Янгиликлар
21
MÁMLEKETLIK XIZMETLERDI KÓRSETIWDE KIMLERGE JEŃILLIKLER BELGILENGEN
Búgingi kúnde elimizde mámleketlik xızmetlerdi kórsetiw tarawın jetilistiriw isleri jedellik penen ámelge asırılmaqta. Atap aytqanda, tarawda ámelge asırılıp atırǵan reformalar sebepli úlken ózgerisler júz bermekte. Mámleketlik xızmetlerdi kórsetiwdiń pútkil sisteması jetilistirilip, mákemeler aralıq elektron birge islesiw basqıshpa-basqısh jolǵa qoyıldı hámde artıqsha hújjetler talap qılınıw jaǵdaylar keskin túrde kemeytildi.
Mámleketlik xızmetlerdi kórsetiw sistemasın reformalawdıń tiykarǵı maqseti tarawǵa tiyisli házirgi kúndegi hám jaqın keleshekte júzege keliwi múmkin bolǵan mashqalalardı jedellik penen ózgerip baratırǵan global informatsiyalasqan jámiyet mútájliklerine sáykes túrde sheshiwden ibarat.
Elimizde mámleketlik xızmetlerdi kórsetiwde byurokratiyalıq hám artıqsha hákimshilik protseduralardı saplastırıw maqsetinde Mámleketlik xızmetler orayları shólkemlestirilip, qolay, zamanagóy, mámleketlik xızmetlerdi qısqa múddette kórsetiw sisteması jolǵa qoyılıp, olardıń iskerligi jetilistirilip kelinbekte.
Sol qatarda, puqaralarımızǵa mámleketlik xızmelerden paydalanıwda qolaylı shárt-shárayatlar hámde bir qatar jeńillikler jaratılǵan. Atap aytqanda, Ózbekstan Respublikası Prezidentiniń “Mámleketlik xızmetler kórsetiwdi ápiwayılastırıw, byurokratik tosıqlardı qısqarttırıw hámde mámleketlik xızmetlerdi kórsetiw milliy sistemasın rawajlandırıwdıń qosımsha is-ilájları haqqında”ǵı 2022-jıl 20-apreldegi PF-113-sanlı Pármanınıń 3-bántine muwapıq fizikalıq imkaniyatı sheklengen hám mayıplılıǵı bolǵan shaxslarǵa mámleketlik xızmetlerdi kórsetiwde inklyuziv ortalıq jaratıw, xalıqqa hámde isbilermenlik subyektlerine mámleketlik xızmetler kórsetiw boyınsha wazıypalardı ámelge asırıwda Ádillik ministrliginiń keyingi bes jıllıktaǵı baslı iskerlik jónelislerinen biri sıpatında belgilengen.
Ózbekstan Respublikası Prezidentiniń “2022-2026-jıllarǵa mólsherlengen Jańa Ózbekstannıń Rawajlanıw strategiyasın “Insanǵa itibar hám sıpatlı bilimlendiriw jılı”nda ámelge asırıwǵa tiyisli mámleketlik dástúri haqqında”ǵı 2023-jıl 28-fevraldaǵı PF-27-san Pármanınıń 2-bántinde xalqımızdıń awırın jeńil qılıw, puqaralar ushın qosımsha qolaylıqlar jaratıw hám olardıń qárejetlerin tejew maqsetinde 2023-jıl 1-iyuldan baslap xızmetler sanın 300 ge, Birden-bir interaktiv xızmetler arqalı kórsetiletuǵın mámleketlik xızmetler sanın bolsa 570 ke jetkeriw, xalıqtıń sotsiallıq qorǵawǵa mútáj qatlamları (mayıplılıǵı bolǵan shaxslar, awır nawqaslar, nuraniylar hám basqalar)ǵa migratsiya hám puqaralıqtı rásmiylestiriw tarawındaǵı mámleketlik xızmetlerdi turaqlı jasaw yakı waqtınsha turǵan orınǵa shıǵıw arqalı kórsetilgen xızmet ushın qosımsha tólem óndirilmegen halda kórsetiwdi jolǵa qoyıw, elektr, gaz hám suw sarplanıwı esaplaǵıshların salıstırıwdan ótkeriw boyınsha mámleketlik xızmetlerdi proaktiv tárzde kórsetiw (puqara múrájaatın kútpesten, xızmet kórsetiwshi shólkemniń óz baslaması menen) usınıs jiberiwdi jolǵa qoyıw siyaqlı wazıypalar belgilengen.
Sonday-aq, usı Pármanniń 3-bántine muwapıq 2023-jıl 1-sentyabrden baslap puqaralar hám isbilermenlik subyektlerine subsidiya ajratıw menen baylanıslı bárshe xızmetler basqıshpa-basqısh “Puqaralar hám isbilermenlik subyektlerine subsidiya ajratıwdıń birden-bir elektron platforması”na ótkeriliwi hámde subsidiyalardı ajratıwdıń máqsetke muwapıqlılıǵın elektron platforma arqalı onlayn tekseriw sisteması jolǵa qoyılıwı názerde tutılǵan.
Bunda subsidiyalar ajratıw haqqındaǵı arzalar Birden-bir interaktiv mámleketlik xızmetler portalı arqalı yaki qálegen rayon (qala) mámleketlik xızmetler orayları arqalı tapsırıw imkaniyatın jaratıw hámde artıqsha byurokratiyalıq tosıqlar hám basqa korrupsiyalıq faktorlardı saplastırıw kózde tutilmaqta.
Juwmaqlastırıp aytqanda, mámleketimizde puqaralarımızga mámleketlik xızmetlerdi kórsetiw tarawında ámelge asırılıp atırǵan bir qatar unamlı is-ilájlar, olardıń xızmetlerden sapalı hám tez paydalanıwǵa, huqıqları hám nızamlı mápleriniń támiyinleniwine, sonday-aq global informaciyalıq jámiyette puqaralardıń jámiyet hám mámleket penen óz-ara qatnasıǵın jańa basqıshqa kóteriliwine túrtki beriwi sózsiz.
Qaraqalpaqstan Respublikası Ádillik ministrligi
Mámleketlik xızmetlerdi kórsetiw ústinen qadaǵalaw
sektori jetekshi másláhátshisi D.K.Xabibullayeva