Янгиликлар
18
Joqarı oqıw orınlarına kiriwde qanday jeńillikler bar?
Joqarı oqıw orınlarına kiriwde qanday jeńillikler bar?
Ózbekstan Respublikasında Joqarı oqıw orınlarınıń bakalavriat tálim jónelisine abituriyentlerdi qabıllaw hám test sınaqların ótkeriw tarawında hár jılı reformalar alıp barılmaqta. Test sınaqların tapsırıw tártibine ózgeris kiritiwde xalıqtıń hár bir qatlamınıń turmıslıq jaǵdayı esapqa alınbaqta. Usıǵan bola, abituriyentlerdi joqarı oqıw orınlarına qabıllawda hár jılı jańa jeńillikler jaratılıp atır, sonıń menen birge jeńilliklerdiń ayırımlarınan waz keshilip atır. Mısalı, usı jılı 5 jıl miynet stajına iye hayal qızlar ushın jeńilliklerdiń ajıratılıwı abituriyent hayal-qızlar ushın quwanıshlı jańalıq boldı. Bıyılǵı test sınaqlarında abituriyentler tolıq jeńillikler, kvota sheńberindegi jeńillikler yamasa imtixanlardıń bir bólegi sheńberinde ajıratılatúǵin jeńilliklerden paydalanǵan halda test sınaqların tapsırıwı múmkin. Bul boyınsha 2022-jılı Mámleketlik test orayı tárepinen “Joqarı oqıw orınlarına kiriw ushın beriletuǵın jeńillikler” haqqında maǵlıwmatnama shıǵarılıp, oǵan muwapıq jeńillikler tómendegi 6 baǵdarǵa ajıratıldı:
1. Imtixansız qosımsha mámleketlik grantı tiykarında studentlikke usınıw ushın tiykar bolatuǵın jeńillikler;
2. Imtixansız bazalıq tólem-kontrakt tiykarında studentlikke usınıw ushın tiykar bolatuǵın jeńillikler;
3. Tiyisli pán boyınsha test sınaqlarınan azat etilip, málim muǵdarda ball beriw ushın tiykar bolatuǵın jeńillikler;
4. Toplanǵan ballǵa salıstırmalı qosımsha ball alıw imkaniyatın beriw ushın tiykar bolatuǵın jeńillikler;
5. Qosımsha kvota sheńberinde tańlawda qatnasıw ushın tiykar bolatuǵın jeńillikler;
6. Qosımsha jeńillikler.
Joqarıdaǵı tarawlardıń hár biri óz ishine bir neshe jeńilliklerdi qamtıp aladı. Házirgi kúnde mámleketimizde joqarı oqıw orınlarına tapsırıwda jámi 42 túrdegi jeńillik berilgen bolıp, olardan áskeriy xızmetshilerdiń perzentleri, respublika hám xalıqaralıq sport jarısları jeńimpazları, respublika pán olimpiadaları jeńimpazları, “Temurbekler mektebi” pitiriwshileri test sınaqlarında jeńillikke iye ekenligin mısal etip kórsetsek boladı.
Abituriyentlerge joqarı oqıw orınlarınıń bakalavriat tálim baǵdarlarına kiriwde jeńillikler húkimettiń tiyisli qararları (Ózbekstan Respublikası Prezidentiniń párman hám qararları, sonıń menen birge Ministrler Kabinetiniń qararları) tiykarında beriledi.
Nókis rayonı ádillik bólimi
bas másláhátshisi A.Dastenov