Янгиликлар
20
#Konstituciyanı_úyrenemiz
Konstituciyanıń 15-statyası (https://lex.uz/docs/6445145#6445243): “Ózbekstan Respublikasında Ózbekstan Respublikası Konstituciyası hám nızamlarınıń ústinligi sózsiz tán alınadı.
Ózbekstan Respublikası Konstituciyası mámlekettiń pútin aymaǵında joqarı yuridikalıq kúshke iye, tuwrıdan-tuwrı ámel etedi hám birden-bir huqıqıy túp tiykarın quraydı.
Ózbekstan Respublikasınıń xalıqaralıq shártnamaları xalıqaralıq huqıqtıń ǵalabalıq tán alınǵan princip hám normaları menen bir qatarda Ózbekstan Respublikası huqıqıy sistemasınıń quramlı bólegi bolıp tabıladı.
Eger Ózbekstan Respublikasınıń xalıqaralıq shártnamasında Ózbekstan Respublikasınıń nızamında názerde tutılǵanınan basqasha qaǵıydalar belgilengen bolsa, Ózbekstan Respublikasınıń xalıqaralıq shártnaması qaǵıydaları qollanıladı.
Mámleket hám onıń uyımları, basqa shólkemler, lawazımlı shaxslar, puqaralıq jámiyeti institutları hámde puqáralar Konstituciya hám nızamlarǵa muwapıq jumıs alıp baradı”.
Konstituciyanıń eń tiykarǵı yuridikalıq ózgesheliklerinen biri – onıń joqarı yuridikalıq kúshke iye ekenliginde.
Konstituciya joqarı yuridikalıq kúshke iye degende – nızamshılıq hújjetleriniń sistemasında (ierarxiyasında) eń joqarı orında turıwı hámde onıń basqa hár qanday normativ-huqıqıy hújjetlerden ústinligi túsiniledi.
Konstituciyanıń tuwrıdan – tuwrı ámel etiwi – mámleketlik uyımları, olardıń lawazımlı shaxsları, sonıń ishinde, sudlar tárepinen Konstituciya normaların huqıqtı qollaw ámeliyatında tikkeley qollaǵan halda qararlar qabıl etiw, puqaralardıń Konstituciya normalarınan tuwrıdan-tuwrı paydalanıwı hám ámel etiwin kózde tutadı.
Nızamshılıq hújjetlerine Konstituciya, nızamlar, Oliy Majlis palataları qararları, Prezident párman hám qararları, Ministrler Kabineti qararları, ministrlikler, komitetler hám keńseler buyrıqları hámde qararları, sonday-aq jergilikli mámleketlik hákimiyatı uyımları qararları kiredi.
Konstituciyanıń joqarı yuridikalıq kúshke iye ekenligi onıń siyasiy – huqıqıy hújjetligi, parlamentte qabıl etiliwiniń ayırıqsha tártibine iye ekenligi yaki ulıwmaxalıqlıq dawısı (referendum) tiykarında qabıl etiliwi, mámlekettiń ishki hám sırtqı siyasatınıń tiykarǵı strategiyalıq baǵdarların, insannıń tiykarǵı huqıq hám erkinliklerin belgilewindede kórinedi.
Video (https://www.youtube.com/watch?v=9GJ0UH0qNuY):