Янгиликлар
29
Elektron mámleketlik xızmetlerdi rawajlandırıw - korrupciyaǵa shek qoyıw kepilligi
Mámleketlik xızmetlerdi elektron formaǵa ótkeriw – elimizdiń óz aldına qoyǵan perspektivalı wazıypalarınan biri. Elektron, yaǵnıy, onlayn xızmetler – bul ádettegi mámleketlik xızmetlerdiń zamanagóylesken túri.
Ózbekstan Respublikasınıń “Elektron húkimet haqqında”ǵı Nızamında elektron mámleketlik xızmet túsinigine usınday táriyp berilgen. Oǵan kóre, málimleme-kommunikaciya texnologiyaları qollanılǵan halda kórsetiletuǵın mámleketlik xızmet elektron mámleketlik xızmet esaplanadı.
Elimizde elektron mámleketlik xızmetlerdiń jolǵa qoyılıwı menen xalıq hám isbilermenlik subektleriniń artıqsha waqtı hám qarjısınıń sarplanıwı azaydı, sonıń menen eń áhmiyetlisi, byurokratiya hám korrupciya jaǵdaylarına shek qoyıldı. Yaǵnıy, puqaralar yaki isbilermenlik subektleri sutkanıń qálegen waqtında, ózine qolay payıtta aralıqtan turıp elektron mámleketlik xızmetlerdi alıw ushın múrájat jollaw imkaniyatı jaratıldı.
Elektron mámleketlik xızmetlerdi kórsetiw málimleme sisteması arqalı mámleketlik uyımlar hám puqaralar arasında tuwrıdan-tuwrı baylanıs ornatılmastan, insan faktorısız háreketler ámelge asırıladı.
Bul jaǵday xalıq hám isbilermenlik subektleri ushın qolaylı imkaniyat bolıp, burın eski tártipke kóre, mámleketlik xızmetti alıw ushın qaǵaz túrinde toltırılǵan arzanı jiberiw ushın puqara mámleketlik shólkemge barıwı, juwapker shaxstı kútiwi, hújjetlerde kemshilik tabılsa, jáne qaytıp ketiwine tuwra keler edi. Keyin bolsa múrájatı boyınsha juwabın alıw ushın jáne kelip-ketiwi kerek edi.
Elektron kórinistegi mámleketlik xızmetti alıwda bolsa bunday joqarıdaǵı sıyaqlı áwereshilikler joq. Aralıqtan turıp, yaǵnıy, internet tarmaǵı arqalı arza toltırıw procesinde, tek nızam hújjetleri menen belgilengen maǵlıwmatlar yaki soralıp atırǵan hújjetlerdiń skanerlengen forması júklenedi. Elektron xızmetlerde artıqsha hújjetlerdi talap etiw yaki juwapker shaxslar tárepinen basqa shártler kirgiziw imkaniyatı joq.
Xalıqtıń málimleme texnologiyaları, ulıwma, sanlı texnologiyalar tarawındaǵı bilimlerin hám elektron mámleketlik xızmetlerden paydalanıw boyınsha kónlikpelerin arttırıw arqalı, puqaralardıń erkin túrde múrájatın biyǵárez ráwishte interaktiv usılda jollay alsa hám óz huqıqların bilse, korrupciyalıq jaǵdaylardıń aldın alıwda ámelge asırılǵan jumıslardıń eń áhmiyetli qádemlerinen biri dep esaplaw múmkin.
“Sanlı texnologiyalar tek ónim hám xızmetler sapasın arttırıp ǵana qoymay, artıqsha shıǵınlardı da azaytadı. Sonıń menen birge, meni júdá qattı táshwishke salatuǵın hám tınıshsızlandıratuǵın eń awır illet – korrupciya bálesin joq etiwde de olar nátiyjeli qural bolıp tabıladı. Bunı bárshemiz tereń ańlap alıwmız dárkar”, degen edi Prezidentimiz Sh.Mirziyoev óz shıǵıp sóylewleriniń birinde.
Sol aytqanday, korrupciyasız rawajlanıwǵa erisiw ushın sanlı bilimler hám zamanagóy málimleme texnologiyaların iyelewimiz zárúr hám shárt.
Elektron mámleketlik xızmetlerdiń engiziliwi bolsa, óz gezeginde qalıslıq hám processtiń ashıq-aydın bolıwına xızmet etedi.
Taqıyatas rayonı ádillik bólimi
Mámleketlik xızmetler orayınıń bólim baslıǵ
Aybek ORAZÍMBETOV