Янгиликлар
14
Mayıplıǵı bolǵan shaxslarǵa nızamshılıqtaǵı jeńillikler.
Sociallıq jaqtan mútáj xalıqtıń hám mayıplıǵı bolǵan shaxslardıń huqıq hám máplerin qorgaw, olar ushın tosiqsiz ortalıq jaratıw hám jámiyetke integraciyalawın támiyinlew mámlekettiń áhmiyetli wazıypası. Xalıqtıń sociallıq jaqtan mútáj qatlamına jalǵız baslı ǵarrılar, mayıplıǵı bolǵan shaxslar, qatnas uqıpsız hám qatnas uqıplıǵı sheklengen puqaralar, social áhmiyetke iye keselliklerge shalınǵan shaxslar hámde jetim balalar hám ata-analarınan ayrılǵan balalar kiredi. Sol sebepli BMTnıń Mayıplar huqıqları haqqındaǵı konventsiyası talaplarına muwapıq, jańa redaksiyadaǵı Konstitutsiyaniń 57-statyasına tómendegi qosımshalar kiritildi ;
Birinshiden, mayıplıǵı bolǵan shaxslar hámde xalıqtıń sociallıq jaqtan mútajligi bar basqa taypalarınıń huqıqları mámleket qorǵawında ekenligi belgilenip atır. Ámeldegi Konstituciyamızda bul qorǵaw tek ǵana jas óspirimler, miynetke jaramsızlar hám jalǵız baslı ǵarrılarǵa tiyisli edi.
Ekinshiden, mámleket xalıqtıń socialliq jaqtan mútáj taypalarınıń turmıs sapasın asırıwǵa, jámiyet hám mámleket turmısında tolıq qatnasıwı ushın olarǵa shárt-shárayatlar jaratılıwma hámde olardıń tiykarǵı turmıs mútájliklerin ǵárezsiz túrde támiyinlew múmkinshiliklerin keńeytiwge qaratılǵan sharalardı kóredi, degen keń qamtılǵan norma kiritilip atır.
Bul norma menen xalıqtıń joqarıdaǵı taypalarına tiyisli jeńillikli úyler beriw, biypul medicinalıq buyımlar, protez-ortepediya buyımları, azıq-awqat ónimleri menen támiyinlew, pensiya hám napaqalar menen támiyinlew, social xızmetler túri hám sapasın asırıw ilajların kóriw mámlekettiń konstituciyalıq minnetlemesine aylanıp atır.
Úshinshiden, mámleket mayıplıǵı bolǵan adamlardıń social, ekonomikalıq hámde materiallıq tarawlar obektleri hám xızmetlerinen keń kólemde paydalanıwı ushın shárt-shárayatlar jaratadı, olardıń jumısqa jaylasıwına, tálim alıwına kómeklesedi, olarǵa zárúr informaciyanı tosqınlıqsız alıw múmkinshiligin támiyinleydi degen adamgershilikli norma bekkemlenip atır.
Bul bolsa mámleketke mayıplıǵı bolǵan adamlardıń mádeniyat orayları, kino hám kontcert zalları, cirk, teatrlarǵa kiriw, sonıń menen birge mámleket xızmetlerin, medicinalıq, social xızmetlerden paydalanıwda jeńillikler, qolaylıqlar jaratıw, olardı jeńillikli tiykarda jumısqa jaylastırıw hám tálim alıwları ushın sırtqı liy- huqıqiy sháralar kóriw minnetlemesin júklenip atır.
Bunnan tısqarı Ózbekstan Respublikası Salıq kodeksiniń salıq salınbaytuǵın dáramatlar haqqındaǵı 378-statiyası hámde ayrım taypadaǵı salıq tólewshilerdiń jámi dáramatların kemeytiriw haqqındaǵı 380-statiyasında da mayıplıǵı bolǵan shaxslarǵa jeńillikler berilgen.
Sonday-aq, jańadan qabıllanǵan Ózbekstan Respublikası Prezidentiniń 2023-jıl 1-iyundaǵı Xalıqqa sıpatlı sociallıq xızmet hám járdem kórsetiw hámde onıń nátiyjeli qadaǵalaw sistemasin jolǵa qoyıw boyınsha kompleks is-ilájlar haqqındaǵı PP-82-sanlı pármanı menende mayıplıǵı bolǵan shaxslarǵa mámleket tárepinen jeńillikler belgilengen.
Nókis rayonı ádillik bólimi tárepinen joqarıda kórsetilip ótken normalardıń orınlanıwı, mayıplıǵı bolǵan shaxslarǵa mámleketlik uyımlar tárepinen kórsetilip atırǵan xızmetlerdiń nátiyjeligi boyınsha monitoring jumısları alıp barılmaqta.
Nókis rayonı ádillik bólimi baslıǵı w.w.a A.Dastenov