Янгиликлар
25
Jer salıǵınan kimler azat etiledi?
Jer salıǵınan kimler azat etiledi?
Salıq kodeksine muwapıq, jer salıǵınan tómendegiler azat etiledi:
1. «Ózbekstan Qaharmanı», Sovet Awqamı Qaharmanı, Miynet Qaharmanı ataqlarına iye bolǵan, úsh dárejedegi Shuxrat ordeni menen sıylıqlanǵan puqaralar (salıq jeńilligi ataqlardıń gúwalıǵı, dáptershesi yamasa qorǵanıw bóliminiń maǵlıwmatnaması tiykarında beriledi).;
2. Urıs mayıpları hám qatnasıwshıları, sonday-aq olarǵa teńlestirilgen shaxslar (salıq jeńilligi urıs qatnasıwshısınıń (mayıbınıń) gúwalıǵı yamasa qorǵanıw bóliminiń yaki basqa wákillikli uımnıń maǵlıwmatnaması tiykarında beriledi);
3. I hám II topar mayıplıǵı bolǵan shaxslar (bul jeńillik pensiya gúwalıǵı yamasa medicinalıq-sociallıq ekseprt komissiyasınıń maǵlıwmatnaması tiykarında beriledi);
4. Jalǵız pensionerler. Jalǵız yamasa er jetpegen balaları menen yaki mayıplıǵı bolǵan balası menen birge óz aldına úyde jasawshı pensionerler jalǵız pensioner esaplanadı (bul jeńillik pensiya gúwalıǵı yamasa Pensiya qorınıń rayon (qala) bóliminiń maǵlıwmatnaması hám puqaralar jıyınınıń maǵlıwmatnaması tiykarında beriledi);
5. Baǵıwshısınan ayırılǵan kóp balalı shańaraqlar, yaǵnıy ata-anadan birewi yamasa ekewi de qaytıs bolǵan 4 hám onnan artıq balaları bar shanaraqlar (bul jeńillik Pensiya qorınıń rayon (qala) bóliminiń maǵlıwmatnaması tiykarında beriledi);
6. Chernobıl AESdaǵı avariya aqıbetlerin saplastırıwda qatnasqanı ushın jeńillikler alatuǵın puqaralar, sonday-aq waqıtsha jiberilgen yamasa xızmet saparına jiberilgen (bul jeńillik medicinalıq-sociallıq ekseprt komissiyasınıń maǵlıwmatnaması, mayıplıǵı haqqındaǵı gúwalıq, Chernobıl AESdaǵı avariya aqıbetlerin saplastırıwda qatnasqanı haqqındaǵı gúwalıq, sonday-aq wákillikli uyımlar tárepinen berilgen basqa hújjetler tiykarında beriledi);
7. Energiya resurslarınan tolıq úzilgen halda quyash panellerinen paydalanıp atırǵan turaq jay iyeleri quyash panelleri ornatılǵan kúnnen baslap 3 jıl múddetke (bul jeńillik energiya jetkerip beriwshi kárxananıń maǵlıwmatnaması tiykarında beriledi);
Bul jeńillik jeke tártiptegi turaq jay qurıw, diyqan xojalıǵın alıp barıw ushın berilgen jer uchastkalarına qollanıladı. Bul sheklew joqarıdaǵı 5-bántte kórsetilgenlerge tásir etpeydi.
️ Bul salıq jeńilligi puqaranıń saylawına qarap tek ǵana bir jer uchastkasına qollanıladı. Bul sheklew energiya resurslarınan tolıq úzilip quyash panellerinen paydalanıp atırǵan turaq jaylardıń jer uchastkasına tásir etpeydi.
Puqaralar salıq jeńilliginen paydalanıwı ushın jeńillikke bolǵan huqıqtı tastıyıqlawshı hújjetti jer uchastkası jaylasqan jerdegi salıq uyımına tapsırıwı lazım.
Salıq boyınsha jeńillik belgilengen jaǵdayda bul salıq jeńillikke bolǵan huqıq payda bolǵan aydan baslap tólenbeydi.
Salıq jılına teń muǵdarda ekige bólip 15-aprelge hám 15-oktyabrge shekem tóleniwi kerek.
Tajibaev Rustam Baxadirovich
Qanlıkól rayonı ádillik bólimi
Yuridikalıq xızmet kórsetiw
orayınıń baslıǵı