Янгиликлар
20
Fors-major jaǵdayları payda bolǵanlıǵın tastıyıqlaw tártibi belgilendi
Ózbekstan Respublikasınıń “Ózbekstan Respublikasınıń Sawda-sanaat palatası haqqında”ǵı Nızamına muwapıq jergilikli xojalıq shártnamaları sheńberinde payda bolatuǵın jeńip bolmaytuǵın kúsh (fors-major) jaǵdayların tastıyıqlaw Sawda-sanaat palatasınıń tiykarǵı wazıypalarınan biri etip belgilengen edi.
Ózbekstan Respublikası Ministrler Kabinetiniń qararı menen “Jergilikli xojalıq shártnamaları sheńberinde payda bolatutuǵın jeńip bolmaytuǵın kúsh (fors-major) jaǵdayların tastıyıqlaw tártibi haqqında” reje tastıyıqlanǵan bolıp 2023-jıl 8-avgust kúninen kúshke kiriwi belgilendi.
Fors-major jaǵdayları Palata baslıǵınıń elektron sanlı imzası menen tastıyıqlanǵan hám belgilengen elektron túrdegi QR kod túsirilgen sertifikattı beriw arqalı tastıyıqlanadı.
Bunday sertifikattı alıw ushın talaban Sawda-sanaat palatasına tuwrıdan-tuwrı yamasa onıń rásmiy veb-saytı arqalı múrájat etiwine boladı. Talaban – shártnama sheńberinde payda bolǵan fors-major jaǵdayların tastıyıqlaw maqsetinde hújjetlerdi usınıwshı shártnama tárepi, Ózbekstan Respublikası rezidenti bolǵan isbilermenlik subyekt.
Sertifikat beriwdi sorap jollanǵan arza kelip túsken kúninen baslap bir jumıs kúni ishinde kórip shıǵılıp talabanǵa tolıq usınılmaǵan maǵlıwmat hám hújjetlerdi 5 kún ishinde usınıw haqqında soraw jiberiliwi múmkin. Bul múddetti talabannıń iltiması menen eki kúnge shekem uzayttırıwǵa jol qoyıladı.
Palata tárepinen arza berilgen kúnnen baslap on bes kún ishinde fors-major jaǵdayları bar ekenligin tastıyıqlawshı sertifikattı beriw yamasa bermew haqqında qarar qabıl etiledi.
Sertifikat berilmeytin bolsa 3 kún múddette talabanǵa bul haqqında tiykarlanǵan juwap beriliwi kerek.
Sertifikat berilgen jaǵdayda, sol kúnniń ózinde talabanǵa málim etiledi hám sertifikat penen birge tiyisli bolǵan hújjetler Palatanıń rásmiy veb-saytında járiyalanadı.
Berilgen sertifikattıń múddeti sheklenbeydi, biraq ol bir mártelik qásiyetke iye bolıp tek talabannıń arzasında kórsetilgen shártnamalıq qatnasıqlarǵa ǵana qollanıladı.
Nókis qalası Yuridikalıq xızmet kórsetiw
orayı bas yuriskonsultı G.Dauletova