Янгиликлар
08
Hákimshilik járiymalardı tólewde xalıqqa qosımsha qolaylıqlar jaratıldı
Sońǵı jıllarda mámleketimizde sud hújjetleri hám basqa organlar hújjetlerin orınlaw sistemasın jetilistiriwge qaratılǵan keń kólemli reformalar ámelge asırıldı.
Atap aytqanda hákimshilik huqıqbuzarlıqlar ushın qollanılatuǵın járiymalardı ıqtıyariy tólewdiń ápiwayılastırılǵan tártibi engizildi.
Sol menen birge mámleketimizde ámelge asırılıp atırǵan reformalardıń dawamı sıpatında hákimshilik járiymalardı tólewde xalıqqa qosımsha qolaylıqlar jaratıw, sud qararlarına tiykar qollanılatuǵın hákimshilik jariymalar salıw haqqındaǵı qararlardıń orınlanıwınıń ápiwayılastırılǵan tártibin engiziw maqsetinde 2023-jıl 18-aprel kúni Ózbekstan Respublikası “Hákimshilik járiymalardı tólewde xalıqqa qosımsha qolaylıqlar jaratılıwı múnásibeti menen Hákimshilik juwapkershilik haqqındaǵı Kodeksiniń 332-1-statyasına ózgeris kiritiw haqqında”ǵı WRQ–830-sanlı Nızam qabıl etildi.
Nızam menen Kodekstiń 332-1-statyasına kirgizilgen ózgerisge kóre:
Huqıqbuzar oǵan járiyma salıw haqqındaǵı qarar tapsırılǵan kúnnen baslap 15 kún ishinde járiyma muǵdarınıń 50 payızın yaki 30 kún ishinde járiyma muǵdarınıń 70 payızın ıqtıyariy ráwishte tólegen jaǵdayda, ol járiymanıń qalǵan bólegin tólewden azat etiledi.
Járiyma salıw haqqındaǵı qarardı orınlawdıń ápiwayılastırılǵan tártibi tómendegi jaǵdayda qollanılmaydı:
- usı Kodekstiń 131, 132, 136 hám 140-statyalarında názerde tutılǵan huqıqbuzarlıqlar islengende;
- járiyma salıw haqqındaǵı qarar ústinen shaǵım etilgende yaki protest bildirilgende;
- usınday huqıqbuzarlıq hákimshilik jaza sharası qollanılǵannan keyin 1 jıl dawamında tákirar islengende.
Kiritilgen ózgerisdiń jáne bir áhmiyetlisi bul tártip sud qararlarına tiykar qollanılatuǵın jariymalarga qarata qollanılıwı belgilendi.
Nızam hákimshilik jariymalardı tólewde járiymalar júgin kemeytiriwge hámde hákimshilik jariymalardı iqtıyariy ráwishte tólew sistemasın jánede ápiwayılastırıwǵa, sonday-aq, sud hújjetleri hám basqa organlar hújjetlerin óz waqtında orınlanıwın támiyinlewge xızmet etedi. Nızam 2023-jıl 1-maydan baslap kúshke kiriwi belgilengen.
Qanlıkól rayonı ádillik bólimi
Insan huqıqların qorǵaw hám huqıqtı qollaw
ámeliyatın úyreniw bólimshesi
bas máslahátshisi 2-dárejeli yurist B.Matjanova