Янгиликлар
25
Bozataw rayonı ádillik bólimi tárepinen pedagog xızmetkerdiń buzılǵan huqıqı tiklenip, múrájatı qanaatlandırıldı hám nızambuzıwshılıqqa jol qoyǵan mektep direktorı juwapkershilikke tartıldı
Bozataw rayonı ádillik bólimi tárepinen Bozataw rayonı, "Qusxanataw" APJda jasawshı puqara M.Anıń «Bozataw rayonı mektepke shekemgi hám mektep bilimlendiriw bólimine qaraslı 4-sanlı ulıwma orta bilim beriw mektep direktorınıń is-háreketlerinen narazı bolıp, mektepte oqıw saatların bólistiriwde qáte-kemshiliklerge jol qoyılıp atırǵanlıǵı, sonday-aq mektepte ayırım pánlerden qánige emes oqıtıwshılar tárepinen oqıtılıp atırǵanlıǵın» bildirip Bozataw rayonı ádillik bólimine jollaǵan múrájatı boyınsha tiyisli tártipte, ámeldegi nızam hújjetleri talaplarına tiykar úyreniw jumısları alıp barıldı.
Anıqlanıwınsha, puqara M.A mektepte Fizika páni oqıtıwshısı bolıp islep atırǵanlıǵı, sonıń menen birge, 2011-jıl 7-iyun kúninen 29-sentyabr kúnleri aralıǵında K.Ubaydullaev atındaǵı Qaraqalpaqstan Respublikası pedagog kadrlardı qayta tayarlaw hám tájiriybesin asırıw institutında 576 saatqa mólsherlengen Matematika oqıtıwshıları ushın arnalǵan qayta tayarlaw kursında tálim alıp, QT №010206-sanlı Diplom berilgenligi málim boldı.
Soǵan qaramastan, M.Aǵa mekteptegi 5 saat Matematika páni oqıw saatları mektep direktorı tárepinen hár túrli báneler menen berilmey kelgen.
Usı jaǵdayda, Ózbekstan Respublikası mektepke shekemgi hám mektep bilimlendiriw ministrliginiń 2023-jıl 16-avgusttaǵı «Mektepke shekemgi hám mektep bilimlendiriw ministrligi oraylıq apparatı, Qaraqalpaqstan Respublikası mektepke shekemgi hám mektep bilimlendiriw ministrligi, Tashkent qalası hám wálayatlar mektepke shekemgi hám mektep bilimlendiriw basqarmaları, rayon (qala) bólimleri, ministrlik sistemasındaǵı respublikalıq shólkem, mekeme hám ulıwma orta bilim beriw mektebi (mektep-internat) xızmetkerleri tiykarǵı lawazım talapların tastıyıqlaw haqqında»ǵı 247-sanlı buyrıq talabı buzılǵan.
Sonday-aq, mektepte Ózbek tili pánine ulıwma 26 saat ajıratılıp, U.Dǵa 20 saat (tolıq stavka) berilip, bir stavkadan artqan 6 saat Ózbek tili páni oqıtıwshısı lawazımı bos jumıs orınları haqqındaǵı maǵlıwmatlar bazasına kiritilmesten, qánige emes oqıtıwshınıń sabaq ótiwine jol qoyıp kelingenligi málim boldı.
Úyreniw nátiyjeleri boyınsha, mekteptiń Matematika páni oqıtıwshısı N.Dǵa hámiledarlıq hám tuwıw demalısı beriliwine baylanıslı onıń 6-klasstaǵı Matematika páninen 5 oqıw saatı M.Aǵa oqıtıw ushın bekitilip, M.Anıń múrájatı qanaatlandırıldı.
Múrájattı úyreniw nátiyjeleri boyınsha, Ózbek tili páni boyınsha 4 oqıw saatı qánige emes oqıtıwshıǵa berilgenligi hám Ózbek tili páninen 20 saattan artıq bolǵan bólegi yaǵnıy 6 saat Ózbek tili páni oqıtıwshısı lawazımı boyınsha bos jumıs orınları haqqındaǵı bazaǵa tiyisli maǵlıwmat kiritilmegenligi jaǵdayı boyınsha mektep direktorı Ózbekstan Respubliksı HJHKtiń 49-statyası, 1-bólimi menen hákimshilik juwapkershilikke tartılıwı támiyinlendi.
Bozataw rayonı ádillik bólimi