) ózleri qálegen mámleketlik xızmetler orayları arqalı yáki my.gov.uz birden-bir interaktiv mámleketlik xızmetler portalı arqalı arza beriwleri múmkin.
Arza beriw ushın mámleketlik xızmetler orayına múrájat etilgende puqara óziniń hám shańaraq aǵzalarınıń shaxsın tastıyıqlawshı hújjetlerin (eger perzentleri 16 jasqa tolmaǵan bolsa olardıń tuwılǵanlıq haqqındaǵı gúwalıqları) usınadı hám onıń atınan arzanı usı oray xızmetkeri toltırıp beredi.
Arza tómendegi jaǵdaylarda qanaatlardırılmaydı:
-    shańaraq belgilengen sociallıq kriterialarǵa tuwrı kelmese;
-    puqara bergen maǵlıwmatlar nadurıs yamasa jalǵan bolsa;
-    arza beriwshi aldın arzan turaq jay baǵdarlamaları boyınsha jeńillikli ipoteka kreditlerinen paydalanǵan halda turaq jay hám subsidiya alǵan bolsa;
-    arza berilgen jılı sol aymaq ushın beriletuǵın subsidiyalar sanı tawsılǵan bolsa;
-    arza beriwshi shańaraqtıń ortasha aylıq dáramatı MHTEKMnıń 2,7 esesinen kem hám 8 esesinen artıq bolǵanda.
Subsidiya bir shańaraqqa (shańaraq aǵzalarınıń birewine) tek bir márte beriledi.

Nókis rayonı ádillik bólimi
Mámleketlik xızmetler orayı bólim baslıǵı
A.Patshaxanov

---