Янгиликлар
07
Ózbekstan Respublikasınıń “Jol háreketi haqqında” ǵı ÓRN-900-sanlı nızamı qabıl etildi
Ózbekstan Respublikasınıń “Jol háreketi haqqında” ǵı ÓRN-900-sanlı nızamı qabıl etildi
2024-jıl 19-yanvar kúni “Jol háreketi haqqında” ǵı Ózbekstan Respublikasınıń ÓRN-900-sanlı Nızamı qabıl etildi. Bul Nızamnıń maqseti jol háreketi salasındaǵı munasábetlerdi tártipke salıwdan ibarat.
Usı nızam menen jol iyesiniń huqıq hám minnetlemeleri, transport iyeleriniń jol háreketi qáwipsizligin támiyinlewge tiyisli minnetlemeleri hám de miynet shártnaması boyınsha islep atırǵan aydawshılardıń huqıqları belgilendi.
Jol qaysı kárxana, mákeme, shólkem yamasa fizikalıq shaxslar ıqtiyarında bolsa, sol jol iyesi esaplanadı.
Jol iyesi jollardı qurıw, remontlaw hám rekonstrukciya qılıw joybarların kelisip alıw hám tastıyıqlawda, sonıń menen birge remontlaw jumısların shólkemlestiriwde qatnasıw huqıqına iye.
Transporttı óz xızmeti ushın yamasa jumıs babında paydalanıw ushın, sonday-aq transporttıń múlkdarı yamasa basqa iyesi menen dúzilgen miynet shártnamasına yamasa puqaralıq-huqıqıy túske iye shártnama tiykarında basqarıwshı shaxs transport quralınıń iyesi esaplanbaydı.
Transport qurallarınıń iyeleri jol háreketi qáwipsizligin támiyinlewde tómendegilerge minnetli esaplanadı.
Yaǵniy texnikalıq jaqtan saz transporttan paydalanıw;
transporttı tiyisli bilimge iye hám medicinalıq kórikten ótken shaxslar tárepinen basqarılıwına ruqsat beriw;
transporttan paydalanıwda basqa adamlardıń turmısına, den-sawlıǵına hám múlkine ziyan jetkizgenlik ushın óz puqaralıq juwapkershiligin májburiy qamsızlandırıwdı ámelge asırıw;
transporttı alkogol ishimliklerinen mast halda yamasa psixoaktiv zatlar tásirinde yamasa oǵada sharshaq jaǵdayda bolǵan shaxslar tárepinen basqarılıwına jol qoymawı shárt.
Bul Nızam rásmiy járyalanǵan kúnnen baslap 6 ay ótkennen keyin kúshke kiredi.
Qońırat rayonı ádillik bólimi yuridikalıq xızmet kórsetiw orayı bas yuriskonsultı Annarazov Ruslan Yuldashevich