Янгиликлар
18
Jańa Konstituciya: Shańaraq, balalar hám jaslar
Jańa Konstituciya: Shańaraq, balalar hám jaslar
Salamat áwlad hár qanday jámiyettiń eń úlken baylıǵı bolıp esaplanadı. Ásirese, balalar hám jasları qádirlenbegen, ǵamxorlıqqa alınbaǵan hár qanday jámiyet hesh qashan turaqlı hám tez, jedel rawajlana almaydı.
Búgingi kúnde jámiyetimizdiń tiregi bolǵan shańaraqtıń bekkemligin támiynlew, onıń huqıqıy tiykarların ele de tereńlestiriw maqsetinde mámleketimiz kóleminde unamlı jumıslar alıp barılmaqta. Atap aytqanda mámleketimizde jańadan qabıl etilgen Konstituciyamızdıń XIV babı Shańaraq, balalar hám jaslar dep atalıwında úlken mazmun bar. Sebebi onıń 76-statyasında shańaraq jámiyettiń tiykarǵı buwını bolıp tabıladı hám de ol jámiyet hám mámlekettıń qorǵawında bolıw huqıqına iye dep belgilengen.
Al, neke Ózbekstan Respublikası xalqınıń ata-babalarımızdıń milliy dástúrli shańaraqlıq qádriyatlarına, nekeleniwshilerdiń ıqtıyarıy razılıǵına hám teń huqıqlılıǵına tiykarlanadı.
Bunnan tısqarı, mámleket shańaraqtıń tolıq rawajlanıwı ushın sociyallıq, ekonomikalıq, huqıqıy hám basqa da sharayatlardı jaratadı dep kórsetilgen. Demek bunnan kórinip turǵanınday, elimizde jámiyetimizdiń tiykarǵı buwını bolǵan shańaraqlar hesh qashan dıqqat-itibardan shette qalmaytuǵınlıǵın túsinip alsaq boladı. Qala berse, 78-statyasında “Balalar ata-anasınıń shıǵısına hám puqaralıq halatına qaramastan nızam aldında teń. Balanıń huqıqları, erkinlikleri hám nızamlı máplerin támiyinlew hám qorǵaw, onıń fizikalıq, aqılıy hám mádeniy jaqtan tolıq kamalǵa keliwi ushın eń jaqsı sharayatlardı jaratıw mámlekettiń minneti bolıp tabıladı”, dep kórsetip berilgen.
Jańa Konstituciyamızda atap ótilgenindey, analıq , atalıq hám balalıq mámleket tárepinen qorǵaladı.
Negizinde, mámleket hám jámiyet balalarda hám jaslarda milliy hám ulıwma insanıylıq qádriyatlarǵa sadıqlıqtı, mámleketimizdiń hám xalqımızdıń bay mádeniy miyrasın maqtanısh etiw, watan súyiwshilik hám watanǵa bolǵan muhabbat sezimin qáliplestiriw haqqında ǵamxorlıq etedi.
Bala huqıqları ulıwma alǵanda insan huqıqları menen birdey áhmiyetke iye. Eń áwele, bala huqıqları, yaǵnıy insan huqıqları Ózbekstan Respublikası Konstituciyasında bekkemlengenligi bunıń ayqın dálili dep atap ótsek qátelespeymiz.
Bala huqıqları – hár bir bala hesh qanday sheklewlersiz iye bolıwı lazım bolǵan huqıq hám erkinlik bolıp esaplanadı.
Erteńgi keleshegimizdi jaslarǵa isenip tapsırıw ushın hár qanday jámiyet ósip kiyatırǵan jas áwladtı hár tárepleme qollap quwatlawı, isenim bildiriwi, olardıń zamanagóy hám tereń bilim alıwı, sonday-aq, salamatlıǵın bekkemlewi ushın sport penen shuǵıllanıwına, mádeniy dem alıwına sharayat jaratıp beriliwi talap etiledi. Itibarlı tárepi sonda, biziń elimizde jaslarımızdıń oqıp bilim alıwına, salamatlıǵın bekkemlewine mámleketimiz tárepinen ayrıqsha ǵamxorlıq kórsetilip atırǵanlıǵın maqtanısh penen atap ótsek arzıydı. Solay eken, balalarımızdı bilimli, tárbiyalı, aqıllı etip ósiriw tiykarǵı wazıypamız bolıwı kerek.
Taqıyatas reyonı ádillik bólimi
PHAJ bólimi birinshi dárejeli
inspektorı G.Nurimova