Янгиликлар
24
Korrupciyaǵa qarsı gúresiw-bárshemizdiń wazıypamız.
Korrupciyaǵa qarsı gúresiw-bárshemizdiń wazıypamız.
Jámiyette sonday illetler bar bolıp, ol málim bir tarawǵa emes, bálkim barlıq jámiyet rawajlanıwına tosıq boladı. Mámleketti ish-ishinen jemiretuǵın áne usınday illet-korrupciya hám parahorlıq bolıp esaplanadı.
Rawajlanıwdıń jańa basqıshına qádem qoyıp atırǵan Ózbekstan ushın korrupciyanıń hár qanday kórinisi reformalar tezligin páseytiw menen qáwipli.
Sol sebeptende mámleket basshısı Shavkat Mirziyoev óz wákilligine kirisiwi menen Prezident sıpatında imzalaǵan eń birinshi hújjet «Korrupciyaǵa qarsı gúresiw haqqında»ǵı Ózbekstan Respublikası Nızamı boldı. Usı Nızam normalarınıń nátiyjeli orınlanıwın támiyinlew, jámiyet hám mámleket turmısınıń barlıq tarawlarında korrupciyanıń aldın alıwǵa baylanıslı is-ilájlardı óz waqtında hám sapalı ámelge asırıw maqsetinde Prezidenttiń 2017-jıl 2-fevraldaǵı qararı menen «2017-2018-jıllarǵa mólsherlengen korrupciyaǵa qarsı gúresiw boyınsha mámleket dástúri» qabıl etildi. Dástúr sheńberinde bir qatar nızam joybarları islep shıǵıldı, barları inventarizaciyadan ótkerildi. Ulıwma alǵanda, sońǵı jıllarda islengen jumıslar analizi xalıqtıń huqıqıy sanası hám huqıqıy mádeniyatın asırıwǵa, jámiyette korrupciyaǵa toqtawsız múnásiybetti qáliplestiriwge baǵdarlanǵan sistemalı is-ilájlar kórilgenligin kórsetip tur.
Reformalardı ámelge asırıw sheńberinde puqaralardıń huqıq hám máplerin qorǵaw, mámleket hákimiyatı hám basqarıw organları iskerligi ashıqlıǵın, jámáát hám parlament qadaǵalawın támiyinlew mexanizmleri jetilistirildi, sonday-aq, huqıq qorǵaw hám sud organları iskerliginiń huqıqıy tiykarları reformalandı. Álbette, orınlanǵan isler salmaqlı. Biraq biz keshegi islegen isimizdiń nátiyjesine qarap qalsaq, erteńgi isimizdiń juwmaǵı biz kútkendey bolmawı anıq.
Sonnan kelip shıqqan halda ekonomikanı jánede ósiriw, mámlekette investiciya ortalıǵın jaqsılaw barısındaǵı aldın ala wazıypalardı sheshiw úlken áhmiyetke iye. Bul bolsa korrupciyaǵa qarsı gúresiw tarawındaǵı mámleket siyasatınıń nátiyjeli ámelge asırılıwın támiyinlew boyınsha jańa sistemalı is-ilájlar kóriliwin talap etpekte. Prezidentimiz tárepinen imzalanǵan «Ózbekstan Respublikasında korrupciyaǵa qarsı gúresiw sistemasın jánede jetilistiriw is-ilájları haqqında»ǵı Párman hám áne usı maqsetti kózlegeni menen áhmiyetli esaplanadı.
Korrupciya sonday illet, onı bir yaki eki mekemeniń is-háreketi menen joq etip bolmaydı. Qashanda, barlıq puqaralarımız, jámiyet oǵan qarsı birgelikte gúresip, onıń tamırların joq qılıwǵa kirisse ǵana unamlı nátiyjege erisiw múmkin.
Pármannıń túp mánisine itibar bersek, korrupciyaǵa qarsı huqıq qorǵawshı uyımlar xám mámleket shólkemleri, bálkim jámiyetshilik qadaǵalawı institutı imkániyatınanda keń paydalanıw belgilep qoyılǵanın kóriwimiz múmkin.
Birinshiden, Pármanda jámiyetshilik qadaǵalawın alıp barıwda áhmiyetli orın tutıwshı Ózbekstan Respublikası Oliy Majlisi palataları hám siyasıy partiyalardıń rólin jánede kúsheytiw ayrıqsha belgilengen.
Ekinshiden, orınlarda korrupciyaǵa qarsı gúresiw tarawındaǵı isler halatın kompleks úyreniw hám bar mashqalalardı joq etiwge usınıslar tayarlap barıw ushın Qaraqalpaqstan Respublikası Joqarǵı Keńesi, Xalıq deputatları wálayatlar hám Tashkent qalası Keńesleri, Xalıq deputatları rayon hám qala Keńesleriniń quramında korrupciyaǵa qarsı gúresiw komissiyaların shólkemlestiriw usınıs etilmekte.
Úshinshiden, xalıqtıń huqıqıy sanası hám huqıqıy mádeniyatın jánede asırıw, jámiyette korrupciyaǵa qarata toqtawsız múnásiybetti kúsheytiw, usı tarawdaǵı nızambuzılıw halatları haqqında xabar bergen shaxslardı qorǵawdıń shólkemlestiriw-huqıqıy mexanizmlerin jaratıw aytılǵan.
Tórtinshiden, puqaralıq jámiyeti institutları, ǵalaba xabar quralları iskerliginiń erkinligin támiyinlew hám olardı korrupciyaǵa qarsı sharalardı tayarlaw, ótkeriwde hám orınlanıwın monitoring qılıwda qatnasıwǵa tartıw kózde tutılmaqta.
Bunnan tısqarı, Pármanda mámleket xızmetshileriniń huqıqıy sanası hám mádeniyatın asırıw, olarda korrupciya hám basqa huqıqbuzarlıqlarǵa qarata toqtawsız múnásiybetti qáliplestiriw wazıypası belgilep berildi. Bul norma, álbette, hár bir lawazımlı shaxstan juwmaq shıǵarıwdı talap etedi.
Búgingi kúnde hár bir mámleket xızmetshisi hám huqıq qorǵawshı mámleket organları xızmetkerleriniń minez-hulqına Ózbekstan Respublikası nızamlarına boysınıw hám olardı húrmet qılıw ádebin sińdirip barıw júdá áhmiyetli wazıypa bolıp esaplanadı. Pármanda kózde tutılǵanday, jámiyetimizde korrupciyaǵa qarsı toqtawsız gúres alıp barılıp atırǵan házirgi dáwirde lawazımlı shaxslardıń huqıqıy bilimi hám mádeniyatı dárejesine ayrıqsha talaplar islep shıǵıw, nızamlarǵa húrmetsizlik qılǵan lawazımlı shaxslar haqqında tiykarlanǵan kórsetiwler, esittiriwler shólkemlestiriw, maqalalar shıǵarıw, olardıń qılmısı nadurıs ekenligin tásirli qurallar arqalı kórsetip beriw, álbette, óz nátiyjesin beredi.
Juwmaqlap aytqanda, usı Párman jámiyette ádillik ideyası, bársheniń nızam aldında teńligi puqaralardıń huqıq hám erkinlikleri, nızamlı máplerin qorǵawda áhmiyetli hújjet esaplanadı. Ádillik ústin bolǵan mámlekette bolsa rawajlanıw, xalıq párawanlıǵı, reformalar nátiyjesi támiyinlenedi.
Kegeyli rayonı ádillik bólimi Mámleketlik
xızmetler orayı direktorı A.K.Dauekeev