Янгиликлар
28
Ózbekstan Respublikası Salıq kodeksinde belgilengen waqtınshalıq salıq jeńillikleri
Ózbekstan Respublikası Salıq kodeksinde belgilengen waqtınshalıq
salıq jeńillikleri
Ózbekstan Respublikası Prezidentiniń 2020-jıl 11-noyabr kúngi “2020-2023 jıllarda Qaraqalpaqstan Respublikasın kompleks sociallıq-ekonomikalıq rawajlandırıw ilajları haqqında”gi Pármanı qabıl etiliwi qala hám rayonlar “ósiw noqatları”na muwapıq ekonomikanıń eń zárúrli tarmaqların xoshametlewge jańa pát baǵıshladı.
Respublikanıń ekonomikalıq potencialın asırıw, xalıq bandligi hám párawanlıǵı dárejesin asırıw, aymaqlar hám tarmaqlardıń sociallıq-ekonomikalıq rawajlanıwın jedellestiriw zárúrligi belgilengen wazıypalar Qaraqalpaqstannıń ámeldegi múmkinshilik hám resurslarınan nátiyjeli paydalanıwdıń áhmietin belgileydi.
Atap ótiliwi tiyis, ámeldegi Ózbekstan Respublikası Salıq kodeksiniń 483-statyasında, waqtınshalıq salıq jeńillikleri berilgen hám barlıǵına tiyisli múddetler belgilengen.
Mısalı, bul statyanıń birinshi bóliminde 2020-jıl 1-oktyabr kúnine shekem bolǵan dáwir ushın payda salıǵın esaplap shıǵarıwda kommerciyalıq bankleri tárepinen waqtınshalıq qıyınshılıqlarǵa dus kelgen yuridikalıq hám fizikalıq shaxslardıń, sonıń menen birge jeke tártiptegi isbilermenlerdiń kreditleri boyınsha tólewlerdi keshiktiriw múmkinshiligi berilgen dáwirinde esaplanǵan hám keshiktirilgen procentler summası jámi dáramat quramına kiritilmeytuınlıǵı belgilengen.
Salıq kodeksiniń 483-statyası Ózbekstan Respublikasınıń 2021-jıl 14-sentyabrdegi ÓRN-714-san Nızamına tiykarınan tórtinshi-altınshı bólimleri menen tolıqtırılǵan bolıp, Ózbekstan Respublikası Prezidentiniń Pármanında Qaraqalpaqstan Respublikasınıń hár bir qalası hám rayonı ushın “ósiw noqatı” dep belgilengen iskerlik túrlerin ámelge asırıp atırǵan jańadan shólkemlestirilgen isbilermenlik subyektleri - 2024-jıl 1-yanvar kúnine shekem bolǵan múddetke;
Qaraqalpaqstan Respublikasınıń Taxtakópir, Bozataw hám Shomanay rayonlarında jaylasqan, jańadan shólkemlestirilgen sanaat tarawındaǵı isbilermenlik subektleri - 2024-jıl 1-yanvar kúnine shekem bolǵan múddetke. Salıq tólewshilerdiń usı qatlamı payda salıǵın hám suw resurslarınan paydalanǵanlıǵı ushın salıqtı belgilengen salıq stavkasınan 50 procent kemeytirilgen salıq stavkaları boyınsha tólewi;
Qaraqalpaqstan Respublikası Joqarǵi Kengesi tárepinen tastıyıqlanǵan dizim boyınsha Qaraqalpaqstan Respublikasında xızmetler kórsetiwge qánigelestirilgen hám awır sharayatlardaǵı 45 máhelle hám awıllarda jaylasqan, jańadan shólkemlestirilgen isbilermenlik subyektleri - 2026-jıl 1-yanvar kúnine shekem bolǵan múddetke. Isbilermenlik subektleriniń usı qatlamı payda salıǵınanda azat etiliwi belgilengen.
Juwmaq etip aytqanda, mámleketimiz basshısı tárepinen Qaraqalpaqstannıń rawajlanıwına arnalǵan koplegen hújjetleri imzalanǵan bolıp, bunda Salıq kodeksi sistemasındaǵı waqtınshalıq jeńillik hám preferentsiyalar zárúrli orın tutıp, isbilermenliktiń rawajlanıwına úlken úles qosıp qalmastan, usınıń menen bir qatarda túrli tarawlarǵa tuwrıdan-tuwrı investitsiyalardıń kirip keliwine xızmet etedi.
Qaraqalpaqstan Respublikası Ádillik ministrligi Huqıqtı qóllaw ámeliyatın úyreniw bólimi bas máslahátshisi Timur Asanov