Янгиликлар
23
Mayıplıǵı bolǵan shaxslardıń huqıq hám imkániyatları jáne de keńeymekte
Búgingi kúnde mámleketimizde mayıplıǵı bolǵan shaxslarǵa kóplegen sháráyatlar jaratılıp, olar ushın ómirde óz orınların tabıӯında imkániyatlar esigi ashılmaqta desek qatelespeymiz. Sebebi, házirgi kúnde qabıl etilip atırǵan nızam-hújjetleriniń ózinde insanlardıń, sonıń ishinde mayıplıǵı bolǵan shaxslar huqıqlarınıń tolıq támiyinleniwi ushın mámleket óz kepilligin berip atırǵanlıǵın kórsek boladı.
Solar qatarında, Ózbekstan Respublikası Prezidentiniń usı jıldıń 27-fevral kúni qabıl etilgen “Mayıplıǵı bolǵan shaxslardı qollap-quwatlaw sistemasın jetilistiriwge baylanıslı qosımsha ilajlar haqqında”ǵı qararın aytıp ótsek boladı.
Bul qarar menen tek ǵana mayıplıǵı bolǵan shaxslarǵa emes, al olardıń kútimi menen bánt bolıp atırǵanlarǵa da bir qatar jeńillikler belgilep berildi. Yaǵnıy, endilikte I hám II topar mayıplıǵı bolǵan shaxslar hám olarǵa ǵamxorlıq etiwshiler mámleketlik xızmetlerden náwbetsiz paydalanadı, lawazımlı shaxslar qabıllawına gezeksiz kiredi.
Usa orında qararǵa kóre, 2023 jılda mútáj shaxslar zamanagóy ayaq protez-ortopediya buyımları menen, sonday-aq “Sociallıq qorǵaw birden-bir reestri”ne kirgizilgen hám I topar mayıplıǵı bolǵan shaxslar san protezi, baltır protezi hám ayaq qayısı ortoped apparatları menen biypul támiyinlenedi.
Bunnan tısqarı, 2023 jıl 1 sentyabrden baslap mayıplıǵı bolǵan shaxslardı protez-ortopediya úskeneleri hám reabilitaciya quralları menen támiyinlewde medicinalıq juwmaq talap etilmeydi.
2023 jıl 1 may ayınan baslap emlewxanalarda emlenip atırǵan mayıplıǵı bolǵan balaǵa ǵamxorlıq qılıp atırǵan shaxslarǵa balanıń janında bolıw ushın sharayat jaratıladı, bul dáwir ushın miynetke jaramsızlıq beti ashıladı hám olar ushın biypul awqat beriledi.
Pediatriya medicinalıq sociallıq ekspert komissiyaları balanı mayıplıǵı bolǵan shaxs dep tapqanda olarǵa pensiya tayınlaӯda qayta medicinalıq sociallıq ekspertizaǵa jiberiw biykar etiledi.
“Yuridikalıq járdem” málimleme sistemasında mayıplıǵı bolǵan shaxslarǵa biypul huqıqıy járdem beriw ushın arnawlı múrájat bólimi jaratıladı.
Qararǵa kóre, 2023 jıl 1 iyunǵa shekem mayıplıǵı bolǵan shaxslar hám olarǵa ǵamxorlıq etiwshilerge berilgen jeńilliklerdiń birden-bir dizimi qáliplestiredi. Usı dizim “Advice.uz” huqıqıy portalına jaylastırıladı.
Hátteki qarar menen bilim alıp, basqalar menen teńdey túrde óz imkániyatlarımnan paydalanaman degen mayıplıǵı bolǵan jaslar ushın bir qatar jeńillikler berilmekte, yaǵnıy 2023/2024 oqıw jılınan baslap oqıp atırǵan mayıplıǵı bolǵan studentlerge bilimlendiriw járayanında kómeklesiw ushın onıń jaqınlarınan birine joqarı oqıw orınları janında birge bolıw ushın sharayat jaratıladı.
Endilikte abiturientler ushın arnalǵan qabıllaw rejimine tiyisli maǵlıwmatlar mayıplıǵı bolǵan shaxslar ushın qolay waormatda boladı, bunda videoroliklar surdoawdarma yamasa subtitrlar menen kórsetiledi.
Solar qatarı, 2023/2024 oqıw jılınan “Arnawlı pedagogika, defektologiya” baǵdarında magistratura ushın tolıq mámleketlik grant beriledi.
Bıyılǵı jılda Mayıplıǵı bolǵan shaxslardı reabilitaciya qılıw hám protezlew milliy orayı hám onıń aymaqlıq orayları robotlastırılǵan lokomat kompleksi hám basqa zamanagóy reabilitaciya úskeneleri menen támiyinlenedi.
Sonıń menen birge, qararǵa kóre mayıplıǵı bolǵan shaxslardı qollap-quwatlaw sistemasın jetilistiriw boyınsha qosımsha ilajlar rejesi de tastıyıqlandi.
Maǵlıwmat retinde aytıp ótiw orınlı, bul hújjet Ózbekstan Respublikası Ádillik ministrligi baslaması menen islep shıǵıldı hám álbette bul qarar menen mayıplıǵı bolǵan shaxslardıń imkániyatları jáne de keńeydi desek qáte bolmaydı.
Nurjanov Azamat Xojeli rayonı
ádillik bóliminiń jetekshi máslahátshisi