Янгиликлар
29
Elektron sanlı qol tańbanı alıw qalay ámelge asırıladı?
Ózbekstan Respublikası Ministrler Kabinetiniń 2018-jıl 10-may kúngi 348-sanlı qararı menen tastıyıqlanǵan “Mámleketlik xızmetler orayları yaki onlayn tárizde (aralıqtan turıp) rásmiy málimleme resursları arqalı elektron sanlı qol tańbanı dizimge alıw hám elektron sanlı qol tańba sertifikatın beriw boyınsha mámleketlik xızmetler kórsetiwdiń Hákimshilik Reglamenti”ne tiykar, elektron sanlı qol tańba sertifikatın dizimnen ótkeriw hám alıw ushın fizikalıq shaxslar hám yuridikalıq shaxslar Mámleketlik xızmetler oraylarına tikkeley ózleri kelgen halda, birden-bir interaktiv mámleketlik xızmetler portalı yamasa rásmiy informaciya resursı arqalı elektron tárizde múrájat etiwi belgilengen.
Mámleketlik xızmetler orayları arqalı yáki Birden-bir interaktiv mámleketlik xızmetler portalı yamasa rásmiy informaciya resursı arqalı «Mámleketlik hám xojalıq organları, jergilikli mámleketlik hákimiyat organları hámde kommerciyalıq bankler tárepinen kórsetiletuǵın barlıq túrdegi xızmetlerden erkin paydalanıwdı támiyinleytuǵın elektron sanlı qol tańbanınıń sertifikatların beriw» mámleketlik xızmetleri sıpatında kórsetiledi.
Elektron sanlı qol tańbanıń sertifikatların beriw ushın fizikalıq shaxslardan eń kem aylıq is-haqınıń 7 payızı muǵdarında, jeke tártiptegi isbilermenlik subektleri hám yuridikalıq shaxslardan eń kem aylıq is-haqınıń 10 payızı muǵdarında jıyım pulı óndiriledi.
Fizikalıq shaxslarǵa Elektron sanlı qol tańbanıń sertifikatların beriwde «Social qorǵaw birden-bir reestri» maǵlıwmatlar sistemasında dizimge alınǵan shaxslarǵa, sonıń menen birge I-II topar mayıplıǵı bolǵan shaxslarǵa 50 payız muǵdarında shegirme qollanıladı.
Kásip-óner kollejleri hám akademik liceylerdiń oqıwshılarına, ulıwma orta bilimlendiriw shólkemleriniń pitiriwshi klass oqıwshılarına, «Temir dápter», «Háyallar dápteri» hám «Jaslar dápteri»nde dizimde turǵan puqaralarǵa elektron sanlı qol tańbanıń sertifikatları biypul beriledi.
Elektron sanlı qol tańba sertifikatlarınıń ámel qılıw múddeti elektron sanlı qol tańba dizimge alınǵan waqıttan baslap 24 aydan aspawı kerek.
Barlıq Mámleketlik xızmetler oraylarında elektron sanlı qol tańba sertifikatın beriw boyınsha Mámleketlik xızmetler orayı arqalı múrájat qılınǵanda múrájat etiwshi oray xizmetkerine óziniń shaxsın tastıyıqlawshı hújjet (pasport, áskeriy bilet, aydawshılıq guwalıǵı yáki shaxsın tastıyıqlawshı basqa hújjet) hámde elektron hújjet túrinde jazıp qoyıw hám saqlaw ushın basqa maǵlıwmatlar deregin (USB fleshka) usınadı.
Eger elektron sanlı qol tańba iyesi yuridikalıq shaxstıń wákili bolsa, sorawnamaǵa elektron sanlı qol tańba iyesinıń familiyası, atı, ákesiniń atı hám lawazımı kórsetilgen hámde usı elektron sanlı qol tańba iyesine elektron sanlı qol tańba hám elektron sanlı qol tańbanıń sertifikatların beriw haqqında yuridikalıq shaxstıń xatı (isenim xat) qosımsha qılınadı.
Oray xızmetkeri tárepinen múrájat etiwshiniń atınan sorawnama toltıradı, bunda sorawnama múrájat etiwshi tárepinen daktiloskopiya (barmaq izi) arqalı tastıyıqlanadı hám eger elektron sanlı qol tańbanı elektron hújjet túrinde saqlaw ushın basqa maǵlıwmatlar deregine (USB fleshka) jazıp beredi.
Birden-bir interaktiv mámleketlik xızmetler portalı yamasa rásmiy informaciya resursı arqalı múrájat etiwshi ǵárezsiz ráwishte hákimshilik reglament talaplarına muwapıq electron kóriniste mámleketlik xızmetlerden paydalanıw haqqındaǵı sorawnamanı toltıradı hám sorawnamaǵa elektron múrájat etiwshiniń pasportı (ID-karta) nusxası hámde pasporttıń tiykarǵı beti (ID-karta) menen birgelikte selfi usılında alinǵan fotosúwret usınıladı. Bunda pasporttıń tiykarǵı beti (ID-karta) menen birgelikte selfi usılında alinǵan fotosúwrettiń nusxasında múrájat etiwshiniń júz kórinisi tınıq kóringen hámde pasporttıń tiykarǵı betinıń (ID-karta) bárshe rekvizitleri oqıp bolatın sapada bolıwı shárt.
Birden-bir interaktiv mámleketlik xızmetler portalı yamasa rásmiy informaciya resursı arqalı múrájat etilgende jıyım pulınıń 90 payızı óndiriledi.
Nókis qalası Ádillik bólimi
Mámleketlik xızmetler orayı bólim baslıǵı B.Nurlıbekov