Янгиликлар

Tálim kreditin alıw tártibi qanday?

---

Tálim kreditin alıw tártibi qanday?

Ministrler Kabinetiniń 2021-jıl 18-avgusttaǵı 527-sanlı qararına muwapıq, tálim krediti mámleketlik, menshik oqıw orınlarına hám sırt el oqıw orınlarınıń filiallarına kúndizgi, sırtqı hám keshki formasına bakalavriat hám magistraturaǵa tólemli-kontrakt tiykarında oqıwǵa kirgen yamasa oqıwın kóshirgen Ózbekstan puqaralarına ajıratıladı.
Kredit tómendegi jaǵdaylarda berilmeydi:
-    «super kontrakt»tı tólewge;
-    sırt el puqaralarına;
-    puqaralıǵı bolmaǵan shaxslarǵa.
Kredit stavkası (procenti) – Oraylıq banktıń tiykarǵı stavkası (házirgi kúnde 14%). Bunda tiykarǵı stavka azaysa, kredit procenti de azayadı. Al stavka kóterilse, kredit procenti ózgermesten qaladı.
Hayal-qızlar ushın kredit procentsiz ajıratıladı.
Tólew múddeti: kredit alınǵan waqıttan baslap kredittiń procenti tólep barıladı, al kredittiń tiykarǵı bólegi studenttiń oqıwı rásmiy tamamlanǵan kúnnen keyingi jetinshi aydan baslap 7 jıl dawamında qaytarıladı.
Kredit alıwda studenttiń dáramatı bar bolǵan shańaraq aǵzaları da birgelikte kredit alıwshı retinde qatnasıwı múmkin.
Tálim kreditin ajıratıw boyınsha mámleket 12 bank (Mikrokredit bank, Asaka bank, Agro bank, Xalıq banki, Ipoteka bank, Qishloq qurilish bank, Turan bank, Orient finans bank, Milliy bank, Ozsanoatqurilish bank, Xamkor bank, Aloqa bank) penen shártnama dúzgen.
Tálim kreditin alıw ushın usı banklerge tómendegi hújjetlerdi tapsırıw kerek:
arza;
student penen oqıw ornı ortasında dúzilgen shártnama hám oǵan qosımsha esap beti (fakturasi).
Shártnamada oqıwdıń juwmaqlanatuǵın waqtı hám bir jıl ushın kontrakt pulınıń muǵdarı kórsetiliwi kerek.
girew shártnaması.
Kem támiyinlengen (“Sociallıq qorǵaw birden bir reestri”ne kirgen) shańaraq aǵzalarınan girew hám kepillik soralmaydı.
“Sociallıq qorǵaw birden bir reestri”ne kirgenligin tastıyıqlawshı maǵlıwmatnama;
birgelikte kredit alıwshı shaxslardıń hújjetleri hám maǵlıwmatları;
banktıń ishki kredit siyasatı boyınsha talap etiletuǵın basqa hújjetler.
Bank arzanı 5 jumıs kúninde qarap shıǵıp kredit ajıratıw yamasa ajıratpaw haqqında qarar qabıl etedi. Kredit shártnaması bir jılǵa dúzilip, keyingi jıllar ushın qosımsha kelisim dúzip barıladı.

Tajibaev Rustam Baxadirovich
Qanlıkól rayonı ádillik bólimi
Yuridikalıq xızmet kórsetiw
orayınıń baslıǵı

---