Янгиликлар
23
Shańaraq-muqaddes qorǵan
Shańaraq-muqaddes qorǵan
Shańaraqta ata-analar hám perzentler arasında óz-ara qarım-qatnas, múnásibetlerinde tınısh-tatıwlıq hám awızbirshilik húkim súrse, baxıtlı keleshek negiziniń bekkem tırnaǵı sanaladı Sebebi, shańaraqtıń uyıtqısı sanalatuǵın ata-analar dáslep bir-birine mehir kórsetip, balalarına órnek bolǵan jaǵdayda ǵana, shańaraqta tatıwlıq bekkemlenedi. Áhmiyetlisi, bir-birewden kewil qalıspaq jaǵdaylarına jol qoymaydı. Al, perzentleri bolsa baxıtlı balalıqtıń barlıq quwanıshların sezinip ósedi.
Turmıstıń ózi dálillep atırǵanınday, tınısh-tatıw shańaraqtı hesh qashan ırısqı-nesiybe, bereket tárk etpeydi. Kerisinshe, shańaraqta ata-ana arasında óz-ara húrmet, sıylasıq bolmay hám daw-jánjeller kún qurı emes qaytalanıp turǵan úyde, bul tárizde jaqsı jasaw múmkin emes.
Jasıratuǵını joq, jámiyetimizde hesh nársege arzımaytuǵın bánelerdi sıltawlap, ajırasıwǵa bel buwǵanlar ushırasıp turatuǵını ókinishli. Jası úlkenlerdiń aqıl-násiyatına qulaq túrmey, táwellege turmay, hátteki balalarına janı ashımay, shańaraǵın buzıp atırǵan jas shańaraq iyeleri aramızda tabılıp qaladı.
Usı jıldıń ótken dáwiri ishinde, Bozataw rayonı boyınsha ajırasıw aldında turǵan 10 nan aslam shańaraq iyelerine ajırasıwdıń awır aqıbetleri, perzentleriniń ata-anası bola tura, tiri jetimge aylanatuǵının aytıp, úgit-násiyat jumısların alıp bardıq. Áhmiyetlisi, mine usınday úgit-násiyat jumısların júrgiziwimiz óziniń unamlı nátiyjelerin bermekte.
Negizinde,shańaraq qanshama bekkem bolsa, jámiyette sonshama turaqlı boladı. Tek ǵana salamat shańaraq ortalıǵında xalqımızdıń erteńgi keleshegi qurıladı.
Ómirdiń qatal soqpaqlarında ne hádiyseler ushıraspaydı deysiz. Az ǵana qıyınshılıq hám mashqalalardı jeńip ótiw ushın ata-analar birgelikte, másláhátlesip háreket etse, súrnikpey óte aladı.
Dúnyada shańaraq tınıshlıǵı taptırmaytuǵın baylıq. Onı qásterlewimiz tiyis. Sonlıqtan da, ata-analar perzentleriniń erteńgi baxtın oylap, arzımaytuǵın daw-jánjelge jol qoymasa, bunday sıylasıqlı shańaraq álbette, baxıtqa bólenedi.
Ómirden tájiriybe toplaǵan jası úlkenler, jańadan otaw tigip atırǵan jas kelin-kúyewlerge shańaraqtıń qásterli ekenligin túsindirip barsa, úgit-násiyatlasa, bunday unamsız waqıyalardıń aldın alǵan boladı. Eń áhmiyetlisi, bunı hár birimiz wazıypamız ekenligin umıtpawımız kerek. Sonda, áytewir túsinbewshilikler sebepli, jaslar arasındaǵı ajırasıwlardıń aldın alǵan bolamız.
Sh.Shalabaev
Bozataw rayonı PHAJ bólimini inspektorı