Янгиликлар
25
Miynet nızamshılıǵında hayal qızlarǵa qanday jeńillikler bar?
Miynet nızamshılıǵında hayal qızlarǵa qanday jeńillikler bar?
Miynet nızamshılıǵımızda hayallarǵa bir qatar jeńillikler berilgen bolıp, olardıń kópshiligi miynet qılıw boyınsha huqıqlardı támiyinlewge qaratılǵan.
Atap aytqanda :
- Hámledar hayallardı hám on tórt jasqa tolmaǵan balası (on altı jasqa tolmaǵan mayıp balası) bar hayallardı olardıń razılıǵısız tungi jumıslarǵa, jumıs waqtınan tısqarı jumıslarǵa, dem alıw kúnlerindegi jumıslarǵa tartıwǵa hám xızmet saparına jiberiwge jol qoyılmaydı. Usınıń menen birge hámledar hayallardı hám úsh jasqa tolmaǵan balası bar hayallardı tungi jumıslarǵa tartıwǵa bunday jumıs ana hám balanıń den sawlıǵı ushın qáwip tuwdırmaslıǵın tastıyıqlaytuǵın medicinalıq juwmaq bolǵan táǵdirde jol qoyıladı.
- Úsh jasqa tolmaǵan balaları bar, byudjet esabınan finanslıq tárepten támiyinlenetuǵın mákemeler hám shólkemlerde islep atırǵan hayallarǵa jumıs waqtıniń háptesine 35 saattan aspaytuǵın qısqartılǵan múddeti belgilenedi.
- Hámledar hayaldıń, on tórt jasqa tolmaǵan balası (on altı jasqa tolmaǵan mayıp balası ) bar hayaldıń, sonday-aq qáwenderliginde sonday balası bar hayaldıń yamasa shańaraqtıń biytap aǵzasın baǵıw menen bánt bolǵan shaxstıń sorawına kóre, jumıs beriwshi medicinalıq juwmaqqa muwapıq olarǵa tolıqsız jumıs kúni yamasa tolıqsız jumıs háptesin belgilewi tiyis.
- On tórt jasqa tolmaǵan bir hám odan artıq balanı (on altı jasqa tolmaǵan mayıp balanı ) tárbiyalap atırǵan jalǵız áke, jalǵız anaǵa hám múddetli áskeriy xızmetti ótep atırǵan áskeriy xızmetkerlerdiń hayallarına jıllıq dem alıslar, olardıń qálewine kóre jaz waqtında yamasa olar ushın qolay bolǵan basqa waqıtta beriledi.
- On eki jasqa tolmaǵan eki hám odan artıq balası yamasa on altı jasqa tolmaǵan mayıp balası bar hayallarǵa hár jılı tórt kalendar kúninen kem bolmaǵan múddet penen is haqı saqlanǵan halda qosımsha dem alıs beriledi.
-On eki jasqa tolmaǵan eki hám odan artıq balası yamasa on altı jasqa tolmaǵan mayıp balası bar hayallarǵa olardıń qálewine kóre, hár jılı on tórt kalendar' kúnden kem bolmaǵan múddet penen miynet haqı saqlanbaǵan halda dem alıs beriledi. Bunday demalıs jıllıq dem alısqa qosıp beriliwi yamasa jumıs beriwshi menen kelisip belgilenetuǵın dáwirde odan bólek (tolıq yaki bólimlerge bolıp ) paydalanılıwı múmkin.
- Hayallarǵa jetpis kalendar' kún hámledarlıq hám tuwǵannan keyin eliw altı kalendar' kún (tuwıw qıyın keshken yamasa eki hám odan artıq bala tuwılǵan jaǵdaylarda - jetpis kalendar' kún) múddeti menen hámledarlıq hám tuwıw dem alısları berilip, mámleket social qamsızlandırıwı boyınsha napaqa tólenedi. Hámledarlıq hám tuwıw demalısı tuwıwǵa shekem ámelde bunday dem alıstıń neshe kúninen paydalanılǵanına qaramastan áyelge tolıq beriledi.
- Hayal, onıń qálewine kóre, balası úsh jasqa tolǵanga shekem balanı kútimi ushın miynet haqı saqlanbaǵan qosımsha demalıs da beriledi. Balanı kútimi demalısları dáwirinde hayaldıń jumıs jayı (lawazımı ) saqlanadı. Bul demalıslar miynet stajına lekin hámmesin jıynaǵanda kobi menen altı jıl, sonday-aq qánigeligi boyınsha jumıs stajına da qosıladı.
- Eki jasqa tolmaǵan balası bar hayallarǵa, dem alıw hám awqatlanıw ushın beriletuǵın tánepisten tısqarı, balanı awqatlantırıw ushın qosımsha tánepisler de beriledi. Bul tánepisler keminde hár úsh saatta bir ret hár biri otız minuttan kem bolmaǵan múddet menen beriledi. Eki jasqa tolmaǵan eki hám odan artıq balası bolǵan táǵdirde, tánepistiń múddeti keminde bir saat etip belgilenedi. Balanı awqatlantırıw ushın beriletuǵın tánepisler jumıs waqıtına kiritiledi hám ortasha aylıq is haqı esaplanadı. Balası bar hayaldıń qálewine kóre, balanı awqatlantırıw ushın beriletuǵın tánepisler dem alıw hám awqatlanıw ushın belgilengen tánepiske qosıp beriliwi yamasa ulıwmalastırılıp, jumıs kúniniń (jumıs smenasınıń ) basına yamasa aqırına kóshirilip, jumıs kúni (jumıs smenası ) soǵan muwapıq qısqartılıwı múmkin.
- Hámledar hayallar hám úsh jasqa tolmaǵan balası bar hayallar menen dúzilgen miynet shártnamasın jumıs beriwshiniń baslaması menen biykarlawǵa jol qoyılmaydı, kárxananıń pútkilley saplastırılıwı bunnan tısqarı, bunday jaǵdaylarda miynet shártnaması olardı álbette jumısqa jaylastırıw shárti menen biykar etiledi. Usı hayallardı jumısqa jaylastırıwdı jergilikli miynet organı olardı jumısqa jaylastırıw dáwirinde nızam hújjetlerinde belgilengen tiyisli social tólewler menen támiyinlegen halda ámelge asıradı.
- Hámledarlıǵı yamasa balası bar ekenligi sebepli hayallardı jumısqa qabıllawdan bas tartıw hám olardıń miynet haqın kemeytiw qadaǵan etiledi. Hámledar hayaldı yamasa úsh jasqa tolmaǵan balası bar hayaldı jumısqa qabıllawdan bas tartqan táǵdirde jumıs beriwshi bunıń sebeplerin olarǵa jazba túrde xabarlawı shárt.
- Medicinalıq nátiyjege muwapıq hámledar hayallardıń islep shıǵarıw normaları, xızmet kórsetiw normaları kemeytiriledi yamasa olar aldınǵı jumıslarındaǵı ortasha aylıq miynet haqı saqlanǵan halda jeńillew yaki qolaysız islep shıǵarıw faktorları bolmaǵan jumısqa ótkeriledi. Hámledar áyelge jeńillew yamasa qolaysız islep shıǵarıw faktorlarınıń tásiri bolmaǵan jumıs beriw máselesi sheshilgenge shekem, ol usınıń nátiyjesinde jumısqa shıqpaǵan barlıq jumıs kúnleri ushın ortasha aylıq miynet haqı saqlanǵan halda jumıstan azat etiliwi kerek. Eki jasqa tolmaǵan balası bar hayallar aldınǵı jumısın orınlawı múmkin bolmaǵan táǵdirde, balası eki jasqa tolǵanga shekem aldınǵı jumısındaǵı ortasha aylıq miynet haqı saqlanǵan halda jeńillew yamasa qolaysız islep shıǵarıw faktorlarınıń tásiri bolmaǵan jumısqa ótkeriledi.
- Mámleket shólkemleri hám basqa byudjet shólkemleriniń informaciya texnologiyaları hám kommunikaciyaların rawajlandırıw ushın juwapker bolǵan hámledar hayallar, balanı eki hám úsh jasqa shekem baǵıw boyınsha demalısta bolǵan hayallar, olar jumısqa shıqqannan keyingi birinshi jıl dawamında attestaciyadan ótkerilmeydi.
- Tiyisli jumıs stajına iye bolǵan hayallar eliw tórt jasqa tolǵanda pensiyaǵa shıǵıwı múmkin.
Qońırat rayonı ádillik bólimi
yuridikalıq xızmet kórsetiw orayı
bas yuriskonsul'ti M.Seytbayeva