Янгиликлар
31
SIRT EL WÁKILXANASIN AKKREDITACIYALAWDIŃ JAŃA TÁRTIBI
SIRT EL WÁKILXANASIN AKKREDITACIYALAWDIŃ JAŃA TÁRTIBI
Ministrler Kabinetiniń 2024-jıl 7-fevral' kúngi 76-sanlı qararı menen «Ózbekstan Respublikası aymaǵında sırt el kommerciyalıq shólkemleriniń wákilxanaların akkreditaciyalaw hám olardıń jumıs alıp barıw tártibi haqqında»ǵı reje tastıyıqlandı.
Sırt el kompaniyası wákilxanası qalay akkreditaciyalanadı?
Rejege tiykar akkreditaciyadan mámleketlik xızmetler orayı yaki birden-bir interaktiv mámleketlik xızmetler portalı arqalı ótiw múmkin. Akkreditaciya juwmaǵı boyınsha QR-kod (matrik shtrixlı kod) qoyılǵan akkreditaciya gúwalıǵı beriledi. Sırt el kommerciyalıq shólkemi óz wákilxanasın ashıw yaki akkreditaciya múddetin uzaytıw ushın tómendegilerdi usınıwı kerek:
- arza, onda kelip shıǵıw mámleketi, shólkemlestiriwshileri haqqında maǵlıwmatlar, jumısınıń tariyxı, xızmetkerleriniń ulıwma sanı, sońǵı finans jılında tovar (jumıs, xızmet) almasıw kólemi, sheriklikti rawajlandırıw perspektivaları, Ózbekstan kárxanaları hám shólkemleri menen ámeliy hám basqa túrdegi baylanıslar boyınsha shártnamalar haqqında maǵlıwmatlar (eger bar bolsa), wákilxananı ashıw múddeti kórsetiledi;
- sırt el shólkeminiń shólkemlestiriw hújjetleri;
- shólkem shet elde dizimnen ótkerilgenligi haqqındaǵı reestrden kóshirme, gúwalıq yaki licenziya;
- wákilxana baslıǵına berilgen isenim qaǵazı;
- wákilxana haqqındaǵı ustav.
Arzanı kórip shıǵıw ushın tólem óndirilmeydi. Akkreditaciyalaw haqqında unamlı qarar qabıl etilse, arza beriwshige mámleketlik bajını tólew ushın esap beti rekvizitleri usınıladı.
Akkreditaciya múddetin uzaytıw haqqındaǵı arza aǵımdaǵı gúwalıqtıń ámel etiw múddeti juwmaqlanıwınan keminde bir ay burın beriliwi lazım. Akkreditaciyanı qayta dizimnen ótkeriw ushın mámleketlik bajı óndirilmeydi.
Arzanı kórip shıǵıw múddeti 5 jumıs kúni. Akkreditaciya haqqında gúwalıq 1 jıldan 3 jılǵa shekem múddetke beriledi.
Tómendegi sebeplerge kóre akkreditaciyalawdı biykar etiwi múmkin:
hújjetler tolıq usınılmaǵanlıǵı yaki olar belgilengen tártipte rásmiylestirilmegenligi;
usınılǵan hújjetlerde nadurıs maǵlıwmat keltirilgenligi;
usınılǵan hújjetlerde yaki sırt el kompaniyasınıń jumısında Ózbekstannıń nızamshılıǵı buzılǵanlıǵınıń anıqlanǵanlıǵı.
Wákilxana baslıǵı hám xızmetkerleri qalay akkreditaciyalanadı?
Sırt el kompaniyası wákilxanası xızmetkerleri hám sırt el puqaralarınan, hám Ózbekstan puqaralarınan ibarat bolıwı múmkin. Miynet iskerligin ámelge asırıw ushın qabıl etiletuǵın sırt el puqaralarınıń sanı boyınsha sheklew ornatılǵan: ulıwma muǵdardıń 40 procentten artıq bolmaslıǵı, biraq, 5 adamnan artıwı múmkin emes. Sırt el puqaraları da akkreditaciyalanıwı kerek.
Sırt el kompaniyası wákilxanasınıń baslıǵın akkreditaciyalvw ushın arza kompaniya tárepinen, wákilxana xızmetkerlerin akkreditaciyalaw ushın bolsa kompaniya yaki isenim qaǵazı tiykarında wákilxana baslıǵı tárepinen beriledi.
Arzaǵa tómendegi hújjetler qosımsha etiliwi lazım:
Rejege 5-qosimshadaǵi úlgi formaǵa muwapıq ózbek hám inglis tillerinde jazılǵan eki nusqadaǵı jeke is qaǵazı;
pasport yaki ID-kartası nusqası. Bunda ishki isler uyımlarınıń migraciya hám puqaralıqtı rásmiylestiriw bólimleri tárepinen dizimge alınǵanlıq haqqında maǵlıwmat bolıwı shárt;
wákilxana baslıǵına berilgen isenim qaǵazı yamasa xızmetkerdi wákilxanaǵa jumısqa qabıl etiw haqqındaǵı hújjet nusqası.
Arza 5 jumıs kúni dawamında kórip shıǵıladı. Unamlı qarar qabıl etilgen jaǵdayda sırt elli xızmetkerge akkreditaciya kartochkası beriledi.
Usılayınsha, akkreditaciyalanǵan sırt elli xızmetkerler Ózbekstannıń aymaǵında tek akkreditaciyalanǵan wákilxanada sırtqı miynet migraciyası agentliginiń tastıyıqlaw qaǵazın almastan miynet iskerligin ámelge asırıw huqıqına iye boladı.
Sırt elli xızmetker ushın akkreditaciya kartochkası keyin uzayttırılıw imkaniyatı mene
12 ay múddetke yamasa wákilxana akkreditaciyalanǵan múddetten, isenim qaǵazı múddetinen kem bolmaǵan múddetke beriledi.
Aybek Orazimbetov
Taqıyatas rayonı Ádillik bólimi
Mámleketlik xızmetler orayınıń bólim baslıǵı