Янгиликлар
14
Pedagoglarǵa qanday jaǵdaylarda materiallıq járdem beriledi?
Pedagoglarǵa qanday jaǵdaylarda materiallıq járdem beriledi?
Ózbekstan Respublikası Ministrler Kabinetiniń 2019-jıl 30-sentyabr kuni «Ulıwma orta bilim beriw mekemeleriniń órnek kórsetken xızmetkerlerin materiallıq xoshametlew tártibin jedellestiriw haqqında»ǵı 823-sanlı qararı qabıl etilgen bolıp, usı qarar menen «Ulıwma orta bilim beriw mekemeleriniń órnek kórsetken xızmetkerlerin xoshametlewdiń direktor qorın shólkemlestiriw hám onıń qarjılarınan paydalanıw tártibi haqqında»ǵı Reje tastıyıqlanǵan.
Direktor qorı ulıwma orta bilim beriw mekemelerinde oqıw-tárbiya procesiniń ónimdarlıǵı hám sıpatın asırıwdı xoshametlew, pedagog, psixolog hám kitapxanashı xızmetkerlerge aylıq ústeme belgilew, ulıwma orta bilim beriw mekemeleri xızmetkerlerin sıylıqlaw hám olarǵa materiallıq járdem beriw, pedagog xızmetkerlerdiń kásiplik tájriybesi hám mamanlıǵın asırıwdı xoshametlewdi kúsheytiriw maqsetinde shólkemlestirilgen.
Pedagog, psixolog hám kitapxanashı xızmetkerlerdiń bazalıq tarif stavkasına hár aylıq ústeme belgilew, ulıwma orta bilim beriw mekemeleri xızmetkerlerin sıylıqlaw hám olarǵa materiallıq járdem beriw ulıwma orta bilim beriw mekemelerinde shólkemlestirilgen ústemeler belgilew, materiallıq xoshametlew hám materiallıq járdem beriw boyınsha isshi toparlar tárepinen ámelge asırıladı.
Direktor qorı qarjıları esabınan ulıwma orta bilim beriw mekemesiniń pedagog, psixolog hám kitapxana xızmetkerleriniń bazalıq tarif stavkasına hár aylıq ústeme belgilew, ulıwma orta bilim beriw mekemeleri xızmetkerlerin sıylıqlaw hám olarǵa materiallıq járdem beriw haqqında Isshi topardıń qararı tiykarında ulıwma orta bilim beriw mekemesi direktorınıń buyrıǵı shıǵarıladı.
Ulıwma orta bilim beriw mekemeleri xızmetkerlerine materiallıq járdem kalendar jıl dawamında eki lawazım is haqı (muǵállimniń tarif stavkası) muǵdarına shekem xızmetkerdiń ózi hám jaqın tuwısqanı (ákesi, anası, ómirlik joldası, perzenti):
- qaytıs bolǵanda,
- awır kesellikke shalınǵanda,
- tábiyiy apattan zıyan kórgende kórsetiledi.
Ámeliyatta isshi topar aǵzaları tárepinen pedagog xızmetkerdiń ózi yaki jaqın tuwısqanı awır kesellikke shalınǵanlıǵı múnásibeti menen materiallıq járdem alıw haqqındaǵı múrájetlerin kórip shıǵıwda ayırım talaplarǵa itibar bermesten nızamsız túrde materiallıq járdem beriw jaǵdayları kóp ushıraspaqta.
Mısalı ushın xızmetkerlerdiń jaqın tuwısqanlıq dárejesine onıń aǵası, ajapası, inisi, qarındası kirmeytuǵınlıǵı yaki kesellik dárejesine qaramastan, jeńil yaki orta dárejedegi keselligi ushın materiallıq járdem beriw jaǵdayları kóp ushıraspaqta.
Dúnya júzlik den-sawlıqtı saqlaw shólkeminiń túsinigine kóre awır kesellik bul - ólim qáwipi joqarı bolǵan hám insánnıń kúndelik iskerligine yaki ómir sıpatına keri tásir kórsetetuǵın yaki ǵamhorlıq etiwshige hádden zıyat qıyınshılıq keltirip shıǵaratu-ǵın, ayırım jaǵdaylarda mayıplıqqa alıp keliwshi den-sawlıq jaǵdayı túsiniledi.
Usı orında «Awır keselliklerdiń dizimi hám túrlerin qayaqtan bilsek boladı» degen soraw tuwılıwı tábiyiy.
Ózbekstan Respublikası Ministrler Kabinetiniń 2022-jıl 8-fevral kungi «Medicinalıq-sociallıq ekspertiza xızmetin shólkemlestiriw sistemasın hám iskerligin shólkemlestiriwge baylanıslı normativ-huqıqıy hujjetlerdi tastıyıqlaw haqqında»ǵı 62-sanlı qararı menen tastıyıqlanǵan:
- “18 jasqa shekemgi bolǵan balalarda mayıplıqqa alıp keliwshi tiykarǵı kesellikler dizimi hám usı keselliklerde mayıplıqtı belgilew talapları” haqqındaǵı 8-Qosımshası;
- “18 jas hám odan úlken jastaǵı shaxslarda mayıplıqqa alıp keliwshi tiykarǵı kesellikler dizimi hám usı keselliklerde mayıplıqtı belgilew talapları” haqqındaǵı 9-Qosımshasında kórsetip ótilgen.
Juwmaqlap aytqanda ulıwma orta bilim beriw mekemesi xızmetkerleri hám isshi topar aǵzalarınan joqarıda aytıp ótilgen qaǵıydalarǵa ámel etpegen jaǵdayda nızamshılıqta belgilengen juwapkershilik kelip shıǵıwına sebep boladı.
Salamat BAZARBAEV,
Kegeyli rayonı Ádillik bólimi
Yuridikalıq xızmet kórsetiw orayı
bas yuriskonsultı.