Янгиликлар
14
Jumıs orınların rezervke qoyıw tártibin bilesizbe?
Jumıs orınların rezervke qoyıw tártibin bilesizbe?
Bul soraw byudjet mekemelerinde islewshi is beriwshiler hám kadrlar boyınsha qániygelerdi qızıqtırıwı tábiyiy. Aldın «Jumıs orınların rezervke qoyıw degenimiz ne?» degen sorawǵa juwap berip ótpekshimen.
Demek Ózbekstan Respublikası Ministrler Kabinetiniń 2017-jıl 5-dekabr kúngi «Sociallıq qorǵawǵa mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslardı jumısqa ornalastırıw ushın jumıs orınlarınıń eń kem sanın belgilew hám rezervke qoyıw tártibin jánede jedellestiriw is-ilájleri haqqında»ǵı 965-sanlı qararında kórsetip ótilgenindey:
Jumıs orınların rezervke qoyıw – bul shólkem (is beriwshi) tárepinen sociallıq qorǵawǵa mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslar ushın óz qarjıları esabınan shólkemlestirilgen jumıs orınları túsiniledi.
Usı qarardıń maqseti –sociallıq qorǵawǵa mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslardı jumısqa ornalastırıw ushın jumıs orınların rezervke qoyıw tártibin, sonday-aq, is beriwshiler-diń bul baǵdardaǵı juwapkershiligin asırıw bolıp esaplanadı.
Xalıqtıń bántligine kómeklesiw maqsetinde sociallıq qorǵawǵa mútáj, jumıs tabıwda qıynalıp atırǵan hám miynet bazarında teń shártlerde básekilese almaytuǵın shaxslar (keyingi orınlarda mútájler dep ataladı) ushın jumıs orınlarınıń eń kem sanı rayon xákimleri tárepinen belgilenedi, sonday-aq shólkemler tárepinen rezervke qoyıladı.
Mútájler kategoriyasına tómendegiler kiredi:
- on tórt jasqa shekemgi hám mayıplıǵı bolǵan balaları bar bolǵan jalǵız ata, jalǵız ana hám kóp balalı shańaraqlar;
- ulıwma orta hám orta-arnawlı, kásip-óner bilim beriw mekemelerin tamamlaǵan jaslar, sonday-aq, joqarı bilimlendiriw mekemelerin mámleketlik grant boyınsha bilim alǵan pitkeriwshiler;
- qatardaǵı shaqırıw rezervinde xızmetti ótegen hám Ózbekstan Respublikası Qurallı kúshleri qatarınan múddetli áskeriy xızmetten bosatılǵan shaxslar;
- mayıplıǵı bolǵan shaxslar hám pensiya aldı jasındaǵı shaxslar;
- jazanı orınlaw mekemelerinen azat etilgen yaki sudtıń qararına kóre medicinalıq tústegi májbúrlew sharaları qollanılıwınan azat etilgen shaxslar;
- adam sawdası jábirleniwshileri.
Usı kategoriyadan tısqarı atiraptaǵılar ushın qáwip tuwdırmaytuǵın sociallıq áhmiyetke iye keselliklerden azap shegiwshi shaxslar ushın hám jumıs orınları rezervke qoyılıwı mumkin.
Mútájler ushın jumıs orınlarınıń eń kem sanın belgilew tómendegi múddetlerge muwapıq rayon xákimi tárepinen ámelge asırıladı.
Rayon xákimi tárepinen mútájlerdiń sanı ózgeriwine qarap olar ushın belgilenetuǵın jumıs orınlarınıń eń kem sanı hár jılı qayta kórip shıǵıladı.
Bunıń ushın belgileniwi kerek bolǵan jumıs orınlarınıń eń kem sanın hám olarǵa qoyılatuǵın talaplardı anıqlaw ushın rayon xákiminiń social-ekonomikalıq rawajlandırıw, xızmetler tarawı hám isbilermenlik máseleleri boyınsha orınbasarı basshılıq etetuǵın keminde
5 adamnan ibarat quramda arnawlı komissiya shólkemlestiriledi.
Rayonlıq kámbaǵallıqtı qısqartıw hám bántlikke kómeklesiw bólimi - komissiyası-nıń isshi toparı, bólimniń jumıssızlardı jumısqa ornalastırıw hám socallıq qollap-quwatlaw bólimi baslıǵı – komissiyanıń xatkeri esaplanadı.
Xızmetkerleriniń dizimdegi ortasha sanı 20 adamnan artıq bolǵan shólkemler (is beriwshiler) hár jılı:
- 1-avgustqa shekem lawazımlardı esapqa alǵan xalda kelesi jıl ushın rezervke koyılatuǵın jumıs orınlarınıń ulıwma sanın belgileydi;
- 15-avgustqa shekem kelesi jıl ushın jumıs orınlarınıń rezervke qoyılatuǵın ulıwma sanı haqqındaǵı maǵlıwmatlardı rayonlıq kámbaǵallıqtı qısqartıw hám bántlikke kómeklesiw bólimine usınadı.
Kelesi jıl ushın rezervke qoyılatuǵın jumıs orınlarınıń ulıwma sanı haqqında shólkemlerden alınǵan maǵlıwmatlar tiykarında rayonlıq kámbaǵallıqtı qısqartıw hám bántlikke kómeklesiw bólimi tárepinen mútájler ushın jumıs orınlarınıń eń kem sanın belgilew haqqındaǵı usınıslar ulıwmalastırıladı hám hár jılı 1-sentyabrge shekem rayon aymaǵında jaylasqan shólkemler boyınsha tiyisli qarar qabıl etiliwi ushın rayon xákimine kiritiledi.
Rayonlıq kámbaǵallıqtı qısqartıw hám bántlikke kómeklesiw bólimi tárepinen usınılǵan rezervke qoyılǵan jumıs orınları haqqındaǵı ulıwmalastırılǵan usınıslar tiykarında rayon xákimiyatı hár jılı usı jıldıń 1-oktyabrge shekem mútájler ushın jumıs orınlarınıń eń kem sanın belgilew haqqında qarar qabıl etedi.
Rayon xákiminiń qararı tiykarında rayonlıq kámbaǵallıqtı qısqartıw hám bántlikke kómeklesiw bólimi hár jılı usı jıldıń 5-oktyabrge shekem usı aymaqta jaylasqan shólkemler boyınsha rezervge qoyılıwı kerek bolǵan jumıs orınları sanı haqqındaǵı maǵlıwmatlardı rezervge qoyılatuǵın jumıs orınlarına qoyılatuǵın talaplardı, shaxslar kategoriyaların jumısqa ornalastırıw ushın olardıń imkániyatların, xoshametlew sharaların, sonday-aq, rayon xákiminiń jumıs orınların rezervge qoyıw haqqındaǵı qararların orınlamaǵanda shólkem lawazımlı shaxslarına qollanılatuǵın sankciyalardı esapqa alǵan xalda jetkeredi.
Shólkem taza jıl baslanıwınan aldın 10 kúnnen keshiktirmey mútájlerdi jumısqa ornalastırıw ushın mútájler ushın rezervge qoyılatuǵın jumıs orınları ulıwma sanınıń 25 % muǵdarında jumıs orınları rezervge qoyılıwı hám tayarlıǵın támiyinlewi, sonday-aq, bull haqqında taza jıl baslanǵanǵa shekem rayonlıq kámbaǵallıqtı qısqartıw hám bántlikke kómeklesiw bólimin habardar etiwi shárt.
Mútájler ushın jumıs orınların rezervge qoyıw boyınsha rayon xákiminiń qararın orınlamaǵan shólkemniń lawazımlı shaxsına, sonday-aq, olardı jumısqa qabıl etiw tiykarsız túrde bas tartılǵanlıǵı ushın nızamshılıqta belgilengen tártipte xákimshilik juwapkershilik belgilenedi.
Salamat BAZARBAEV,
Kegeyli rayonı Ádillik bólimi
Yuridikalıq xızmet kórsetiw orayı
bas yuriskonsultı.