Янгиликлар
31
Ipoteka krediti tiykarinda mámleketlik subsidiya aliwǵa arza beriw tártipleri
Ipoteka krediti tiykarinda mámleketlik subsidiya aliwǵa arza beriw tártipleri
Búgingi kúnde mámleketimizde ipoteka krediti tiykarında turaq jay satıp alıw, sonday-aq jeke tártiptegi turaq jaylardı qurıw hám rekonstrukciya qılıw ushın qarjılar ajratıw ilájları alıp barılmakta.
Bunda Ózbekstan Respublikası Ministrler Kabinetiniń 2020-jıl 25-marttaǵı 182-sanlı qararı qosımshasında “Turaq jay satıp alıw yaki jeke tártiptegi turaq jaylardı qurıw hám rekonstrukciya qılıw ushın puqaralarǵa subsidiya tolew tártibi haqqında”ǵı Reje (keyingi orınlarda – Reje dep júritiledi) tastıyıqlanǵan.
Usı Rejeniń 2-babında subsidiya boyınsha arza beriw tártipleri belgilengen bolıp, oǵan muwapıq Rejeniń 10-bántinde aymaqlarda qurılǵan birlemshi turaq jay bazarındaǵı kvartiralardı satıp alıwǵa yaki jeke tártiptegi turaq jaylardı qurıw hám rekonstrukciya qılıwǵa ajratılatuǵın ipoteka kreditleri boyınsha subsidiya beriletuǵın talapkerler komissiya hám juwapker shólkemler tarepinen nızamlılıq, ashıqlılıq hám adillik principleri tiykarında tańlanadı dep belgilengen.
Sonday-aq, arza beriwshi ipoteka kreditleri boyınsha subsidiya alıw ushın qálegen rayon(qala) Mámleketlik xızmetler oraylarına ózi kelip múrájat etedi yaki Birden-bir interaktiv mámleketlik xızmetler portalında mámleketlik xızmetten elektron túrde paydalanıw ushın dizimnen ótedi. Ózi kelip múrajat etkende, Mámleketlik xızmetler orayı qánigesi arza beriwshi atınan, Birden-bir interaktiv mámleketlik xızmetler portalı arqalı múrájat qılınǵanda arza beriwshi mustaqıl túrde usı Rejening 5-qosımshasına muwapıq mámleketlik xızmetten paydalanıw ushın anketa-arzanı elektron túrde toltıradı.
Arza beriwshiden usı bántte kórsetilmegen maǵlıwmat hám hújjetlestiriwdi hámde anketa-arzada kórsetilgen maǵlıwmatlardan tısqarı basqa hújjetlerdi talap qılıw qatań túrde qadaǵan etiledi.
Miynet migrantları atınan ipoketa kreditleri boyınsha subsidiya alıw haqqındaǵı arzanı onıń shańaraq aǵzaları notarial tártipte tastıyıqlanǵan isenimnama tiykarında beriwi múmkin. Mámleketlik xızmetler orayı hám Birden-bir interaktiv mámleketlik xızmetler portalı arqalı kórsetiletuǵın xızmetler hám oray tárepinen tiyisli shólkemlerge soraw jiberiw arqalı maǵlıwmatlarǵa anıqlıq kiritiw tólemlersiz (biypul) ámelge asırıladı.
Arza beriwshi tarepinen ipoteka kreditleri boyınsha subsidiya alıw ushın arza jıl dawamında tapsırılıwı múmkin. Arza beriwshi rayon(qala) Mámleketlik xızmetler orayı yaki Birden-bir interaktiv mámleketlik xızmetler portalı arqalı anketa-arzada kórsetilgen maǵlıwmatlardıń isenimliligine hám durıslılıǵına juwap beredi. Birden-bir interaktiv mámleketlik xızmetler portalı arqalı múrájat etilgende, arza beriwshi anketa-arzaǵa tiykarınan zárúr bolǵan maǵlıwmatlardı ózi kiritedi.
Sonıń menen birge, Rejede juwapker shólkemler tárepinen arza beriwshini sociallıq kriteriyalar boyınsha bahalaw tártibi belgilep berilgen. Mámleketlik xızmetler orayı sorawnama toltırılǵan waqıttan baslap bir saat ishinde onı usı Rejeniń 7-bántinde nazerde tutılǵan juwapker shólkemlerge elektron túrde jiberedi.
Arza beriwshiniń arzası ol dizimge alıǵan turaqlı jasaw ornındaǵı rayon(qala) komissiyası tárepinen kórip shıǵıladı. Bunda arza beriwshi basqa aymaqtaǵı Mámleketlik xızmetler orayı arqalı arza tapsırǵan jaǵdayda Mámleketlik xızmetler orayı bir jumıs kúni ishinde arzanı puqara turaqlı dizimge alınǵan orındaǵı komissiyaǵa jiberedi.
Jeke tártiptegi turaq-jaydı qurıw hám rekonstrukciya qılıwǵa subsidiya ajratıw ushın kelip túsken arzalar puqaranıń múlk huqıqı tiykarında bar bolǵan qurıw hám rekonstrukciya qılınıwı lazım bolǵan turaq-jayı jaylasqan aymaqtaǵı komissiya tárepinen kórip shıǵıladı.
Juwapker shólkem baslıqları tárepinen subsidiya.idm.uz dástúriy támiynat sistemasında arza beriwshini sociallıq kriteriyalar boyınsha bahalaw ushın juwapker xızmetker ishki buyrıq tiykarında biriktiriledi. Biriktiriw haqqındaǵı maǵlıwmatlar sistema administraciyasına elektron formada jiberiliwi ushın komissiya xatkerine usınıladı.
Mámleketlik xızmetler kórsetiliwi ústinen
qadaǵalaw sektorı jetekshi másláhátshısı
D.K.Xabibullayeva