Янгиликлар
19
Nostrifikaciya qanday ámelge asırıladı?
Nostrifikaciya qanday ámelge asırıladı?
Shet elde oqıǵanlıqtı tastıyıqlaytuǵın diplom hám hújjetlerdi tán alıw — Ózbekstan Respublikası Ministrler Kabineti janındaǵı Tálim sapasın baqlaw mámleket inspeksiyasi tárepinen ámelge asırıladı. Sonı da aytıw kerek, nızamǵa muwapıq, 1992-jıl 1-yanvar sánesinen keyin berilgen diplomlar ǵana nostrifikaciyadan ótkeriledi. Diplomdı tán alıw haqqındaǵı hújjetler ushın arzalar tek Mámleketlik xızmetleri orayları yamasa Ózbekstan Respublikasınıń Birden-bir ınteraktiv mámleketlık xızmetler portalı (my.gov.uz) arqalı qabıl etiledi. Nostrifikaciya ushın kerekli hújjetler:
• diplom hám qosımshasınıń tup nusqası (arza qabıl etilgennen keyin iyesine qaytarıladı );
• diplom hám qosımshasınıń tup nusqasın mámleketlik (ózbek) tiline awdarma etip notariustan tastıyıqlanǵanı (2 nusqada );
• pasport hám onıń nusqası;
• mámleketlık baji tolenǵenlıǵı haqqındaǵı kvitansiya usınıladı.
Sonıń menen birge, “sociallıq qorǵaw birden-bir reestri” málimleme sistemasında dizimge alınǵan shaxslarǵa, I hám II topar mayıplıǵı bolǵan shaxslarǵa da usı jıyımnıń 50 payız muǵdarında shegirme bar.
Onlayn my.gov.uz arqalı hújjet tapsırıwda joqarıda keltirilgen hújjetlerden soralganlari skaner etilip, pdf formasında arza tapsırıw processinde jaylanadı.
Diplomdı tán alınıwı ushın arza bergen talabanlardıń ekspertler tárepinen unamlı juwmaq berilgenleri arnawlı imtixan tapsıradı. Bul imtixan test sınaqları tiykarında ámelge asırılıp, test bolıwınan 10 kún aldın Tálim sapasın baqlaw mámleket inspeksıyasınıń saytı (tdi. uz)nda daǵaza etiledi. Test sınaqları talabanlardıń tálim alǵan tálim baǵdarları hám qánigelikleri boyınsha qánigelik pánlerinen ótkeriledi. Test 50 dana sorawdan ibarat bolıp, hár bir test sorawı ushın 2 minutdan, jámi 100 minut waqıt beriledi. Hár bir tuwrı orınlanǵan test sorawı 2 ball menen bahalanadı. Sınaq nátiyjelerine kóre 54 hám odan kem ball toplaǵan talabanlardıń tálim haqqındaǵı hújjetleri tán alınbaydı. Joqarıdaǵı barlıq processlerdi ámelge asırıp, test sınaqlarınan jetkilikli (54 ten joqarı ) balldı toplaǵanlarǵa Mámleketlik inspeksiya tárepinen diplom tán alınǵanlıǵı haqqındaǵı gúwalıq beriledi. Test sınaǵınan óte almaǵan talabanlar taǵı qayta arza tapsırıwları múmkin boladı. Eskertip ótiw kerek, shet el mámleketlerindegi JOO larda oqıǵan puqaralar mámleketlık kárxana hám shólkemleri, atap aytqanda, mámleket úlesi 50% dan joqarı bolǵan kárxanalarda islemekshi bolsa yamasa mámleketlik tálim mákemelerinde tálimnıń keyingi basqıshında oqıytuǵın bolsa diplomdı nostrifikatsiyadan ótkeriw talap etiledi. Jeke menshik sektor ushın bul ulıwma májburiy emes.
A.Esbergenov
Moynaq rayonı adillik bólimi
Máleketlik xızmetler orayı direktorı